Kuma Matimba Hi Ku Titshega Hi Yehovha
1 Hi ni swivangelo swo tala swa ku titshega hi Yehovha. Ku chumayela mahungu lamanene “emisaveni hinkwayo leyi akiweke” i xiavelo lexi tlhontlhaka. (Mat. 24:14) Minkarhi hinkwayo hi lwisana ni ku nga hetiseki ka hina. (Rhom. 7:21-23) Tlhandlakambirhi, hi ‘dodombisana ni vafumi va misava va munyama lowu, ku nga swivumbiwa swa moya leswi hombolokeke.’ (Efe. 6:11, 12) Hakunene hi lava mpfuno. Xana hi nga ma kumisa ku yini matimba lama humaka eka Yehovha?
2 Hi Xikhongelo: Loko malandza ya Yehovha ma kombela moya wa yena wo kwetsima lowu nga ni matimba, u ma nyika hi xandla lexi pfulekeke. (Luka 11:13) Xana a wu titshembi loko swi ta eku chumayeleni hi yindlu na yindlu, exitarateni kumbe hi riqingho? Xana wa chava ku chumayela hi xitshuketa? Xana ku nga tsakeli ka vanhu va ka ndhawu ya ka n’wina ku hungute ku hiseka ka wena? Xana u endla njhani loko u sindzisiwa ku endla leswi lwisanaka ni ripfumelo kumbe vutshembeki bya wena? Titshege hi Yehovha. Kuma matimba hi ku khongela.—Filp. 4:13.
3 Hi Dyondzo Ya Wena N’wini: Ku fana ni leswi hi kumaka matimba hi ku dya swakudya swa nyama, ha tiyisiwa emoyeni hi ku hambeta hi tiwundla hi Rito ra Xikwembu ni hi minkandziyiso leyi humaka eka “hlonga ro tshembeka ni ro tlhariha.” (Mat. 4:4; 24:45) Loko Stanley Jones a vutisiwe leswaku i yini lexi n’wi tiyiseke nhlana loko a pfaleriwe malembe yo tala a ri yexe eChayina a nga ri na Bibele, u te: “Hi nga swi kota ku yima hi tiyile eripfumelweni. Kambe hi fanele ku rhanga hi ku dyondza. Loko hi nga dyondzi, a hi nge swi koti ku va ni xivindzi.”
4 Hi Ku Va Kona eMinhlanganweni: Yudasi na Silasi “va khutaze vamakwavo hi tinkulumo to tala va tlhela va va tiyisa,” eka nhlangano wun’wana wa Vukreste eka lembe-xidzana ro sungula. (Mint. 15:32) Hilaha ku fanaka ninamuntlha, leswi hi swi twaka eminhlanganweni swi endla leswaku hi n’wi nkhensa swinene Yehovha, swi aka ripfumelo ra hina ni ku hi susumetela ku chumayela. Minhlangano yi endla leswaku hi tshama hi ri karhi hi vonana ni “vatirhi-kulorhi emfun’weni wa Xikwembu,” lava va nga “mpfuno lowu tiyisaka” eka hina.—Kol. 4:11.
5 Ha wu lava mpfuno eka “minkarhi ya mangava leyi swi nonon’hwaka ku langutana na yona.” (2 Tim. 3:1) Malunghana ni lava va kumaka matimba eka Yehovha ha tiyisekisiwa: “Va ta tlakuka hi timpapa ku fana ni magama. Va ta tsutsuma va nga heli matimba; va ta famba va nga karhali.”—Esa. 40:31.