Hambeta U Vulavula Rito Ra Xikwembu Hi Vurhena

¹ Tanihi Vakreste ha swi tiva leswaku a hi hinkwavo lava nga ta amukela rungula ra hina. (Mat. 10:14) Hambiswiritano, a hi pfumeleli nkaneto leswaku wu hi tshikisa ku twarisa mahungu lamanene. (Swiv. 29:25) Xana i yini leswi hi pfunaka leswaku hi hambeta hi vulavula rito ra Xikwembu hi vurhena?

² Muapostola Pawulo a a tiva “ntikelo lowu tlurisaka wa ku tiva Kreste Yesu.” Leswi swi n’wi susumetele leswaku a vulavula hi “ku khorwiseka lokukulu.” (Filp. 3:8; 1 Tes. 1:5) Hambileswi van’wana va tekeke rungula ra yena ri nga pfuni nchumu, a a swi tiva leswaku a ri ri “matimba ya Xikwembu ya ku ponisa un’wana ni un’wana la nga ni ripfumelo.” (Rhom. 1:16) Hikwalaho hambiloko a kanetiwa u hambete a “vulavula hi vurhena hi vulawuri bya Yehovha.”—Mint. 14:1-7; 20:18-21, 24.

³ Xihlovo Xa Matimba Ya Hina: Pawulo a a nga titshegi hi matimba yakwe leswaku a kota ku chumayela hi vurhena. Loko a vulavula hi yena n’wini na Silasi u te: ‘Loko hi rhange hi xaniseka ni ku rhukaniwa eFilipiya, hi kume vurhena hikwalaho ka Xikwembu xa hina, bya ku mi byela mahungu lamanene ya Xikwembu hi ku lwa lokukulu ngopfu.’ (1 Tes. 2:2; Mint. 16:12, 37) Nakambe, loko Pawulo a ri ekhotsweni le Rhoma, u kombele vamakwerhu leswaku va n’wi khongelela leswaku a ta ya emahlweni a twarisa mahungu lamanene hi ‘vurhena hilaha a a fanele a vulavula hakona.’ (Efe. 6:18-20) Pawulo u kote ku hambeta a vulavula rito ra Xikwembu hi vurhena, hi ku titshega hi Yehovha ku nga ri hi matimba ya yena n’wini.—2 Kor. 4:7; Filp. 4:13.

⁴ Ninamuntlha swi tano. Makwerhu un’wana loyi a swi n’wi tikela ku byela vatirhi-kulobye leswaku i Mbhoni ya Yehovha ni ku va chumayela hi xitshuketa, u khongele hi mhaka leyi, kutani a sungula ku va chumayela. Eku sunguleni un’wana wa vatirhi-kulobye u arile loko a n’wi chumayela kambe loko a twa a vulavula hi ta ntshembo wa ku pfuxiwa ka vafi u pfumerile ku dyondza Bibele. Ku sukela kwalaho makwerhu u tirhise nkarhi wun’wana ni wun’wana lowu a wu n’wi pfulekela leswaku a chumayela. Eka ndhawu yin’wana leyi a tirheke eka yona malembe ya 14 u kote ku pfuna vanhu va 34 leswaku va khuvuriwa. Hilaha ku fanaka, na hina hi nga tiyiseka leswaku Yehovha u ta hi pfuna ‘leswaku hi hambeta hi vula rito ra yena hi vurhena lebyi heleleke.’—Mint. 4:29.