Khathalela Van’wana—Hi Ku Va Ni Musa
1 Loko wansati un’wana loyi a a venga Timbhoni a tsundzuka siku ro sungula leri a vulavuleke ni Mbhoni ya Yehovha ha rona, u ri: “Kahle-kahle a ndza ha tsundzuki leswi hi vulavuleke ha swona, kambe lexi ndzi xi tsundzukaka i musa, xinghana ni ku titsongahata ka yona. Ndzi titwe ndzi yi rhandza swinene.” Marito lawa ma komba leswaku i swa nkoka ku khathala swinene hi lava hi va chumayelaka.—Filp. 2:4.
2 Rirhandzu Ri Ni Musa: Ndlela yin’wana leyi hi nga kombisaka rirhandzu eka van’wana ha yona i ku va ni musa. (1 Kor. 13:4) Munhu la nga ni musa wa khathala swinene hi van’wana naswona u lava ku va pfuna. Entiyisweni, ntirho wo chumayela hi woxe wu kombisa leswaku hi ni musa. Rirhandzu ra hina ra xiviri eka vanhu a ri vonaki hi ku va chumayela ntsena. Tindlela hinkwato leti hi tirhisanaka ni vanhu ha tona—ku nga xinghana xa hina, mahanyelo ya hina lamanene, ndlela leyi hi yingisaka ha yona, swilo leswi hi vulavulaka ha swona ni ndlela leyi hi vulavulaka ha yona, hambi ku ri ndlela leyi hi langutekaka ha yona exikandzeni—ti ta komba leswaku ha khathala hakunene.—Mat. 8:2, 3.
3 Loko hi khathalela van’wana hi rirhandzu hi ta endla matshalatshala ya ku va pfuna. Loko phayona rin’wana ra xinuna ri ri karhi ri chumayela hi yindlu ni yindlu, noni yin’wana leyi dyuhaleke yi hatle yi tsema bulo loko yi twa leswaku i Mbhoni. Yi vule leswaku loko phayona ri gongondza a yi ri henhla ka xitepisi ekhixini yi ri karhi yi lunghisa rivoni ra gezi. Phayona leri ri hlamule ri ku: “Swi ni khombo ku khandziya xitepisi u ri wexe.” Hiloko noni yi ri byela leswaku ri nghena. Phayona ri lunghise rivoni kutani ri tifambela. Loko n’wana wa noni leyi a hundza a yi pfuxela siku rin’wana, yi n’wi byele leswi humeleleke. Leswi swi ri tsakise ngopfu jaha leri lerova ri famba ri lavana ni phayona leri leswaku ri ri nkhensa. Hiloko va va ni bulo lerinene leri endleke leswaku jaha leri ri pfumela ku dyondzeriwa Bibele.
4 Loko hi va ni musa, hi kombisa rirhandzu leri Yehovha a nga na rona eka vanhu ni ku sasekisa rungula ra Mfumo. Hikwalaho a hi hambeteni hi “tibumabumela tanihi vatirheli va Xikwembu . . . hi [ku va ni] musa.”—2 Kor. 6:4, 6.