A Hi Akeni Tiholo Ta Hina Ta Mfumo Hi Tlhela Hi Ti Hlayisa
1 Mawaku ntsako lowu hi nga na wona ku tiva leswaku hi ni Tiholo ta Mfumo ta 600, leti tlakusaka vugandzeri lebyi tengeke etindhawini ta le dzongeni wa Afrika. Miako leyi ya languteka, ya tirhiseka naswona ya faneleka. Vamakwerhu va hlangana hi ntsako etindhawini leti ta vugandzeri, leti tivekaka hi vunakulobye lebyi khutazaka.—Hev. 10:24, 25.
2 Tiholo letintshwa ta 60 leti nyiketeriweke n’wexemu ti rhurhela vahuweleri va 3 539 ni vanhu van’wana vo tala lava tsakelaka. Ha va bumabumela hinkwavo lava hi tindlela to hambana-hambana va seketeleke ntirho lowu hi mbilu hinkwayo. Hambiswiritano, mavandlha lama tlulaka 300, lama nga ni vahuweleri va 19 472 ma ha lava tindhawu leti fanelekaka ta vugandzeri. Hikwalaho, leswaku nongonoko wa hina wo aka wu hatlisa swinene, ku vekiwe pakani yo aka tiholo letintshwa ta 100 nan’waka. Pakani leyi yi vonaka yi ta fikeleriwa loko hi anakanya leswaku sweswi ku karhi ku akiwa tiholo ta 84 naswona mavandlha man’wana ya 104 ma kume switandi. Leswi mavandlha yo tala ensin’wini ya hina ya le madorobeni ma nga ni Tiholo ta Mfumo, sweswi hi yise nyingiso eswidorobanini ni le makaya.
3 Nkarhi wun’wana ni wun’wana loko Holo ya Mfumo yi akiwa emugangeni wo karhi yi nyikela vumbhoni lebyinene. Loko ku akiwa holo leyi akiwaka hi xihatla entsindza wa tiko le Botswana, vanhu va swi tsakele swinene ku vona leswi nga ta endleka. Timbhoni leti humaka eJoni ti teke riendzo hi mahelo-vhiki, ti nyiketela hi vutshila ni mathulusi ya tona. Phepha-hungu leri vuriwaka Botswana Guardian ri endle xitiviso lexi nge: “A Ku Ve Ni Holo.” Muhaxi wa xiya-ni-moya u tlakuse swivutiso leswi khumbaka nawu malunghana ni ntirho lowu wo aka, hi ndlela yoleyo a tlhontlha ku tsakela loku engetelekeke. Hambiswiritano, valawuri a va nyike mpfumelelo wo aka naswona vanhu va le Gaborone va lave ku tiva leswi nga ta endleka emasikwini manharhu lama nga ta landzela. Endzhaku ka mahelo-vhiki, phepha-hungu leri vuriwaka The Midweek Sun ri vike leswaku holo leyi Timbhoni ti “tshembiseke leswaku yi ta akiwa ni ku lunghekela ku tirhisiwa, hakunene yi hetiwile.”
Xana Mi Lava Holo Ya Mfumo?
4 Vakulu va vandlha ra ka n’wina va fanele ku bula hi mhaka leyi ni mulanguteri wa xifundzha. Mulanguteri wa xifundzha u ta rhandza ku pfuxeta tinhla ta khume eka tluka 6 ra xiengetelo xa Vutirheli Bya Hina Bya Mfumo bya March 1994, kutani a vula leswi yena a swi xiyeke malunghana ni swilaveko swa vandlha ni leswi ri nga kotaka ku swi endla. U ta tlhela a mi nyika adirese ni nomboro ya riqingho ya mutshama-xitulu wa komiti ya xifundzha. Tikomiti to Aka ta Swifundzha ta 23 ti tamele minkongomiso leyi nga lo dlaa, erivaleni, leyi humaka erhavini naswona ntokoto ni nkongomiso wa vamakwerhu volavo wu ta pfuna mavandlha leswaku ma nga weli ekhombyeni loko ma xava ndhawu niloko ma kunguhata ku aka. Loko vandlha ri endla xiboho xa ku aka Holo ya rona ya Mfumo, swi ta va swinene loko ro hlawula komiti evandlheni rero.
