Va Pfune Leswaku Va Twisisa
1 Muapostola Petro u pfumerile leswaku swilo swin’wana leswi tsariweke eBibeleni swa ‘nonon’hwa ku swi twisisa.’ (2 Pet. 3:16) Vo tala va titwe hi ndlela yoleyo mayelana ni buku ya Nhlavutelo. Hambiswiritano, leswi yi vulaka swona swi vekiwe erivaleni ebukwini leyi nge Nhlavutelo—Ku Chaputa Ka Yona Loku Hlamarisaka Ku Tshinele! Xana hi nga endla njhani leswaku lava tsakelaka va yi tirhisa hi ndlela leyinene?
2 Loko mi bule hi Nhlavutelo 1:3 eka riendzo ra wena ro sungula, mhaka leyi yi nga tlhela yi pfuxa ku tsakela:
◼“Enkarhini lowu hundzeke hi bule hi ndlela leyi ku twisisa buku ya Nhlavutelo ku nga tisaka ntsako ha yona. Hambiswiritano, ntsako wo tano a wo titela. Ku laveka swilo swimbirhi eka hina: Hi fanele hi dyondza Bibele, naswona hi fanele hi endla leswi hi swi dyondzaka.” Hlaya Yakobo 1:25 u tlhela u yi hlamusela. Pfula eka ndzimana 9 eka tluka 8, kutani u hlamusela ndlela leyi ku twisisa buku ya Nhlavutelo swi nga hi pfunaka ha yona ku dyondza ndlela leyi hi nga kumaka ntsako ha yona emisaveni leyintshwa ya paradeyisi.
3 Loko u bule hi Yohane 17:3 eka riendzo ra wena ro sungula, u nga ha kandziyisa xilaveko xo nghenisa vutivi lebyi engetelekeke bya Bibele hi ku vula leswi:
◼“Nkarhi lowu nga hundza loko ndzi ri kwala, hi hlaye eka Yohane 17:3 leswaku ku nghenisa vutivi bya mayelana ni Xikwembu swi nga hi yisa evuton’wini lebyi nga heriki. Kambe xana u nga swi tsakela ku hanya hi laha ku nga heriki emisaveni leyi hi hanyaka eka yona namuntlha? [Yimela nhlamulo.] Vo tala a va nge swi tsakeli. Hikwalaho ka xivangelo lexi, hi nga tsaka loko hi twa leswi Xikwembu xi swi tshembiseke.” Pfula eka ndzimana 6 eka tluka 303, hlaya Nhlavutelo 21:4, kutani u hlamusela leswi misava yi nga ta va xiswona loko “leswo sungula swi hundzile.” N’wi byele leswaku u ta tlhela u vuya mi ta yisa bulo emahlweni.
4 Loko u tirhise xifaniso lexi nga eka tluka 302 ku komba leswaku Mfumo wa Xikwembu wu ta herisa maxangu, u nga ha tlhela u pfula buku eka tluka rolero, kutani u ku:
◼“Hi bule hi mikateko leyi kombisiweke laha ya leswaku vanhu va ta tiphina ehansi ka Mfumo wa Xikwembu. Xana u anakanya leswaku i yini lexi hi faneleke ku xi endla loko hi lava ku hanya ehansi ka Mfumo wolowo? [Yimela nhlamulo.] Vanhu van’wana eminkarhini ya Bibele va veke xikombiso lexinene ngopfu lexi nga hi pfunaka loko hi xi tekelela.” Hlaya Mintirho 17:11, u kandziyisa xilaveko xo “kambisisa Matsalwa masiku hinkwawo.” Hlamusela leswaku Timbhoni ta Yehovha ti pfuna vanhu lavanene endhawini ya ka vona leswaku va dyondza Rito ra Xikwembu ni ku ri twisisa ku antswa.
5 Loko u siye xiphephana lexi nge “Xana Misava Leyi Yi Ta Pona?” ni n’wini wa muti loyi a a khomekile lerova a nga kota ku bula na wena, u nga ha tirhisa xingheniso lexi:
◼“Sweswinyana loko ndzi ku endzerile, a wu khomekile swinene. Ndzi ku siyele xiphephana lexi tlakusaka xivutiso xa mayelana ni ku pona ka misava eminkarhini leyi ya mpfilumpfilu. Hi hlaye Nhlavutelo 21:4, leyi tshahiweke ebukwini leyi nge, Nhlavutelo—Ku Chaputa Ka Yona Loku Hlamarisaka Ku Tshinele! [Yi hlaye eka ndzimana 6 eka tluka 303.] Xifaniso lexi [nga eka tluka 302] xi ku nyika xikombiso xa leswi ku nga ta va xiswona loko ‘Xikwembu xi sula mihloti hinkwayo emahlweni ya hina.’ Buku leyi yi na ntiyiso lowu khorwisaka wa leswaku xitshembiso lexi xi ta hetiseka ku nga ri khale. Loko u tsakela ku yi hlaya, hi leyi kopi ya wena hi munyikelo wa R10,50.”
6 Loko u kuma lava tsakelaka, eku heteleleni u ta lava ku yisa nyingiso eka buku leyi nge Vutivi Lebyi Yisaka eVuton’wini Lebyi Nga Heriki kutani u yi tirhisela ku sungula dyondzo. Entiyisweni u ta kuma ntsako lowukulu hi ku pfuna “la’v̌o riv̌ala e ku twisisa.”—Ps. 119:130.