Ku Tlangela Tintswalo Ta Xikwembu
1 Loko a nga si va Mukreste, muapostola Pawulo a a lwisana swinene ni ku hangalasiwa ka Vukreste. Hambiswiritano, u kombisiwe tintswalo hikuva u endle sweswo hikwalaho ko pfumala vutivi. Yehovha u kombise Pawulo musa lowu nga faneriwiki hi ku n’wi nyika ntirho wa risima wo chumayela. U wu tlangerile swinene ntirho lowu. (Mint. 26:9-18; 1 Tim. 1:12-14) Ku tlangela tintswalo ta Yehovha ku susumetele Pawulo leswaku a tinyiketela eku hetisiseni ka ntirho wo chumayela.—2 Kor. 12:15.
2 Hikwalaho ka tintswalo ta Xikwembu, na hina hi nyikiwe ntirho wo chumayela. (2 Kor. 4:1) Ku fana na Pawulo, na hina hi nga kombisa leswaku ha ti tlangela tintswalo leti hi kombisiweke tona hi ku tikarhatela ku pfuna van’wana leswaku va endla nhluvuko hi tlhelo ra moya. Ndlela yin’wana yo endla leswi, i ku sungula ni ku fambisa tidyondzo ta Bibele.
3 Ku Sungula Tidyondzo Ta Bibele: Ndlela yo sungula tidyondzo ta Bibele i ku simeka ntila wa timagazini. Loko hi ri karhi hi endzela lava va nga eka ntila wa hina wa timagazini, hi ya hi tiva leswi swi va karhataka. Hi ku famba ka nkarhi, xihloko lexi nga eka yin’wana ya timagazini leti, xi nga tirhisiwa leswaku ku sunguriwa dyondzo ya Bibele hi broxara leyi nge Leswi Xi Swi Languteleke. Loko hi ri karhi hi endza, swi nga koteka leswaku hi ya emahlweni hi vulavurisana ni n’wini wa muti hi broxara leyi nge Leswi Xi Swi Languteleke loko hi n’wi tisela timagazini.
4 Xikhongelo Ni Matshalatshala: Ku khongela swin’we ni ku endla leswi nga ematimbeni ya hina swi ta antswisa vuswikoti bya hina entirhweni wo chumayela. Makwerhu wa xisati la nga phayona, loyi a a ri ni dyondzo yin’we ya Bibele u khongele eka Yehovha leswaku a n’wi ha tidyondzo ta Bibele leti engetelekeke. U tlhele a endla hi ku pfumelelana ni swikhongelo swakwe. U anakanyisise hi ndlela leyi a a tirha ha yona ensin’wini kutani a xiya leswaku a a nga vulavuli hi lunghiselelo ra dyondzo ya Bibele loko a endla maendzo yo vuyela. Kutani u sungule ku endla tano naswona hi ku hatlisa u kume tidyondzo tin’wana timbirhi.
5 Hakunene i lunghelo ku hlanganyela eku tiviseni ka “mahungu lamanene ya musa lowu nga faneriwiki wa Xikwembu”! (Mint. 20:24) Onge ku tlangela tintswalo ta Xikwembu ku nga hi susumetela ku hiseka loko hi pfuna van’wana leswaku va kuma musa lowu nga faneriwiki wa Yehovha.