Xiyimiso Xa Nhlangano Wa Ntirho

Vhiki Leri Sungulaka Hi July 10

Risimu 7

12 min: Switiviso swa vandlha. Switiviso leswi hlawuriweke eka Vutirheli Bya Hina Bya Mfumo. Bula hi xiviko xa ntirho wa nsimu xa April xa vandlha ra ka n’wina. Yisa nyingiso eka bokisi leri nge “Languta Tluka Ra Makumu,” kutani u endla nkombiso hi xin’wana xa swingheniso leswi ringanyetiweke lexi nga vaka ni vuyelo loko xi tirhisiwa ensin’wini ya ka n’wina. Mulanguteri wa ntirho u hlamusela malunghiselelo yo hetelela ya nsimu leyi nga aviwangiki—masiku lawa ku nga ta fambiwa ha wona, ndhawu leyi nga ta tirhiwa, byetlelo, malunghiselelo ya swo famba hi swona ni tibuku leti nga ta fambisiwa. Pfuxeta papila ra May 30, 2000.

15 min: “A Hi Nge Tshiki Ku Vulavula.” Xingheniso xa wena a xi ve ehansi ka minete ivi ku landzela bulo ra swivutiso ni tinhlamulo. Kandziyisa leswaku ha yini hi teka ntirho wa hina wa ku chumayela wu ri wa nkoka. Katsa ni tinhla leti fanelekaka leti humaka eka Xihondzo xo Rindza xa January 15, 1997, matluka 23-4.

18 min: “Swilo Hinkwaswo A Swi Endleriwe Ku Aka.” Vakulu vambirhi va bula hi xihloko lexi. Va hlaya ndzimana ha yin’we ni matsalwa lama tshahiweke. Va kandziyisa misinya ya milawu leyi katsekaka. Va kandziyisa xilaveko xa ku va ni vuxiyaxiya loko ku endliwa swilo leswi khumbaka bindzu kumbe vuvekisi. Pfuxetani ndzayo leyi nga eka Xihondzo xo Rindza xa March 15, 1997, matluka 18-19, 22.

Risimu 15 ni xikhongelo xo pfala.

Vhiki Leri Sungulaka Hi July 17

Risimu 23

15 min: Switiviso swa vandlha. Xiviko xa timali. Hi ku komisa, hlamusela ndlela leyi broxara leyi nge Vito Ra Xikwembu yi nga tirhisiwaka ha yona ku pfuna munhu la tsakelaka leswaku a twisisa xilaveko xa ku tiva ni ku tirhisa vito ra Xikwembu.—Vona buku leyi nge Ku Hlamulana, tluka 425.

10 min: “Nongonoko Lowuntshwa Wa Nhlengeletano Ya Xifundzha.” Swivutiso ni tinhlamulo. Tivisa siku ra nhlengeletano ya xifundzha leyi landzelaka naswona u khutaza hinkwavo leswaku va va kona masiku hamambirhi. Khutaza hinkwavo leswaku va endla matshalatshala yo hlawuleka ya ku rhamba swichudeni swa Bibele. Ku va kona ka swona enhlengeletanweni ku nga hatlisisa ku navela ka swona ku hambeta swi tihlanganisa ni vandlha.

20 min: I Mani Loyi U Faneleke U Tekelela Xikombiso Xakwe? Tatana u fambisa dyondzo ya ndyangu wakwe ni n’wana un’we kumbe vambirhi va kondlo-a-ndzi-dyi. U lemuke leswaku masiku lawa mabulo ya vona ma tala ku voyamela eka tinghwazi ta mintlangu, vanhu lava dumeke va tifilimi, va le ka TV ni swiyimbeleri. U phofula ku karhateka ka yena hikuva rirhandzu ro tano ri kombisa ku va ni moya wa misava. Va bula hi Xalamuka! ya June 8, 1998, matluka 12-14. Vantshwa lava va swi xiya leswaku ku ni khombo ku gandzela vanhu va misava naswona va pfumela leswaku ndhuma ya misava a yi va vuyerisi ha nchumu Vakreste. Va anakanya hi vuyelo bya ku teka vatswari, vakulu ni van’wana lava nga swikombiso leswinene evandlheni—ngopfu-ngopfu Yesu Kreste—tanihi xikombiso xa vona.

Risimu 34 ni xikhongelo xo pfala.

Vhiki Leri Sungulaka Hi July 24

Risimu 45

5 min: Switiviso swa vandlha.

15 min: Ku Tibumabumela Tanihi Vatirheli Va Xikwembu. Malandza mambirhi ya vutirheli ma bula hi xikhutazo xa Matsalwa lexi kumekaka eka Xihondzo xo Rindza xa December 15, 1998, matluka 19-20. Ma vona xilaveko xa ku faneleka kahle tanihi malandza ya vutirheli naswona ma pfuxeta leswi ma nga swi endlaka ku kombisa leswaku ma hetisisa swiavelo swa wona. Ma wu vona nkoka wa ku va swikombiso leswinene evutirhelini bya nsimu kutani ma bula hi tindlela leti ma nga vaka mpfuno ha tona eka vakulu hi ku pfuna van’wana hi ku kongoma. Ma pfumelelana leswaku ma lava ku endla hinkwaswo leswi ma nga swi kotaka ku pfuna vandlha ri twisisa xilaveko xa xihatla xa minkarhi leyi kutani ri kula ni ku humelela hi tlhelo ra moya.

