Ku Twarisa Vito Ra Yehovha eMisaveni Hinkwayo

¹ Loko Yesu a lerisa vadyondzisiwa va yena leswaku va va timbhoni ta yena “ku fika exiphen’wini xa le kule swinene xa misava,” ana se a a va vekerile xikombiso lexinene leswaku va xi tekelela. (Mint. 1:8) Nkarhi wun’wana ni wun’wana, ni kun’wana ni kun’wana laha a a kuma vanhu kona, a a va byela hi xikongomelo xa Xikwembu mayelana ni vanhu. Hi ku tekelela Yesu, ntlawa wa hlonga ro tshembeka wu tirhisa tindlela to hambana-hambana leswaku wu endla vito ra Yehovha ri tiviwa “emisaveni hinkwayo.”—Esa. 12:4, 5.

² Leswi Tirhisiweke Tolweni Wa Masiku: Emalembeni lama hundzeke, marungula yo chumayela vanhu a ma hangalasiwa hi maphepha-hungu; ivi endzhaku ku humesiwa “Photo-Drama of Creation” leyi hlaleriweke hi vanhu va timiliyoni; ku tirhisiwe mimovha leyi nga ni xikurisa-marito; ku tlhela ku tirhisiwa ngopfu gramafoni naswona nkarhinyana wo leha ku tirhisiwe xiya-ni-moya—swilo leswi hinkwaswo a swi tirhiseriwa ku chumayela mahungu lamanene. Ina, nkarhi hinkwawo a ku kandziyisiwa ngopfu nkoka wa ku burisana ni vanhu hi ku kongoma leswaku hi pfuna lava tsakelaka. Hikwalaho, vutirheli bya yindlu ni yindlu i ndlela leyi humelelaka swinene ya ku twarisa vito ra Yehovha kun’wana ni kun’wana.—Mint. 5:42.

³ Leswi Tirhisiwaka Esikwini Ra Hina: Hikwalaho ka ku cinca ka minkarhi, vanhu va tshama va khomeke ngopfu, naswona etindhawini to tala a va tali ku kumeka emakaya. Vanhu lava hlayaka ni ku anakanyisisa hi swilo swa moya a va ha talanga. Hikwalaho, hi fanele hi endla vutirheli bya hina hi ku pfumelelana ni swiyimo. Mayelana ni ku hlanganisa nsimu ya hina nkarhi ni nkarhi hi ku endla vutirheli hi yindlu ni yindlu, hi khutaziwe ku ya laha ku nga ni vanhu ni leswaku ‘nkarhi hinkwawo hi lunghekela’ ku yimelela ntshembo lowu hi nga na wona. (1 Pet. 3:15) Leswi swi katsa ku endla matshalatshala ya ku chumayela vatirhi-kulorhi, swichudeni-kulorhi, vanhu lava nga eswitarateni, emintangeni kumbe etindhawini to paka swofamba, eswitolo kun’we ni le tindhawini tin’wana ni tin’wana leti hi nga kumaka vanhu eka tona. Hikwalaho ka leswi hi seketeriwaka hi Yehovha, matshalatshala ya hina ma tswala mihandzu leyinene. Xana wa ma endla matshalatshala ya ku ya kun’wana ni kun’wana laha ku nga ni vanhu?

⁴ Onge un’wana ni un’wana wa hina a nga tirha hi matimba leswaku hi twarisa vito ra Yehovha ensin’wini ya ka hina. Hi ta kuma ntsako lowukulu loko hi endla vutirheli bya hina hi xitalo, hi ri karhi hi tshemba leswaku Yehovha u ta pfuna vanhu va timbilu letinene.—Yoh. 6:44.