5 Ku kuma xitandi xa Holo ya Mfumo leyi tsarisiweke ximfumo swi lava ku endla swilo hi ku hatlisa ni hi ku phikelela leswaku Holo ya Mfumo yi ta akiwa hi ku hatlisa. Tiyisekani leswaku mi kuma maphepha lama fanelekaka loko mi nyikiwa xitandi xexo. Xi fanele ku tsarisiwa hi vito ra vandlha, hi xikombiso Sebokeng Congregation of Jehovah’s Witnesses. Hi kombela mi tsundzuka leswaku mavandlha ma fanele ku tihlanganisa ni Komiti yo Aka ya Xifundzha ka ha ri ni nkarhi, xitandi xexo xi nga xi xaviwa. Leswi i swa nkoka hikuva xitandi lexi hlawuriweke xi ta yi khumba swinene ndlela leyi mali yi nga ta tirhisiwa ha yona ku aka Holo ya Mfumo. (Swiv. 15:22) Komiti ya xifundzha yi nga pfuna vandlha ku endla swiboho swa vutlhari malunghana ni pulani ya holo leyi nga akiwaka. Hi kombela leswaku mi nga yi emahlweni ni ku endla tipulani ta holo mi nga si rhanga hi ku vulavurisana ni Komiti yo Aka ya Xifundzha. Leswi swi ta pfuna ku papalata miako leyi durhaka ni swihoxo leswikulu eka pulani hi yoxe. Rhavi ri ni broxara leyi tameleke tipulani leti faneleke leti vakulu va nga hlawulaka eka tona. Nakambe rhavi ri fanele ku nyika mpfumelelo wa ku aka yindlu yo tshama eka yona eholweni loko hakunene ku ri ni xilaveko.
6 Loko mi aka Holo ya Mfumo, (ma)vandlha leri khumbekaka ri fanele ku hlamuseriwa hi ku kongoma hi mhaka ya ku seketela timali to aka. (Vona Memorandum T-36, Information Regarding Ownership of Kingdom Halls ya January 1, 2001.) Vakulu va fanele va endla nkambisiso evandlheni ku vona leswaku (1) i vungani leyi nga ta nyikeriwa ta ha suka ku pfuna ku xava xitandi ni ku ya emahlweni ni ku aka, nileswaku (2) i vungani leyi nga ta nyikeriwa n’hweti ni n’hweti ku hakela mali yihi ni yihi leyi lombiweke erhavini ni ku hakelela mali leyi vandlha ri nga ta yi tirhisa. Mavandlha man’wana lawa se ma nga ni Holo ya Mfumo ma tinyiketele ku pfuna lama ha kulaka loko ma aka Holo ya wona ya Mfumo. Leswi swi endliwa handle ko langutela ku vuyeriwa hi ndlela yo karhi. Mavandlha lama endlaka tano, ma lomba mali yitsongo erhavini leswaku ma seketela ntirho wa muako lowuntshwa. Leswi swi endla leswaku ku va ni moya lowunene exikarhi ka vanhu va Xikwembu.
7 Leswi ku akiwa ka Holo ya Mfumo ku lavaka mali yo tala, Komiti yo Aka ya Xifundzha ni vakulu va vandlha rero va fanele ku tiyiseka leswaku timali ti tirhisiwa hi ndlela leyinene. Ku fanele ku va ni tiakhawunti leti kongomeke naswona vandlha ri fanele ku tivisiwa kahle, n’hweti ni n’hweti hi ndlela leyi mali yi tirheke ha yona. Mulanguteri la ungamelaka u fanele ku tiyiseka leswaku mali yo aka ni timali tin’wana leti fambisanaka ni muako ta kambisisiwa endzhaku ka tin’hweti tinharhu hi n’hweti leyi ku kambisisiwaka timali ta vandlha ha yona. Swirho swa vandlha swi fanele ku nyika mpfumelelo hinkwawo wa muako endzhaku ko tivisiwa hi ku helela hi vuxokoxoko ni mali leyi ku ringanyetiwaka leswaku yi ta tirhisiwa. (Vona Vutirheli Bya Hina Bya Mfumo bya August 1984, tluka 2, [hi Xinghezi].) Laha swi kotekaka, mavandlha man’wana ma kombela Komiti yo Aka ya Xifundzha leswaku yi tamela timali ta wona hi ku kongoma. Loko muako se wu herile, timali hinkwato ti fanele ku kombisiwa hi ku kongoma leswaku ti tirhisiwe hi ndlela yihi. Timali ti fanele ku kambisisiwa kutani rungula ra kona ri siyiwa efayeleni ya vandlha ni kopi ya Matirhiselo ya Timali (Financial Summary) leyi rhumeriweke erhavini.—Filp. 4:5.