10 min: Ku Tsalela Vanhu Lava Hi Nga Kotiki Ku Va Fikelela Mapapila. Nkulumo ni bulo ni vayingiseri. Leswi swi yaka swi tika ku kuma vanhu emakaya, vahuweleri van’wana va va ni vuyelo lebyinene hi ku tsala mapapila. Anakanya hi minkongomiso leyi. Mapapila ma fanele ma koma, ma sekeriwa eMatsalweni naswona ma kombisa ku xixima. U nga rhumeli papila leri nga tsariwangiki leswaku ri huma eka mani. Tsala kumbe u thayipa swi vonaka naswona swi hlayeka. Tsala adirese ya Holo ya Mfumo ni minkarhi ya minhlangano ya vandlha swin’we ni xirhambo xa leswaku munhu yoleyo a va kona. U nga tshuki u tirhisa adirese ya Sosayiti yo hlamula. Pfuxeta swiringanyeto leswi nga eka Buku Yo Letela Ya Xikolo, matluka 87-8 na Bokisi Ra Swivutiso ra Vutirheli Bya Hina Bya Mfumo bya November 1996.

15 min: Tirhisa Swingheniso Leswi Tirhaka. Hlawula swingheniso swimbirhi kumbe swinharhu eka leswi nga eka matluka 9-15 ya buku leyi nge Ku Hlamulana, kutani u hlamusela ndlela leyi swi nga tirhisiwaka ha yona hi ndlela leyi humelelaka ensin’wini ya ka n’wina. Vutisa vayingiseri u ku, “Hi swihi swingheniso leswi mi swi tirhisaka loko mi vulavula ni munhu exitarateni, loko mi nyikela vumbhoni hi xitshuketa kumbe hi tindlela tin’wana?” Endla nkombiso hi xingheniso xin’we kumbe swimbirhi loko nkarhi wu pfumela.

Risimu 54 ni xikhongelo xo pfala.

Vhiki Leri Sungulaka Hi July 31

Risimu 66

12 min: Switiviso swa vandlha. Tsundzuxa hinkwavo leswaku va siya swiviko swa ntirho wa vona wa le nsin’wini wa July. Marungula ya swa Mfumo. Kombela vayingiseri leswaku va rungula mintokoto leyi va veke na yona n’hweti leyi loko va fambisa tibroxara.

15 min: Swilaveko swa vandlha.

18 min: “Xana Wa Ku Tlangela Ku Lehisa Mbilu Ka Yehovha?” Swivutiso ni tinhlamulo. Katsa ni tinhlamuselo leti faneleke malunghana ni ku lehisa mbilu ka Yehovha.—Vona Insight, Vholumo 2, matluka 263-4.

Risimu 75 ni xikhongelo xo pfala.

Vhiki Leri Sungulaka Hi August 7

Risimu 88

10 min: Switiviso swa vandlha.

17 min: “Xana U Ni Tingana?” Swivutiso ni tinhlamulo. Hlamusela mintokoto leyi khutazaka, leyi nga eka Buku Ya Lembe Ya 1997 (ya Xinghezi), matluka 43-4.

18 min: Tlhariha Eka Vumundzuku Bya Wena. Nkulumo hi nkulu. Vantshwa va navela ku va ni vumundzuku lebyi tsakisaka ni lava va va rhandzaka. Hambileswi sweswo swi nga swa ntumbuluko, va fanele ku tirhisa ndzayo leyi humaka eka Xikwembu loko va lava ku humelela. (Swiv. 19:20) Ku kokiwa hi va rimbewu leri hambaneke ku ni matimba eka vantshwa. Loko mintlhaveko yoleyo yi nga lawuriwi, ku nga va ni vuyelo lebyi khomisaka tingana. Loko vana va kondlo-a-ndzi-dyi va sungula ku namarhelana swinene ni va rimbewu leri hambaneke, va hlakulela rirhandzu leri nga endlaka leswaku va hetelela va gangisanile, sweswo swi tlakusa swivutiso swo tala malunghana ni loko ku ri vutlhari ku endla tano. Pfuxeta xitsundzuxo lexi nga ebukwini leyi nge Swivutiso Leswi Vantshwa Va Swi Vutisaka, matluka 231-5. Kandziyisa tinhla-nkulu leti nga eka Xihondzo xo Rindza xa November 15, 1999, matluka 18-23, leti kombisaka nkoka wa ku va vantshwa va hetisisa vutihlamuleri hinkwabyo lebyi va nga na byona eka Xikwembu. Khutaza vana va kondlo-a-ndzi-dyi leswaku va anakanyisisa hi ndzayo leyi ni ku bula hi yona ni vatswari va vona loko ku ri ni leswi va nga swi twisisiki.

Risimu 101 ni xikhongelo xo pfala.