Ku Hlayisa Tiholo Ta Hina Ta Mfumo

¹ Ku fana ni leswi Vaisrayele vo tshembeka a va khathalela tempele ya Yehovha leswaku yi tshama yi ri exiyin’weni lexinene, mavandlha ya vanhu va Yehovha namuntlha ma khathalela Tiholo ta Mfumo leswaku ti nga hlakali. (2 Tikr. 24:13) I ntiyiso leswaku ku tsandzeka ku hlayisa Holo ya Mfumo yi ri exiyin’weni lexinene ku nga vanga ku lahlekeriwa lokukulu ka timali, kambe nchumu wa nkoka swinene i ndlela leyi Holo ya Mfumo yi ri yimelaka ha yona vito ra Yehovha, vanhu vakwe ni rungula ra Mfumo. Hakanyingi vanhu lava taka ro sungula eminhlanganweni ya vandlha va fikelela xiboho xo karhi hi ku ya hi leswi va swi vonaka. Xana Holo ya n’wina ya Mfumo yi ta va byela yini?

² Mavandlha hinkwawo ma nyikiwe nkongomiso malunghana ni ku hlayisa kun’we ni ku lunghisa Tiholo ta Mfumo. Ku engetela kwalaho, nkarhi ni nkarhi Sosayiti yi tsalela tihuvo ta vakulu, yi hlamusela tindlela ta nkoka ta ku hlayisa tiholo ti ri exiyin’weni lexinene. Ina, ku ni swilo swin’wana leswi vakulu va faneleke va swi xalamukela minkarhi hinkwayo. Xana lwangu ri le ka xiyimo lexinene? Ku vuriwa yini hi tiphayiphi, swo titimerisa, swo kufumerisa ni gezi? Xana leswi hinkwaswo swi tirha kahle? Kan’we hi lembe, vakulu va fanele ku kambisisa swilo leswi hi vukheta. Ku languteka ka Holo ya Mfumo ku fanele ku khathaleriwa. Xana yi lava ku pendiwa hi vuntshwa ehandle kumbe endzeni? Xana ku ni leswi lavaka ku lunghisiwa? Xana switulu, mete ni makhetenisi swi languteka njhani? A swi nge bohi leswaku mi tshamela ku lunghisa swilo eholweni loko un’wana ni un’wana a papalata ku tshova swilo kumbe ku onha nhundzu. Xana rivala kumbe ndhawu yo paka mimovha yi lava ku antswisiwa? Loko ku byariwe byanyi kumbe swihlahla, swi lava ku khathaleriwa nkarhi ni nkarhi. Xana mali ya vandlha yi nga swi kota ku sasekisa holo endzeni leswaku yi koka mahlo? Hakanyingi ku nga endliwa swilo switsongo leswi nga durhiki kambe swi engetela vuxongi. Tsundzuka, ndhawu yo hlangana eka yona leyi baseke, leyi sasekisiweke kahle, leyi hlayisiwaka kahle hi yona leyi yisaka ku dzuneka eka Yehovha ni vanhu vakwe.

³ Swa tsakisa ku vona vana va ri kona eHolweni ya Mfumo. Va fanele va tshama ni vatswari va vona loko va ri karhi va kuma ndzetelo eRitweni ra Yehovha ni loko va dyondzisiwa ndlela ya ku va vagandzeri va Yehovha lava humelelaka. Ku va eHolweni ya Mfumo a swi fani ni ku va ekaya. Vatswari va ni vutihlamuleri bya ku veka vana va vona tihlo ni ku va lawula loko va ri eholweni. Ku gidela eswihambukelweni swi nga fanelanga kumbe ku tlanga-tlanga loko minhlangano yi nga si sungula ni loko yi herile swi fanele ku papalatiwa. Vana lava nga lawulekiki, loko va ‘tshikiwa va ntshunxekile’ va khomisa tingana. (Swiv. 29:15) Loko vakulu va vulavula na wena hi mhaka leyi, angula hi moya lowunene, hikuva va tsakela ku hlayisa Holo ya Mfumo yi ri exiyin’weni lexi nga ta endla leswaku yi byi yimela kahle vugandzeri lebyi tengeke bya Yehovha laha yi akiweke kona.