8 Vandlha rin’wana ra le makaya ri hete holo ya rona hambileswi mufundhisi un’wana la dumeke a a tiyimisele ku ri sivela. Endzhaku ko ringeta ko tala ku kuma xitandi, mhaka leyi yi kale yi fika ehubyeni ya ka majisitarata kutani vandlha ri nyikiwa xitandi xexo. Lexi a xi sele a ku ri ku kuma mali, hiloko vamakwerhu va endla xiboho xa ku xavisa tinguluve. Mali ya kona yi nghenisiwe ebankini ya Holo ya Mfumo kutani va kota ku sungula ku aka. Loko mali yi hela, makwerhu un’wana u xavise homu ni hanci. Endzhakunyana ka nkarhi ku xavisiwe tinyimpfu ta khume kutani ku tlhela ku xavisiwa homu, hanci ni tinyimpfu ta ntlhanu. Makwerhu un’wana wa xisati u vule leswaku u ta xava pende hinkwayo ya holo, un’wana a ku u ta xava mete kasi un’wana a ku u ta xava makhethenisi. Eku heteleleni ku xavisiwe homu yin’wana ni tinyimpfu ta ntlhanu leswaku ku xaviwa switulu. Mulanguteri wa xifundzha u vula leswaku vamakwerhu va tinyungubyisa hi holo ya vona. Yi kale yi hetiwa hi leswi Yehovha a katekiseke ku tinyiketela ka vona hi mbilu hinkwayo.
Ku Laveka Vatirhi Lava Engetelekeke Va Ku Tirhandzela
9 Tikomiti to Aka ta Swifundzha ti vika leswaku ka ha laveka vatirhi lava engetelekeke va ku tirhandzela. Lowu i ntirho wa nkoka wa ku seketela swilaveko swa Mfumo naswona valanguteri va swifundzha va wu nyike nyingiso wo hlawuleka. (1 Kor. 15:58) Loko u lava ku va mutirhi wa ku tirhandzela loko ku akiwa Holo ya Mfumo endhawini ya ka n’wina naswona u ri nandza wa vutirheli, nkulu, kumbe u ri Mukreste la nga xikombiso lexinene, la nga ni vutivi hi ntirho wo karhi, u nga kombela tifomo timbirhi ta (S-82) eka matsalana wa vandlha ra ka n’wina. Tifomo leti tatiweke ti fanele ku nyikiwa vakulu, kutani vona va ta tsala swibumabumelo swa vona ivi va ti rhumela eka Komiti yo Aka ya Xifundzha. Loko swiyimo swa wena swi ku pfumelela naswona u faneleka ku va mutirhi wa ku tirhandzela, u ta kuma mikateko yo tala hi ku vona ntsako wa vamakwenu loko Holo ya vona ya Mfumo se yi herile.
Ku Hlayisa Tindhawu Ta Hina Ta Vugandzeri Hi Ndlela Leyi Faneleke
10 A swi kanakanisi leswaku wa ma tsundzuka marito lawa ya muapostola Pawulo: “Xikwembu a hi Xikwembu xa mpfilumpfilu, kambe i xa ku rhula,” ni lama nge “Swilo hinkwaswo a swi endliwe hi ku tenga ni hi ku hleleka.” (1 Kor. 14:33, 40) Hikwalaho ka sweswo, Tiholo ta hina ta Mfumo ti fanele ku khathaleriwa leswaku minkarhi hinkwayo ti kombisa ku xiximeka ni xindzhuti. Vakulu ni malandza ya vutirheli va fanele ku hisekela ku veka xikombiso lexinene xo kombisa leswaku va yi xixima Holo ya Mfumo. Hi ntolovelo, ku ni vakulu vambirhi kumbe vanharhu kumbe malandza ya vutirheli, lava averiweke ku khathalela timhaka leti khumbaka ku hlayisiwa ka Holo ya Mfumo. Laha holo yi tirhisiwaka hi mavandlha yo hlayanyana, timhaka leti ti le mavokweni ya vakulu va komiti leyi khathalelaka ku tirhisiwa ka holo, kambe un’wana ni un’wana u fanele ku kombisa leswaku wa tinyungubyisa swinene ha yona. Hinkwavo va fanele ku tiva leswaku Holo ya Mfumo yi nyiketeriwe eka Yehovha.
