Vatswari—Letelani Vana Va N’wina Leswaku Va Chumayela
1 Mavandlha ya hina ma katekisiwe hi vana vo tala lava nga ni ku navela loku humaka embilwini ko tirhela Xikwembu. (Ekl. 12:1) Va le xikarhi ka lava Yehovha a va rhambeleke ku hlanganyela eku n’wi dzuniseni. (Ps. 148:12-14) Hikwalaho, ndzetelo wa siku na siku lowu vatswari va wu nyikaka vana va vona wu fanele wu katsa ku leteriwa ndlela yo avela van’wana ripfumelo ra vona entirhweni wo chumayela hi Mfumo.—Det. 6:6, 7.
2 Letelani Vana Hakatsongo-tsongo: Vana va fanele va leteriwa va ha ri vatsongo swinene leswaku va famba ni vatswari va vona evutirhelini. Mi nga si ya ensin’wini, endlani leswaku vana va n’wina va lunghekela ku hlanganyela hi ndlela leyi humelelaka. Hlelani ka ha ri ni nkarhi leswi mi languteleke leswaku va endla swona loko va fika emutini. Vana lavatsongo swinene va nga kombisa swiphephana ni ku rhambela vanhu eHolweni ya Mfumo. Vana lava hlayaka kahle va nga komberiwa ku hlaya matsalwa loko va ri ensin’wini. Va nga fambisa timagazini, va tirhisa xingheniso xo koma. Loko va ri karhi va kuma ntokoto, va leteleni leswaku va tirhisa Bibele eka swingheniso swa vona. Vahuweleri vo tala lavatsongo va sungule ntila wa vona vini wa timagazini ni ku endla maendzo yo vuyela nkarhi na nkarhi. I swa nkoka leswaku n’wana a tirha ni munhu lonkulu ematshan’weni yo tirha ni n’wana-kulobye. Munhu lonkulu a nga hlamusela n’wini wa muti leswaku n’wana loyi u le ku leteriweni evutirhelini.
3 Xinhwanyetana xin’wana xi kombele vakulu leswaku va xi pfuna ku fanelekela ku va muhuweleri wa Mfumo. Hambileswi a xi ri ni ntlhanu wa malembe hi vukhale enkarhini wolowo naswona xi nga swi koti ku hlaya, xi kote ku nyikela rungula ra Mfumo hi ndlela leyi humelelaka emakaya. Xi nhlokohate lomu ku kumekaka matsalwa yo karhi, xi ma pfula, kutani xi kombela n’wini wa muti leswaku a ma hlaya, ivi xona xi ma hlamusela.
4 Nakambe vana va fanele va dyondzisiwa hi xikombiso xa vatswari nkoka wa ku va ni xiyimiso lexinene xo hlanganyela evutirhelini. Vatswari va fanele va simeka tirhelo ra vhiki na vhiki leri nga cinciki ra nsimu ni ku namarhela eka rona, leswaku vana va tiva leswaku i siku rihi evhikini leri vekeriweke ntirho wo chumayela.
5 Loko vana va leteriwa ku sukela loko va ha ri vatsongo leswaku va rhandza vutirheli ni ku byi tsakela, va ta susumeteleka ku fanelekela malunghelo lamakulu enkarhini lowu taka, kumbexana ku katsa ni ntirho wa vuphayona. (1 Kor. 15:58) Hinkwerhu ka hina hi fanele hi khutaza vana lava nga exikarhi ka hina leswaku va endla nhluvuko lowunene tanihi vadzunisi va Yehovha.