Ntirho Lowu Lavaka Moya Wa Ku Titsongahata
1 Rito ra Xikwembu ri hi tsundzuxa leswaku hi ‘titsongahata emianakanyweni, hi nga tlheriseli swo biha hi swo biha kambe hi katekisa.’ (1 Pet. 3:8, 9) Ndzayo yoleyo ya tirha hakunene entirhweni wo chumayela. Kunene, vutirheli bya Vukreste byi nga lava leswaku hi tikombisa loko hi titsongahata hakunene.
2 Ku titsongahata i mfanelo leyi hi pfunaka ku tiyisela swiyimo leswi nga tsakisiki. Loko hi chumayela, hi vulavula ni vanhu lava hi nga va tiviki ni ku komberiwa hi nga komberiwanga, hi ri karhi hi tiva leswaku van’wana a va nge anguli hi ndlela leyinene. Leswaku hi hambeta hi chumayela vanhu vo tano swi lava ku titsongahata. Eka nsimu yin’wana leyi a yi nonon’hwa ngopfu, vamakwerhu vambirhi va xisati lava nga maphayona va hete malembe mambirhi va nga amukeriwi hi munhu loko va ri karhi va chumayela emitini ya kona siku na siku! Kambe va tiyiserile naswona namuntlha ku ni mavandlha mambirhi endhawini yoleyo.
3 Ndlela Yo Tamela Lava Nga Laviki Ku Twa Nchumu: Ku titsongahata swi ta hi pfuna ku tekelela Yesu loko van’wana va nga lavi ku hi yingisa. (1 Pet. 2:21-23) Emutini wun’wana makwerhu wa xisati u rhukaniwe ku vava hi nsati wa muti ku sungula ivi a tlhela a rhukaniwa hi nuna wa kona, a n’wi komba ndlela. Makwerhu loyi wa xisati u lo n’wayitela kutani a vula leswaku a nga tsakela ku tlhela a vulavula na vona enkarhini lowu taka. Sweswo swi wu khumbe ngopfu mpatswa lowu lerova wu anakanya ku yingisela Mbhoni leyi va endzeleke endzhaku, wu tlhela wu amukela xirhambo xo ya enhlanganweni wa vandlha eHolweni ya Mfumo. Makwerhu wa xisati loyi a hlongoriweke eku sunguleni u ye a ya wu xeweta a tlhela a ya emahlweni a wu chumayela. Na hina hi nga pfuna lava nga tsakeriki hi ku kombisa “moya wo rhula ni xichavo lexi enteke.”—1 Pet. 3:15; Swiv. 25:15.
4 Papalata Ku Tikurisa: Vutivi bya Bibele lebyi hi nga na byona a byi fanelanga byi hi nyika xivangelo xa ku langutela van’wana ehansi kumbe ku vulavula hi vona hi ndlela yo poyila. (Yoh. 7:49) Ematshan’weni ya sweswo, Rito ra Xikwembu ri hi tsundzuxa leswaku hi “nga vulavuli ku biha hambi ku ri hi mani.” (Tito 3:2) Loko hi titsongahata ku fana na Yesu, hi ta phyuphyisa van’wana. (Mat. 11:28, 29) Ku vulavurisana ni vanhu hi ku titsongahata swi endla leswaku va amukela rungula ra hina.
5 Ina, ku titsongahata swi hi pfuna ku tiyisela ensin’wini leyi nonon’hwaka. Swi nga olovisa timbilu ta lava nga tsakeriki, swi tlhela swi koka van’wana leswaku va amukela rungula ra Mfumo. Ku tlula kwalaho, swi tsakisa Yehovha, loyi a ‘nyikaka lava titsongahataka musa lowu nga faneriwiki.’—1 Pet. 5:5.