Lunghelo Leri Pfulekeleke Vana
1 Vo tala lava sweswi se va nga vatswari, hi ntsako va ha ri tsundzuka lunghelo leri va veke na rona ra ntirho wa Siku ra Timagazini—loko va ri karhi va kula entiyisweni. Ntirho wolowo wu sunguriwe emavandlheni hinkwawo hi 1949. Kan’we hi vhiki, un’wana ni un’wana a a fanele a nyikela nyingiso eku fambiseni ka Xihondzo xo Rindza ni Xalamuka! eswitarateni, hi yindlu ni yindlu, eswitolo ni hi tindlela tin’wana. Vahuweleri lava ha riki vana a va swi langutela hi mahlo-ngati ku hlanganyela entirhweni lowu, hikuva a wu va nyika nkarhi wa ku tirha swin’we ni vanhu lavakulu evandlheni. Xana na wena loko wa ha ri n’wana u hlanganyerile eka wona?
2 Katsa Vana Va Wena: Vana lava ha riki vatsongo ngopfu lava nga si swi lunghekelaka ku sungula bulo ra Matsalwa emitini na vona va nga fambisa timagazini. Swi lava leswaku va dyondza xingheniso xo olova xo koma. Nhlamuselo yo koma, kumbexana ya xifaniso lexi nga exifunengetweni, yi nga va yi enerile. Vini va miti vo tala va ti amukela hi ku olova timagazini loko ti fambisiwa hi vana, hakanyingi va tsakisiwa hi ku tiyimisela ni ndlela leyinene leyi vantshwa lava va tikhomaka hi yona. Loko va pfuniwanyana, vana va nga wu endla kahle ntirho lowu, ivi va hoxa xandla swinene eku hangalaseni ka rungula ra Mfumo. Ina, loko vana va ri karhi va kula, vatswari va vona va fanele va va pfuna leswaku va hambeta va endla nhluvuko eku kuriseni ka vutshila bya vona byo nyikela vumbhoni.
3 Manuel u sungule ku chumayela hi yindlu na yindlu loko a ri ni malembe manharhu hi vukhale. Vatswari va yena va n’wi dyondzise ku nhlokohata xingheniso xo koma. U chumayela swin’we na vona hi ku hiseka, u fambisa timagazini, tibroxara ni swiphephana swo tala. U tlhela a nyikela vumbhoni hi xitshuketa. Siku rin’wana loko vatswari va fambe na yena ephakeni leswaku a ya hungasa, hi yena la rhangeke a fambisela vanhu swiphephana. Hambileswi Manuel a ha riki ntsongo ngopfu, ku hisekela ka yena vutirheli i xihlovo xa xikhutazo xa xiviri eka vatswari va yena ni le ka vandlha hinkwaro.—Swiv. 22:6.
4 Mugqivela wun’wana ni wun’wana wu hlawuriwe ku va “Siku ra Timagazini” eka 2000 Calendar of Jehovah’s Witnesses. Vatswari, ha mi khutaza leswaku mi pfuxeta ku wu tsakela ka n’wina ntirho lowu, mi pfuna vana va n’wina leswaku va hlanganyela nkarhi na nkarhi hilaha va nga kotaka hakona eka lunghelo leri ra ntirho.