⁴ Malunghiselelo Ya Ku Basisa: Leswi Holo ya Mfumo yi tirhisiwaka ko hlayanyana vhiki ni vhiki, swa fanela leswaku yi basisiwa ni ku hlayisiwa. Xana wa ri tlangela lunghelo leri u nga na rona ra ku hoxa xandla leswaku yi tshama yi basile? Holo ya Mfumo yi fanele yi basisiwa hi ku landza xiyimiso xa nkarhi ni nkarhi, swi titshege hi ku tirhisiwa ka yona kun’we ni xiyimo xa yona. Hinkwerhu hi fanele hi hlanganyela, ku katsa ni vana. Hi ndlela leyi hinkwerhu hi ta dyondza ku byarha vutihlamuleri lebyi fambisanaka ni ku hlayisa Holo ya Mfumo, naswona hi ta yi tlangela swinene. Swi tsakisa swonghasi ku nghena eHolweni ya Mfumo leyi baseke ni ku rhambela vanhu lavantshwa eka holo yo tano! Hi ntolovelo ku basisa holo ku endliwa hi ku ya hi mintlawa ya tidyondzo ta buku. Vakulu (ni Komiti yo Hayisa Holo ya Mfumo loko holo yi tirhisiwa hi mavandlha yo hlayanyana) va nga ha endla nxaxamelo wa mintlawa leyi nga ta basisa vhiki rin’wana ni rin’wana, laha wun’wana ni wun’wana wu nga ta kongomisiwa hi mufambisi wa wona kumbe makwerhu un’wana la hlanganyelaka eka ntlawa wolowo. Nxaxamelo wa swilo leswi lavaka ku basisiwa wu nga ha vekiwa eka bodo ya switiviso. Switirhisiwa swi fanele swi tshama swi ri kona leswaku swi tirhisiwa loko ku basisiwa. Nandza wa vutirheli a nga ha averiwa leswaku a khathalela ku basisiwa ka Holo ya Mfumo, tanihi ku xava switirhisiwa ni ku xiya leswi lavaka ku lunghisiwa. Hinkwerhu hi fanele hi landzela xiyimiso lexi hi vukheta leswaku ntirho wa ku hlayisa holo wu ‘endliwa hi ku tenga ni hi ku hleleka.’ (1 Kor. 14:40) Ku engetela kwalaho, ku nga ha hlawuriwa siku ro karhi ro basisa holo hi vurhon’wana.

⁵ Loko Holo ya Mfumo yi tirhisiwa hi mavandlha mambirhi kumbe ku tlula, i swa nkoka swinene leswaku hi byarha vutihlamuleri bya hina emhakeni ya ku yi khathalela. Eka swiyimo swo tano, muako wu nga ha hlakala, kasi swiavelo swa hina swa ku basisa a hi swi kumi nkarhi ni nkarhi. Hi fanele hi fungha eka tikhalendara ta hina leswaku hi ta tsundzuka masiku lawa hi averiweke ku basisa ha wona. Vafambisi va dyondzo ya buku ni vapfuneti va vona va fanele va xalamukela ku tsundzuxa mintlawa ya vona ka ha ri ni nkarhi malunghana ni xiavelo xin’wana ni xin’wana xo basisa.—Vona buku leyi nge Vutirheli Bya Hina, tluka 61, ndzimana 3.

⁶ Hinkwerhu hi fanele ku seketela ntlawa wa hina loko wu averiwe ku basisa Holo ya Mfumo. Leswi swi endla leswaku ndzhwalo wa ku basisa wu nga rhwariwi hi vanhu vo karhi ntsena, naswona ntirho lowu lowunene ni xinakulobye lexinene swa hi vuyerisa. Kambe a swi vuli swona leswaku hi ta tshika ku basisa ku kondza ku fika nkarhi lowu hi averiweke wona ntsena. Munhu un’wana ni un’wana ni mindyangu yi nga pfuna eku basiseni ka holo endzhaku ka minhlangano. Loko hi vona phepha ehansi, hi fanela hi ri rhola; loko switulu swi nga tshamanga kahle, hi nga pfuna hi ku swi veka kahle. Swa tsakisa swonghasi ku vona ndhawu ya Yehovha ya vugandzeri yi vangama hikwalaho ka matshalatshala ya hina!

⁷ Nehemiya u lemuke nkoka wa ku ka hi nga ‘honisi yindlu ya Xikwembu xa hina.’ (Neh. 10:39; 13:11) Ha swi tiva leswaku Holo ya hina ya Mfumo, i xitiko xa vugandzeri bya ntiyiso endhawini ya ka hina, kutani hi fanele hi yi khathalela. Hi ku tikhoma ka hina ni hi ku seketela malunghiselelo ya ku basisa holo, onge hinkwerhu hi nga hambeta hi endla ndhawu ya Yehovha ya vugandzeri yi tshama yi xiximeka.

