Tsima Ra Ku Aka Tiholo Ta Mfumo
1 Hilaha swi kombisiweke hakona eka Xihondzo xo Rindza xa January 1, 2000, swa tsakisa ku vona leswaku Afrika Dzonga ri tlhele ri va ni ku andza ka vahuweleri hi tiphesente tinharhu. Hikwalaho ka ku andza loku, ku simekiwa mavandlha lama engetelekeke, leswi endlaka leswaku ku laveka Tiholo ta Mfumo leti engetelekeke lembe ni lembe. Emalembeni ya ntlhanu lama hundzeke, ku simekiwe mavandlha lamantshwa ya 155 eAfrika Dzonga, Botswana, Lesotho, Namibia na Swaziland, naswona ku akiwe tiholo ta 150. Kutani sweswi tiholo hinkwato leti nyiketeriweke ti le hansinyana ka 500. Hi ku ya hi nkambisiso lowu hi wu endleke, hi kume leswaku mavandlha ya kwalomu ka 300 ma ha lava tiholo. Hikwalaho hi lava ku hatlisisa tsima ra ku aka Tiholo ta Mfumo. Mavandlha yo tala, hambi ku ri mavandlha lamakulu, ma hlanganela emikhukhwini, etigaraji kumbe eswikolweni. Xana ti kona tindlela leti u nga pfunaka ha tona? Hi ba mandla hi vuyelela eka mavandlha lama pfunaka man’wana hi timali, hi ku ma lombisa kumbe hi ku ma xavela nhundzu yo aka ha yona.—2 Kor. 8:14.
2 Ha wu tlangela swinene moya wa ku tinyiketela lowu kombisiwaka hi swirho swa Tikomiti to Aka ta Swifundzha ta 20, mindyangu ya swona ni vatirhi van’wana va ku tirhandzela. Hambiswiritano, hikwalaho ka xilaveko lexikulu xa Tiholo ta Mfumo, ka ha laveka vatirhi lava engetelekeke. Loko u swi tsakela ku pfuna, kombela fomo leyi nge Kingdom Hall Construction Worker Questionnaire (S-82) eka matsalana wa vandlha ivi u tata tikopi timbirhi. Loko komiti ya ntirho yi sayinile, yi ta rhumela fomo leyi eka Komiti yo Aka ya Xifundzha ivi yi hlayisa kopi ya yona eka tifayele ta vandlha. Mulanguteri wa xifundzha u ta tiyiseka leswaku tifomo ti tshama ti ri ni rungula leri faneleke naswona u ta khutaza van’wana leswaku va endla swikombelo. Loko xiyimo xa wena xi ku pfumelela leswaku u pfuna eswifundzeni swin’wana laha ku nga ni xilaveko lexikulu, wa komberiwa leswaku u tsalela Sosayiti u yi nyika vuxokoxoko bya wena hinkwabyo.
3 Loko vandlha ri lava ku aka Holo ya rona ya Mfumo, kumbe loko ri lava ku pfuxeta leyi ri nga na yona, huvo ya vakulu yi fanele yi tihlanganisa ni Komiti yo Aka ya Xifundzha ya ndhawu ya ka n’wina. Nakambe, rhangani mi tihlanganisa ni Sosayiti mi nga si lomba mali eka nhlangano wo aka kumbe banki leyi lombisaka timali. Tsundzukani leswaku vandlha rin’wana ni rin’wana ri fanele ri va ni akhawunti ya rona ya le banki leyi mali ya yona yi nga ta tirhisiwa ku aka, ku pfuxeta ni ku hlayisa holo. (Vona papila leri nge Eka Tikomiti Hinkwato To Hlayisa Holo Ya Mfumo ra June 15, 1997.) Mali leyi nga eka akhawunti leyi na yona yi fanele yi kambisisiwa nkarhi ni nkarhi endzhaku ka tin’hweti tinharhu.
4 Hilaha tiholo to hambana-hambana ti kombisiweke hakona eka swifaniso leswi, Tikomiti to Aka ta Swifundzha ti ti ake hi ku ya hi swilaveko swa vandlha, hi ku ya hi mali leyi vandlha ri nga na yona ni hi ku ya hi xiyimo xa ndhawu. Hambiswiritano, hinkwato ti yisa ku dzuneka eka Yehovha. Loko hi ri karhi hi tsakisiwa hi mavandlha lama ‘andzaka hi nhlayo siku rin’wana ni rin’wana,’ a hi anakanyisiseni hi leswi un’wana ni un’wana wa hina a nga swi endlaka leswaku a pfuna mavandlha yo tala ma va ni Tiholo ta wona ta Mfumo.—Mint. 16:5.
[Swifaniso leswi nga eka tluka 4]
Bloemfontein South, Free State
[Xifaniso lexi nga eka tluka 4]
Chatsworth West, Kwa-Zulu Natal
[Xifaniso lexi nga eka tluka 4]
Khuma, North West
[Xifaniso lexi nga eka tluka 4]
Zoar, Western Cape
[Xifaniso lexi nga eka tluka 5]
Hillcrest, Kwa-Zulu Natal
[Xifaniso lexi nga eka tluka 5]
Fernie Central, Mpumalanga
[Xifaniso lexi nga eka tluka 5]
Robertson, Western Cape
[Xifaniso lexi nga eka tluka 5]
Worcester, Western Cape