Xana U Chumayela Hi Vurhena?
1 Hambileswi Petro na Yohane va khomiweke ni ku xungetiwa hi vakaneti, va hambete va chumayela rungula ra Mfumo hi vurhena. (Mint. 4:17, 21, 31) Xana ku chumayela hi vurhena swi vula yini eka hina namuntlha?
2 Ku Nyikela Vumbhoni Hi Vurhena: Mavizweni wa “vurhena” i “ku va ni xivindzi,” leswi vulaka “ku nga chavi nchumu, ku va ni ntamu ni ku tiyisela.” Eka Vakreste va ntiyiso, ku chumayela hi vurhena swi vula ku nga chavi ku vulavula loko u pfulekeriwa hi lunghelo ra ku chumayela mahungu lamanene eka vanhu van’wana. (Mint. 4:20, 1 Pet. 3:15) Swi vula leswaku a hi na tingana hi mahungu lamanene. (Ps. 119:46; Rhom. 1:16; 2 Tim. 1:8) Xisweswo, vurhena i mfanelo leyi lavekaka leswaku hi hetisisa xiavelo xa hina xa ku chumayela mahungu lamanene ya Mfumo enkarhini lowu wa makumu. Mfanelo leyi yi hi susumetela ku byela vanhu mahungu lamanene kun’wana ni kun’wana laha va kumekaka kona.—Mint. 4:29; 1 Kor. 9:23.
3 Vurhena eXikolweni: Xana mboyamelo wa ku chava ni ku nga titshembi wu endla leswaku swi ku tikela ku chumayela eka vana lava u nghenaka na vona xikolo? Entiyisweni, minkarhi yin’wana a swi olovi, i ntlhontlho lowukulu. Kambe, Yehovha u ta ku nyika matimba loko u khongelela ku va ni vurhena bya ku chumayela vanhu van’wana. (Ps. 138:3) Vurhena byi ta ku pfuna leswaku u titivisa eka van’wana leswaku u Mbhoni ya Yehovha ni ku langutana ni ku hlekuriwa. Hikwalaho, ku chumayela ka wena exikolweni ku nga ponisa lava ku yingisaka.—1 Tim. 4:16.
4 Vurhena eNtirhweni: Xana vatirhi-kuloni va ku tiva u ri Mbhoni ya Yehovha? Ndlela yin’we ntsena leyi vatirhi-kuloni va nga fikeleriwaka ha yona hi mahungu lamanene i ku va chumayela. Vurhena bya wena byi ta tlhela byi ku pfuna leswaku u tinyika nkarhi wa ku va kona eminhlanganweni ya Vukreste ni le mintsombanweni.
5 Ku Va Ni Vurhena Loko U Langutane Ni Ndzingo: I swa risima ku va ni vurhena loko hi langutane ni nkaneto. (1 Tes. 2:1, 2) Byi hi pfuna ku yima hi tiyile eripfumelweni ra hina loko hi langutane ni minxungeto, ku hlekuriwa kumbe loko hi langutane ni nxaniso hi ku kongoma. (Filp. 1:27, 28) Byi hi nyika ntamu wa ku yima hi tiyile loko hi tshikileriwa leswaku hi tshika ku namarhela mimpimanyeto ya Xikwembu xa hina, Yehovha. Byi hi nyika ntamu wa ku tshama hi ri ni ku rhula loko van’wana va lava ku holovisana na hina.—Rhom. 12:18.
6 Ku nga khathariseki leswaku un’wana ni un’wana wa hina u langutana ni swiphiqo swa njhani, onge hi nga tiyisela eku chumayeleni ka mahungu lamanene hi vurhena.—Efe. 6:18-20.