⁸ Chepisi a yi fanelanga yi namarhetiwa ehansi ka xitulu. Naswona ha swi tiva leswaku ku cukumeta chepisi kumbe swiwitsi ehenhla ka mete kumbe emathayilini, kumbe ku halata ntswamba wa n’wana ivi wu nga suriwi hi ku hatlisa, kumbe ku honisa ku sula milenge ya hina hi nga si nghena eholweni, swilo leswi hinkwaswo swi endla leswaku swi tika ku basisa fuloro ya holo. Makhumbi man’wana ni switulu swo karhi swi nga thyakisiwa kumbe swi onhaka hi ku olova. Futa ra nyenyetsa, naswona ku lunghisa leswi onhakeke hikwalaho ka rona, swi nga ha lava nkarhi wo tala ni timali to tala. Swi nga tlangeriwa loko un’wana ni un’wana a kombisa moya wa ku khathalela nhundzu.

⁹ Ku Nyikela Nyingiso Eku Sirheleleni Ka Holo Ya Mfumo: Hikwalaho ka minkarhi leyi ya mangava, hi fanele hi anakanyisisa kahle malunghana ni vuhlayiseki bya Holo ya Mfumo. Tanihi leswi hi nga kanakaniki ku teka magoza ya ku vona leswaku makaya ya hina ma hlayisekile ni ku sirheleleka, hi fanele hi endla tano hi Tiholo ta hina ta Mfumo. I vutihlamuleri bya vakulu ku vona leswaku Holo ya Mfumo yin’wana ni yin’wana yi sirheleriwile hi ndlela leyi faneleke. Leswi swi fanerile tanihi leswi hi twaka hi ta ku onheteriwa ni ku yiviwa ka nhundzu etiholweni ta tindhawu to hambana-hambana. I vutlharhi ku veka muchini wo fambisa mpfumawulo ebokisini ra nsimbi leri lotleriwaka. Loko makhetenisi ma yiviwa endhawini ya ka n’wina, mi nga ha ma siva hi lawa ma vuriwaka ti-blind kumbe hi ya muxaka wun’wana, naswona ku nga ha hiseleriwa tinsimbi ehandle ka mafasitere to sivela vatshovi va tindlu.

¹⁰ Nchumu wa nkoka malunghana ni nsirhelelo lowunene i ku tiyiseka leswaku timbati hinkwato ta pfariwa ni ku lotleriwa, tigede ni mafasitere swa pfariwa endzhaku ko tirhisa Holo ya Mfumo. Vamakwerhu lava tivaka ku byarha vutihlamuleri, lava tshembekaka, va fanele va khathalela timhaka to tano ta vuhlayiseki nkarhi ni nkarhi loko holo yi tirhisiwa. Hi vula ni loko holo yi tirhiseriwa swin’wana handle ka minhlangano ya vandlha, ku fana ni loko ku ri ni mucato kumbe loko ku basisiwa.

¹¹ Loko Holo ya Mfumo yi ri ni ndhawu yo paka mimovha, swi nga va swinene leswaku ndhawu yo tano yi tshama yi voningiwe kahle nivusiku. Leswi swi nga hunguta ku fayiwa ka mimovha kumbe ku sivela vamakwerhu leswaku va nga vaviseki loko va huma eholweni. Mavandlha man’wana ma kume leswaku swa pfuna ku va ni vamakwerhu lava cincanaka va ya ehandle ka holo hi nkarhi wa minhlangano, va rindza mimovha leyi pakiweke leswaku yi nga yiviwi ni ku fayiwa.

¹² Mavandlha man’wana ma vone swi ri swinene ku lotlela timbati hi nkarhi wa minhlangano. Loko swi vonaka swi boha ku endla tano, varindzi lava tshembekaka va fanele va va enyangweni nkarhi hinkwawo leswaku va vona lava nghenaka eholweni. Tihuvo ta vakulu ti fanele ti vona leswaku hi wahi magoza lama nga tekiwaka lama pfumelelanaka ni milawu ya ndhawu leyi yi faneleke yi landzeriwa etindhawini ta minhlangano ya mani na mani. Loko ku simekiwe lunghiselelo ro tano, vandlha ri fanele ri tivisiwa hi lunghiselelo leri ka ha ri ni nkarhi leswaku ri tiva leswaku timbati ta Holo ya Mfumo ti ta lotleriwa.

¹³ Hi lava leswaku vamakwerhu ni vanhu lava ha tsakelaka va titwa va sirhelelekile loko va ri eminhlanganweni eHolweni ya Mfumo naswona hi lava leswaku nhundzu yi nga onheteriwi kumbe ku yiviwa. Hikwalaho vakulu va vandlha rin’wana ni rin’wana va fanele va xiya swiyimo leswi nga tirhaka endhawini ya ka vona ivi va endla hi ku pfumelelana na swona leswaku va sirhelela nhundzu ni ku tiyiseka leswaku lava nga kona eminhlanganweni va hlayisekile.