Mpfuxeto Wa Xikolo Xa Vutirheli Bya Le Tilweni — Watchtower LAYIBURARI YA LE KA WEB SITE

Mpfuxeto Wa Xikolo Xa Vutirheli Bya Le Tilweni

Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi October 27, 2003. Mulanguteri wa xikolo u ta fambisa mpfuxeto wa timinete ta 30 lowu seketeriweke eka rungula ra tinkulumo leti nyikeriweke ku sukela eka vhiki ra September 1 ku ya eka October 27, 2003. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]

TINHLA TO TIRHELA EKA TONA

1. Xana ndzayo leyi nga eka 1 Timotiya 2:9 leyi nge ku tisasekisa hi “swiambalo leswi langutekaka” yi vula yini naswona yi nga ku khumba njhani ku languteka ka hina loko hi ri exitejini ni loko hi ri evutirhelini bya nsimu? [1, be-TS tl. 132 tindz 4-5] Nsinya lowu wa nawu wu tirha eka vavanuna ni vavasati naswona wu vula leswaku swiambalo swa hina swi fanele swi basa ni ku languteka. Ku tirhisa nsinya lowu wa nawu swi endla Mukreste a xiximeka swi tlhela swi endla leswaku nhlengeletano ya Yehovha yi xiximeka. Loko van’wana va vona “swiambalo [swa hina] leswi langutekaka,” va nga susumeteleka ku yingisela rungula leri hi ri chumayelaka.

2. Xana misinya ya milawu ya Bibele leyi kumekaka eka 1 Yohane 2:15-17, Vaefesa 2:2 na Varhoma 15:3 yi fanele yi yi khumba njhani ndlela leyi hi langutekaka ha yona? [2, be-TS tl. 133 tindz. 2-4] Ku twisisa leswi swi vuriwaka eka 1 Yohane 2:15-17 swi endla leswaku hi papalata ku ambala hi ndlela leyi kombisaka leswaku hi rhandza misava, leyi pfuxaka ku navela ka nyama, kumbe leyi kombisaka leswaku hi bombisa leswi hi nga na swona. Loko hi tirhisa ndzayo leyi nga eka Vaefesa 2:2, hi ta tiyiseka leswaku ku languteka ka hina ku hambanile ni moya wa misava wa ku xandzuka. Varhoma 15:3 yi vulavula hi xikombiso xa Yesu xo endla ku rhandza ka Yehovha ni ku pfuna van’wana. Xisweswo hi papalata switayele ni ku tisasekisa hi ndlela leyi nga khunguvanyisaka lava hi va chumayelaka.

3. Ha yini xivindzi xi ri xa nkoka, naswona hi nga xi kuma njhani xivindzi loko hi vulavula hi ri exitejini kumbe evutirhelini bya nsimu? [4, be-TS tl. 135 bokisi; tl. 136 ndz. 5, bokisi] Ku va ni xivindzi swi ta pfuna vayingiseri leswaku va yingisa leswi hi swi vulaka ematshan’weni yo yisa nyingiso eka hina. Hi nga kuma xivindzi hi ku tshemba Yehovha, hi ku lunghiselela kahle, ni ku titoloveta hi ku vulavulela ehenhla. (Ps. 55:22) Naswona hi nga hlakulela xivindzi hi ku tolovela ku ya ensin’wini, hi hlamula eminhlanganweni ni ku lunghekela ku nyikela tinkulumo ta lava nga ri ki kona eXikolweni xa Vutirheli bya le Tilweni.

4. Tanihi “mbhoni yo tshembeka ni ya ntiyiso,” xana Yesu u hi vekele xikombiso lexinene xo tirhisa Bibele ensin’wini hi ndlela yihi? (Nhlav. 3:14) [8, be-TS tl. 143 tindz. 2-3] Hakanyingi Yesu a a tshaha Matsalwa, a ma hlamusela kumbe a vulavula ha wona loko a dyondzisa van’wana. (Mat. 4:3-10; 12:1-8; Luka 10:25-28; 17:32; 24:27, 44-47) U vule a tiyisile leswaku leswi a a swi dyondzisa a swi nga suki eka yena. (Yoh. 8:26; 14:10) Na hina hi fanele hi titoloveta ku hlamula swivutiso hi ku tirhisa Bibele.

