Va Swi Lemuka Leswaku A Hi Fani Na Vona

¹ N’wexemu, vanhu lavantshwa lava tlulaka 300 000 va hi joyinile hi ku khuvuriwa. I yini leswi vanhu lava va swi voneke eka Timbhoni ta Yehovha leswi endleke leswaku va lava ku va xiphemu xa nhlengeletano ya Xikwembu? Ha yini hi hambane ngopfu ni vukhongeri lebyin’wana hinkwabyo? Hi leti tinhlamulo tin’wana leti nga lo dla, erivaleni:

—Hi namarhela eBibeleni ematshan’weni ya mavonelo ya munhu: Hi gandzela Yehovha Xikwembu “hi moya ni ntiyiso,” hilaha Yesu Kreste a vuleke leswaku hi endla hakona. Leswi swi vula ku ala mavunwa ya vukhongeri ivi hi fambisana ni Rito ra Xikwembu leri tsariweke.—Yoh. 4:23, 24; 2 Tim. 3:15-17.

—Hi ya evanhwini ematshan’weni yo rindzela vanhu leswaku va ta eka hina: Hi amukele xileriso xa Kreste xo chumayela ni ku dyondzisa, naswona hi tekelela xikombiso xakwe xo lava vanhu va timbilu letinene. Hi va lava emakaya ya vona, eswitaratini kumbe kun’wana ni kun’wana laha va nga kumekaka kona.—Mat. 9:35; 10:11; 28:19, 20; Mint. 10:42.

—Hi dyondzisa munhu un’wana ni un’wana Bibele mahala: Hi tirhisa leswi hi nga na swona ni matimba ya hina mahala, hi tirha tiawara leti tlulaka biliyoni lembe ni lembe entirhweni wa Xikwembu. Hi dyondza Bibele ni vanhu va tinxaka hinkwato, a hi hlawuli.—Mat. 10:8; Mint. 10:34, 35; Nhlav. 22:17.

—Hi leteriwe kahle ku pfuna vanhu hi tlhelo ra moya: Hi dyondzo ya munhu hi xiyexe ya Bibele ni ndzetelo lowu hi wu kumaka eminhlanganweni ya vandlha, etinhlengeletanweni ni le mintsombanweni, hi kuma dyondzo ya risima, leyi yaka emahlweni ya swa le tilweni, leyi endlaka leswaku hi voningela van’wana hi tlhelo ra moya.—Esa. 54:13; 2 Tim. 2:15; 1 Pet. 3:15.

—Hi languta ntiyiso wu ri wa nkoka, ha wu tirhisa evuton’wini bya hina bya siku ni siku: Hikwalaho ka leswi hi rhandzaka Xikwembu, hi endla mindzulamiso, hi pfumelelanisa vutomi bya hina ni ku rhandza ka xona. Vumunhu bya hina lebyintshwa lebyi fanaka ni bya Kreste byi kokela van’wana entiyisweni.—Kol. 3:9, 10; Yak. 1:22, 25; 1 Yoh. 5:3.

—Hi lwela ku hanya ni ku tirha ni vanhu van’wana hi ku rhula: Ku hlakulela timfanelo ta vukwembu ku hi pfuna ku xiya swiendlo swa hina ni marito ya hina. Hi ‘lava ku rhula ni ku ku landzelela’ ni vanhu hinkwavo.—1 Pet. 3:10, 11; Efe. 4:1-3.

² Swikombiso swa ndlela leyi Mukreste a hanyaka ha yona leswi vanhu va swi vonaka enhlengeletanweni ya Yehovha, swi susumetela vo tala leswaku va amukela ntiyiso. Onge xikombiso xa un’wana ni un’wana wa hina xi nga va ni vuyelo lebyi fanaka eka lava va hi tivaka ni lava va hi xiyaka.