Switiviso
◼ Minkandziyiso leyi nga ta fambisiwa hi April na May: Timagazini ta Xihondzo xo Rindza na Xalamuka! Vahuweleri va fanele ku tivisa vini va miti leswaku va nga endla munyikelo entirhweni lowu endliwaka emisaveni hinkwayo loko va swi tsakela. Loko munhu loyi mi tlheleleke eka yena a kombisa ku tsakela, n’wi ngheniseni eka ntila wa timagazini. Fambisani broxara leyi nge Leswi Xi Swi Languteleke hi xikongomelo xo sungula tidyondzo ta Bibele. June: Broxara leyi nge I Yini Leswi Xikwembu Xi Swi Languteleke Eka Hina? kumbe buku leyi nge Vutivi Lebyi Yisaka eVuton’wini Lebyi Nga Heriki. Loko vini va muti va ri na yona minkandziyiso leyi, va fambiseleni broxara leyi faneleke, leyi vandlha ri nga na yona exitokweni. July: Ku nga fambisiwa yin’wana ni yin’wana ya tibroxara leti landzelaka leti nga ni matluka ya 32: Hulumendhe Leyi Nga Ta Tisa Paradeyisi, Ku Humelela Yini Hi Hina Loko Hi Fa?, Loko U Feriwa Hi Loyi U N’wi Rhandzaka, Tsakela Vutomi eMisaveni Hi Masiku!, Vito Ra Xikwembu Leri Nga Ta Tshama Hi Masiku, “Vonani, Ndzi Endla Swilo Hinkwaswo Swi Va Leswintshwa”!, Xana U Fanele Ku Pfumela Eka Vunharhu-un’we?, Xana Xikongomelo Xa Vutomi I Yini—U Nga Xi Kumisa Ku Yini? ni leyi nge Xana Xikwembu Xa Hi Khathalela Hakunene? Broxara leyi nge Buku Ya Vanhu Hinkwavo ni leyi nge Mimoya Ya Vafi—Xana Yi Nga Ku Pfuna Kumbe Yi Nga Ku Vavisa? Xana Yi Kona Hakunene? ti nga fambisiwa laha swi faneleke.
◼ I swa nkoka leswaku hofisi ya rhavi yi tshama yi ri ni tiadirese leti faneleke ni nomboro ta riqingho ta valanguteri hinkwavo lava ungamelaka ni vamatsalana. Loko ku tshuka ku va ni ku cinca ko karhi, Komiti ya Ntirho ya Vandlha yi fanele yi tata fomo leyi nge Presiding Overseer/Secretary Change of Address (S-29), yi yi sayina ivi yi hatlisa yi yi rhumela ehofisini ya rhavi. Sweswo swi fanele ku endliwa ni loko ku cinca khodi ya poso.
◼ Vamatsalana va vandlha va fanele ku tshama va ri ni tifomo leti eneleke ta Application for Regular Pioneer Service (S-205) ni ta Application for Auxiliary Pioneer Service (S-205b). Tona ti fanele ku odiwa hi ku tirhisa Literature Request Form (S-14). Tshamani mi ri ni tifomo leti nga tirhaka lembe hinkwaro. Kambisisani tifomo hinkwato ta maphayona ya nkarhi hinkwawo ku vona loko ti tatiwe kahle. Loko lava va endleke xikombelo xa vuphayona bya nkarhi hinkwawo va nga ha ri tsundzuki siku leri va khuvuriweke ha rona, va fanele va tsala siku leri va anakanyaka rona ivi va tiyiseka leswaku va nga ha ri rivali.
◼ Loko u titekela riendzo u ya etindhawini tin’wana laha u nga ta fika u lava ku ya eminhlanganweni, enhlengeletanweni kumbe entsombanweni wa muganga etikweni rimbe, swivutiso swa wena malunghana ni masiku, minkarhi ni tindhawu ta minhlangano yo tano swi fanele swi kongomisiwa ehofisini ya rhavi leri langutelaka ntirho wo chumayela etikweni rero. Tiadirese ta tihofisi ta rhavi ti xaxametiwe eka tluka ro hetelela ra Buku Ya Lembe ya sweswinyana.
◼ Mavandlha ma fanele ma sungula ku endla swikombelo swa tivholumo ta Xihondzo xo Rindza ni Xalamuka! ta 2001. Tivholumo leti ti kumeka hi Xijarimani, Xinghezi ni Xiputukezi. Loko tivholumo leti ti nga si kumeka, ku ta tsariwa “Pending” eka nxaxamelo wa leswi rhumeriweke evandlheni ra ka n’wina. Tivholumo ti wela ehansi ka swilo swa xikombelo xo hlawuleka.
◼ Ku sukela hi vhiki ra September 16, 2002, hi ta dyondza buku leyi nge Vuprofeta Bya Esaya I Rivoningo Eka Vanhu Hinkwavo II eka Dyondzo ya Buku ya Vandlha. Mavandlha ma komberiwa ku oda tibuku leti ka ha ri ni nkarhi.