I Swinene Swonghasi Ku Va Kona Minkarhi Hinkwayo!

¹ Vamakwerhu vo tala lava rhandzekaka, hi malembe-xikhume yo tala a va yirisiwile ku hlanganyela erivaleni le Yuropa Vuxa. Anakanya ntsako lowu va veke na wona loko ku yirisiwa ku herile ni ku tlhela va hlanganyela swin’we hi ku ntshunxeka!

² Malunghana ni ku endzela ka yena rin’wana ra mavandlha yo tano, mulanguteri wa xifundzha u tsarile: “Hi madyambu ya Ravumbirhi, loko riendzo ra mina ra ha ku sungula, fambiselo ro kufumerisa endzeni ka muako ri onhakile. Ehandle, xirhami a xi vuyisa ni n’wana evukatini, naswona endzeni, mahiselo a ma ri kwalomu ka 5° Celsius. Vamakwerhu a va tshamile va ambale majazi, swikhafu, swimandla-mandla, swihuku ni tibutsu. A ku ri hava la hlayaka Bibele, tanihi leswi a swi nga koteki ku yi pfula. Exitejini laha a ndzi yime kona ndzi ambale ni suti ya mina, a ndzi omile hi xirhami, naswona nkarhi na nkarhi loko ndzi vulavula, a ndzi vona ni moya lowu ndzi wu hefemulaka. Kambe lexi ndzi tsakiseke hileswi ndzi nga twangiki ni rito ni rin’we leri kombisaka ku vilela. Vamakwerhu hinkwavo va phofule ndlela leyi swi nga swinene ni ku tsakisa ha yona ku va kona eminhlanganweni!” Vamakwerhu volavo a va kalanga va tisola leswaku a va tela yini enhlanganweni wolowo!

³ Xana Hi Rona Langutelo Ra Hina? Xana ha ri tlangela lunghelo ra ku hlengeletana ka hina hi ku ntshunxeka eminhlanganweni ya hina ya vhiki na vhiki? Kumbe xana a hi yi tlangeli minhlangano loko swilo swi hi fambela kahle? Ku va kona eminhlanganweni nkarhi na nkarhi swi nga ha va swi nga olovi, naswona ku nga ha va ni minkarhi leyi eka yona hi vaka ni xivangelo xo twala lexi endlaka hi xwa. Kambe, u nga rivali leswaku ku ni van’wana exikarhi ka hina lava hambiloko va langutane ni ku dyuhala, swiphiqo leswikulu swa rihanyo, vugono, swiyimiso swa mintirho leyi tikaka ni vutihlamuleri byin’wana lebyikulu va wu vonaka nkoka wa minhlangano ni ku va kona minkarhi hinkwayo. Mawaku swikombiso leswinene leswi hi nga swi tekelelaka!—Ringanisa Luka 2:37.

⁴ A hi swi endleni mukhuva wa hina ku seketela vugandzeri bya ntiyiso hi ku va kona eminhlanganweni ya hina hinkwayo ya Vukreste, ku sukela eka ntlawa lowutsongo wa dyondzo ya buku ku fikela eka ntsombano lowukulu. Ha yini hi fanele hi swi teka swi ri swa nkoka swinene ku ya eminhlanganweni leyi? Hikuva hi lerisiwe hi Xikwembu leswaku hi hlangana ndhawu yin’we. Kambe ku ni swivangelo swin’wana swa nkoka. Hinkwerhu ka hina hi lava ku vuyeriwa hi ndzetelo wa Xikwembu ni ku pfuniwa hi moya lowo kwetsima, ku nga swona leswi kumekaka eminhlanganweni. (Mat. 18:20) Ha akiwa hi ku khutazana loko hi hlangana ni vamakwerhu.—Hev. 10:24, 25.

⁵ Exivonweni xa ku hundzuka, Petro u te, “Muleteri, i swinene leswaku hi va laha.” (Luka 9:33) Hi fanele hi titwa hi ndlela leyi fanaka malunghana ni minhlangano hinkwayo ya Vukreste. Kunene, i swinene leswaku hi va kona eminhlanganweni minkarhi hinkwayo!