Nhlavutelo—Xilotlelo Xa Ntsako Wa Ntiyiso
1 Marito ya muapostola Yohane eka Nhlavutelo 1:3 i mahungu lamanene eka hina hikuva u hi byela ndlela leyi hi nga kumaka ntsako ha yona. U tsarile: “Ku katekile munhu loyi a hlayaka mahungu lawa ya vuhlavuteli, ku katekile ni lava va ma yingisaka, ni ku landza leswi tsariweke ebukwini ya kona.” Buku leyi nge Nhlavutelo—Ku Chaputa Ka Yona Loku Hlamarisaka Ku Tshinele! yi pfune vo tala ku kuma ntsako lowukulu. Hi ni xivangelo lexi twalaka xo yi fambisela van’wana.
2 U nga swi kota ku sungula bulo hi xivutiso lexi:
◼“Xana u anakanya leswaku buku ya Bibele ya Nhlavutelo yi endleriwe leswaku yi twisisiwa, kumbe yi endleriwe ku tshama yi ri xihundla? [Yimela nhlamulo.] Vo tala va na vonelo leri fanaka ni ra wena. Xiya leswi Bibele yi swi vulaka eka Nhlavutelo 1:3. [Hlaya.] Kutani ke, Nhlavutelo yi nga twisisiwa, naswona rungula leri yi nga na rona ri nga hi tisela ntsako. Xana leswi swi nga kotekisa ku yini?” Hlamusela rungula leri nga eka ndzimana 2 eka tluka 6, kutani u ku: “Buku leyi yi hlamusela ndzimana hi ndzimana ya buku ya Nhlavutelo. Yi lava nkarhi wa wena leswaku u yi hlaya. Ndzi ta tsakela ku ku siyela kopi leyi hi munyikelo wa R10,50.”
3 Leswi vo tala va khumbekaka hi ku khathalela swilaveko swa vona swa nyama, leswi swi nga ha pfuxa ku tsakela:
◼“Xana u anakanya leswaku xilaveko xa hina lexikulu i yini? [Yimela nhlamulo.] Ku na vo tala lava khorwisekaka leswaku hi lava swilo swo tala leswi vonakaka.” Pfula eka tluka 73 kutani u hlamusela tinhla-nkulu leti nga ebokisini leri nga ni xihloko lexi nge “Ku Rhandza Rifuwo Swi Lwisana Ni Vutlhari.” Yana emahlweni u ku: “Leswi swi komba leswaku swilo swa nyama swa kandziyisiwa swinene; hi fanele ku khathalela swinene swilaveko swa hina swa moya. Vutivi bya ntiyiso hi byona lebyi entiyisweni hi byi lavaka. Kambe i vutivi bya mayelana na yini?” Hlaya Yohane 17:3, kutani u hlamusela ndlela leyi vutivi bya mayelana ni Xikwembu byi nga hi yisaka ha kona evuton’wini lebyi nga heriki. N’wi fambisele buku ni ku n’wi byela leswaku u ta vuya u ta n’wi komba ndlela leyi yi paluxaka ha yona rungula leri hlamarisaka mayelana ni xikongomelo xa Xikwembu xo enerisa swilaveko hinkwaswo swa vanhu.
4 Leswi vo tala va karhatekaka hi maxangu ya misava, u nga ha ringeta leswi:
◼“Un’wana ni un’wana loyi ndzi vulavuleke na yena wa karhateka hi vumundzuku. Varhangeri van’wana va misava va vona onge hi le kusuhi swinene ni nguva leyintshwa ya ku rhula. Xana u titwa njhani hi sweswo? [Yimela nhlamulo.] Ku nga khathariseki matshalatshala hinkwawo ya munhu, madzolonga ni maxangu swi hambeta swi andza emisaveni hinkwayo. Bibele yi paluxa ntlhantlho lowu nga wona ntsena wa swiphiqo leswi. [Hlaya 2 Petro 3:13. Pfula exifanisweni lexi nga eka tluka 302, kutani u hlamusela ndlela leyi Mfumo wa Xikwembu wu nga ta tisa ha yona ku rhula loku nga heriki ni nsirhelelo emisaveni leyi.] Buku leyi yi ta ku pfuna leswaku u vona ndlela leyi u nga vaka xiphemu xa vanhu va misava leyintshwa lava va nga ta tiphina hi vutomi lebyi nga heriki ehansi ka ku fuma ka Mfumo wa Xikwembu.”
5 Loko u kuma munhu loyi a khomekeke naswona u boheka ku komisa, u nga ha ku:
◼“Leswi u ngo va na xinkarhana ntsena, ndzi ta tsakela ku ku siyela xiphephana lexi [kumbe magazini] lowu nga ni xihloko lexi nge, [hlawula xiphephana kumbe xihloko lexi faneleke]. Ndzi ku kombela leswaku u xi hlaya. Nkarhi lowu taka loko ndzi vuya, ndzi ta tsakela ku tiva leswi u swi anakanyaka ha xona.”
6 Loko u fambisa tibuku, u nga kanakani ku boxa munyikelo lowu ringanyetiweke. Tibuku ta hina ta xaveka loko ti ringanisiwa ni leti xavisiwaka emavhengeleni. Loko vanhu va hakelela tibuku ta vona swi engetela ntsako lowu va nga ta wu kuma hi ku twisisa leswi vuprofeta lebyi hlamarisaka bya Nhlavutelo byi vulaka swona.—Swiv. 3:13.