Vulavula Hi Xivindzi

¹ Emalembeni ya sweswinyana, vahuweleri etindhawini tin’wana va swi kuma swi ya swi tika ku vulavula ni vanhu emakaya ya vona. Vo tala va vika leswaku ensin’wini ya vona ku tlula 50 wa tiphesente ta vanhu a va vi kona emakaya loko va endzeriwa hi yindlu na yindlu. Hikwalaho, nkarhi wo tala lowu hetiwaka a wu na mihandzu.

² Emalembeni lama hundzeke vunyingi bya vanhu a va kumeka emakaya hi Sonto, leri hi ntolovelo a ri tekiwa tanihi siku ro wisa. Mindhavuko yi cincile. Namuntlha swi tolovelekile eka vanhu ku va va tirha mintirho yo tihanyisa, va khathalela swilaveko swa vona swo tanihi ku ya xava, kumbe ku ya eku tihungaseni, leswi va endlaka leswaku va nga vi kona emakaya ya vona. Kutani hambi ku ri hi Tisonto, ku kuma vanhu hi ku famba hi yindlu na yindlu swi hundzuke xiphiqo.

³ Loko vanhu va nga ri kona emakaya, swi le rivaleni leswaku ku kona laha va nga ya kona. Leswi pakani ya hina ku nga ku vulavula na vanhu, ha yini u nga vulavuli na lava u hlanganaka na vona—emagondzweni, etimakete, kumbe emintirhweni ya vona. A ku ri endlelo ra Pawulo ku tshinelela “lava a va ri kona,” leswaku a va nyika vumbhoni. (Mint. 17:17) Leyi yi tikombe yi ri ndlela leyi humelelaka yo vula vumbhoni enkarhini wolowo, naswona ya ha ri ndlela leyi humelelaka esikwini ra hina.

⁴ Loko hi famba hi yindlu na yindlu, hi ntolovelo hi vona vanhu va ri eku tifambeleni kumbe va yimele un’wana. Hi siku leri xeke kahle, va nga ha va va titshamele ebenceni ra le phakini kumbe va ri eku lunghiseni kumbe ku hlantswa movha. Ku n’wayitela ka xinghana ni maxewetelo lamanene ku nga ha va swona leswi lavekaka leswaku hi sungula bulo. Loko va tshama ekusuhi, hi nga ha boxa ni leswaku a hi va kumanga emakaya ya vona, kutani sweswi ha tsaka leswi hi kumeke xinkarhana xexo xo vulavula na vona. Hi ku rhanga hi ku kombisa xivindzinyana, vo tala va tsakela mintokoto leyi vuyerisaka.

⁵ Ku Va Na Xivindzi Swa Vuyerisa: Makwerhu un’wana u hlamusele leswaku u tshinelela vanhu lava va tiyimeleke, lava yimeleke bazi, lava tifamba-fambelaka, kumbe lava titshameleke etimovheni ta vona. Hi n’wayitelo lowunene ni rito ro hanya, u tiendla onge i muakelani loyi a ngo lava ntsena ku n’wi endzela. Hi ndlela leyi a nga lo fambisa tibuku to tala ntsena kambe u tlhele a sungula tidyondzo to hlaya ta Bibele.

⁶ Makwerhu un’wana ni nsati wakwe a va famba hi yindlu na yindlu loko va ta hlangana ni wansati loyi a rhwele nkwama lowukulu wa swakudya. Va sungule bulo, va n’wi bumabumela hi ku gingiriteka ka yena a khathalela swilaveko swa ndyangu wakwe. Va vutisile: “Kambe, xana i mani la nga phamelaka vanhu hinkwavo?” Sweswo swi pfuxe ku tsakela ka wansati yoloye. Bulo ro koma ri endle leswaku a va rhambela ekaya rakwe, laha ku sunguriweke dyondzo ya Bibele.

⁷ Hikwalaho, nkarhi lowu taka loko u vula vumbhoni hi yindlu na yindlu, hambi ko va hi Sonto kumbe siku rin’wana ra vhiki, ivi u kuma leswaku vanhu a va kona ekaya, ha yini u nga vi na xivindzi xo vulavula ni vanhu lava u hlanganaka na vona—emagondzweni kumbe kun’wana? (1 Tes. 2:2) U nga ha va na vutirheli lebyi humelelaka swinene, naswona u ta va na ntsako lowukulu entirhweni wa wena.