Bokisi Ra Swivutiso

◼ Hi swihi swilo leswi hi fanelaka hi tivonela eka swona loko hi ri ni munhu wa rimbewu leri hambaneke evutirhelini bya hina?

Hi ni xivangelo xo pfumela leswaku vamakwerhu va xinuna ni va xisati va lava ku namarhela mpimanyeto lowu tlakukeke wa mahanyelo eka ndlela leyi vona vini va tikhomaka ha yona. Nilokoswiritano, hi hanya emisaveni leyi nga basangiki ni leyi tilawulaka leyi nga ni swipimelo switsongo swa mahanyelo. Hambiloko hi nga ha va hi ri ni swikongomelo leswinene, hi fanele hi tivonela nkarhi na nkarhi leswaku hi papalata ku sandziwa kumbe ku nghenelela eka swin’wana leswi nga fanelangiki. Leswi swi katsa ku tivonela loko hi ri evutirhelini.

Entirhweni wa nsimu hi tala ku hlangana ni vanhu va rimbewu leri hambaneke lava kombisaka ku tsakela ntiyiso loku humaka embilwini. Loko hi ri hexe eriendzweni ra hina, naswona ku nga ri na munhu un’wana ekaya, hi ntolovelo swi ta va kahle loko hi nyikela vumbhoni hi yime enyangweni ematshan’weni yo nghena endlwini. Loko munhu a kombisa ku tsakela, ku nga ha endliwa malunghiselelo yo tlhelela loko hi ri ni muhuweleri un’wana kumbe loko van’wana ekaya va ri kona na vona. Loko leswi swi nga koteki, ku ta va vutlhari ku rhumela muhuweleri wa rimbewu leri fanaka ni ra n’wini wa muti. Nakambe leswi swa tirha eku fambiseni ka tidyondzo ta Bibele ni munhu wa rimbewu leri hambaneke.—Mt. 10:16.

Hi fanele hi va ni vukheta loko hi hlawula munhu loyi hi nga ta tirha na yena evutirhelini. Hambileswi vahuweleri va rimbewu leri hambaneke va nga ha tirhaka swin’we minkarhi yin’wana, leswi swi nga endliwa kahle loko va tirha va ri ntlawa. Hi ntolovelo, hambiloko hi ri evutirhelini, a hi vutlhari ku heta nkarhi wo leha hi ri ni munhu wa rimbewu leri hambaneke loyi a nga riki munghana wa hina wa vukati. Hikwalaho, makwerhu la langutelaka lava yaka ensin’wini u fanele a va ni vukheta loko a ava vahuweleri, ku katsa ni vana va kondlo-a-ndzi-dyi, leswaku va tirha swin’we.

Hi ku tirhisa langutelo lerinene nkarhi na nkarhi, hi ta papalata ku veka “xikhunguvanyiso ni xin’we” eka hina vini kumbe eka van’wana.—2 Kor. 6:3.