11 Vakulu a va fanelanga va hlwela loko ku ri ni leswi lavaka ku lunghisiwa. (2 Tikr. 24:5, 13; 29:3; 34:8) Lembe ni lembe Holo ya Mfumo yi fanele ku kamberiwa leswaku loko ku ri ni leswi swi lavaka ku lunghisiwa swi namba swi yimeriwa hi milenge. Loko holo yi tshama yi ri karhi yi lunghisiwa ni ku hakeleriwa, mavandlha ma ta papalata timali to tala leti lavekaka leswaku yi pfuxetiwa, xisweswo ma papalata ni xilaveko xo lomba mali. Hikwalaho, vandlha ri fanele ku khutaziwa minkarhi hinkwayo leswaku ku tshama ku ri ni mali leyi ringaneke ya ku khathalela ndhawu ya rona ya vugandzeri. Timali ta mati ni gezi ti fanele ku hakeriwa hi ku hatlisa. Mavandlha man’wana ma salele endzhaku hi ku hakela timali leti kutani sweswo swi onha vanhu va Yehovha vito. Tihuvo ta vakulu ti fanele ku tiyiseka leswaku minyikelo ya Lunghiselelo Ra Ndzindza-khombo Wa Holo Ya Mfumo ya rhumeriwa lembe rin’wana ni rin’wana. I swa nkoka leswaku vandlha rin’wana ni rin’wana ri seketela lunghiselelo leri.
12 Holo ya Mfumo yin’wana ni yin’wana yi fanele yi va ni ndhawu yo hlayisa mimphakelo, mathulusi ni swo basisa hi swona, leyi tshamaka yi basile naswona yi languteka. Lava tamelaka tibuku ni timagazini va fanele ku tiyiseka leswaku mabokisi lama nga riki na nchumu ni tipulastiki leti a ti phutsele swo karhi swi nga thyakisi holo. (Hev. 13:7) Eka timiliyoni ta vanhu lava nga Timbhoni ta Yehovha, ku hava ndhawu leyi rhandzekaka swinene eka vona ku tlula ndhawu ya vugandzeri, ku nga Holo ya Mfumo. Va tsaka hi ku va ni Holo ya Mfumo naswona va hisekela ku yi khathalela. (Vona xiengetelo xa Vutirheli Bya Hina Bya Mfumo bya May 2000.)
Ntirho Lowu Ha Ha Langutaneke Na Wona
13 Ina, hinkwerhu hi ni xivangelo xa ku tsaka loko hi ri karhi hi hlangavetana ni swilaveko swa ntshovelo. Mawaku ntsako lowu hi nga na wona hi ku va ni vavanuna lava hlawuriweke, lava rhangelaka etimhakeni ta moya ni ta ku aka miako leyi lavekaka! Hi fanele ku va ni moya wa ku khomisana—hi tirhisana ni ku wu seketela hi ku helela ntirho lowu lavekaka. (Ps. 133:1) Pawulo u endle xikombelo eka Vafilipiya a ku: “Endlani ntsako wa mina wu tala hi ku va ni mianakanyo yin’we ni rirhandzu leri fanaka.”—Filp. 2:2.
14 Nkwama wa rhavi wa ku Akiwa ka Tiholo ta Mfumo wu hambeta wu pfuna hi ku lombisa timali to aka tiholo letintshwa. Mavandlha yo tala ni vanhu van’wana va hambeta va rhumela minyikelo enkwameni lowu kutani rirhandzu ni ku hanana ka n’wina swa tlangeriwa swinene. Nakambe, mavandlha yo tala ma bumabumeriwa hi ku tshembeka ku hakela n’hweti ni n’hweti, mali leyi ma yi lombeke ku aka Holo ya wona ya Mfumo, xisweswo ma kombisa leswaku ma wu tlangela mpfuno wolowo wa tintswalo. Hi ndlela yoleyo ma pfuna leswaku mali leyi faneleke ku tshama yi ri kona, yi kumeka loko yi laveka hikuva yi ta pfuna mavandlha man’wana yo tala lama ha lavaka tindhawu ta vugandzeri.
15 Ku nga khathariseki leswaku hi hlayisa holo ya hina, hi endla minyikelo leswaku ku ta akiwa Tiholo ta Mfumo letintshwa kumbe hi vatirhi va ku tirhandzela, hi yima hi tiyile na Mfumo naswona hi tirhela swilaveko swa wona hi vutshembeki. Mawaku lunghelo leri hi nga na rona ra ku tirha swin’we ni ku hlanganyela hi ntsako na Yesu Kreste entirhweni wa Yehovha!
[Xifaniso lexi nga eka tluka 5]
Rathanda, eGauteng
[Swifaniso leswi nga eka tluka 6, 7]
Morija, eLesotho
Otjiwarongo (ndlela leyi yi langutekaka ha yona endzeni, laha henhla), eNamibia
Grange Westgate, Kwazulu-Natal
Gaborone North (ndlela leyi yi langutekaka ha yona ehandle, laha henhla), eBotswana
Ntabamhlophe (ndlela leyi yi langutekaka ha yona ehandle, laha hansi), eSwaziland
Nseleni, Kwazulu-Natal