5. Xana hi nga byi kuma njhani vutshila lebyi engetelekeke byo tirhisa Bibele? (Tito 1:9) [9, be-TS tl. 144 ndz. 1, bokisi] Leswaku hi ‘khomelela swinene eritweni ro tshembeka malunghana ni vutshila bya hina byo dyondzisa’ hi fanele hi va ni xiyimiso lexinene xa munhu hi xiyexe xo hlaya ni ku dyondza Bibele. Hi fanele hi titoloveta ku nghenisa matsalwa loko hi nyikela tinhlamuselo eminhlanganweni. Loko hi vutisiwa swivutiso kumbe loko hi fanele ku endla swiboho, minkarhi hinkwayo hi fanele hi tivutisa leswaku Bibele yi ri yini hi xiyimo xa kona. Loko hi nga swi tivi leswaku Bibele yi ri yini emhakeni yo karhi, hi fanele hi tiyimisela ku endla ndzavisiso.

NKULUMO NO. 1

6. Xana ku dyondza swi katsa yini, naswona hi byihi vuyelo lebyinene lebyi vaka kona loko munhu a dyondza Rito ra Xikwembu nkarhi na nkarhi? [1 na 6, be-TS tl. 27 ndz. 3; tl. 32 ndz. 4] Ku dyondza swi katsa ku tirhisa matimba ya hina ya mianakanyo, hi kambisisa mhaka hi vukheta. Swi katsa ku hlahluvisisa leswi hi swi dyondzaka, hi swi pimanisa ni leswi ana se hi swi tivaka, hi xiya swivangelo leswi nyikeriwaka ku seketela mhaka ya kona ni ku anakanyisisa hi tinhla leti nga tintshwa eka hina. Ku dyondza Bibele nkarhi na nkarhi swi hi pfuna leswaku hi titsongahata minkarhi hinkwayo naswona swi endla leswaku Rito ra Xikwembu ri tshama ri ri karhi ri hanya etimbilwini ta hina, ri hi sirhelela eka matimba ya xidyoho. Xisweswo hi ta “famba hi mukhuva lowu fanelaka eka Yehovha leswaku [hi] n’wi tsakisa hi ku helela [hi] ri karhi [hi] veka mihandzu entirhweni wun’wana ni wun’wana lowunene.” (Kol. 1:10; 3:5-10; Det. 17:18-20; Hev. 2:1; 3:13)

7. Hi ku pfumelelana na Yakobo 1:5, 6, hi wihi nchumu wa nkoka lowu nga hi pfunaka loko hi lava ku endla xiboho xa nkoka? [4, w01-TS 9/1 tl. 28 ndz. 4] Xikhongelo i xa nkoka. Hi fanele hi kombela nkongomiso wa Yehovha, hi nga kanakani, leswaku a hi kongomisa hi endla xiboho lexinene. Hakanyingi, moya lowo kwetsima wu ta hi tsundzuxa misinya ya milawu ya Bibele leyi hi faneleke hi yi tirhisa, kumbe wu nga hi pfuna leswaku hi ri twisisa kahle tsalwa leri fambisanaka ni xiyimo xa hina.

8. Xana minkarhi ya nkoka i yini, naswona ha yini yi ri ya nkoka swonghasi? [5, si-TS tl. 282 ndz. 27] Nkarhi wa nkoka i siku kumbe nkarhi wo karhi ematin’wini lowu fambisanaka ni xiendlakalo xo karhi lexi rhekhodiweke eBibeleni naswona ku nga ni swivangelo leswi twalaka swa ku wu teka wu ri tano. Wu tirhisiwa tanihi mfungho wo vona nxaxamelo wa swiendlakalo swa Bibele eka khalendara.

9. Xana “loyi a nyikelaka xiviko xo biha” i xihunguki hi ndlela yihi? (Swiv. 10:18) [7, w01-TS 9/15 tl. 25 ndz. 3] Loko munhu a ri ni rihlevo ro biha, a nga cinci a va munhu un’wana hikwalaho ka leswi a nga mulumbeti. Vayingiseri lava nga ni vuxiyaxiya va ta ri vona rivengo leri n’wi endlaka a lumbeta van’wana naswona va ta sungula ku n’wi langutela ehansi mulumbeti loyi. Kutani loyi a haxaka mavunwa wo tivavisa yena n’wini.

10. Emisaveni leyintshwa, xana vanhu va ta sungula ku yi twisisa ku antswa ndlela leyi Yehovha a wu langutaka ha yona nkarhi hi ndlela yihi? [8, si-TS tl. 283 ndz. 32] Emisaveni leyintshwa, ku vabya, rifu, ku loloha, xivundza ni vuhava, swi ta va swi nga ha ri kona. Ntirho wu ta va lowu tsakisaka ni lowu rhandzekaka. Loko malembe-xidzana ma ri karhi ma hundza, vanhu lava nga emisaveni va ta sungula ku yi twisisa ku antswa ndlela leyi Yehovha a wu langutaka ha yona nkarhi: ‘Hikuva malembe ya 1000 ma fana ni siku ra tolo loko ri hundzile.’ (Ps. 90:4; Nhlav. 21:4)

KU HLAYA KA BIBELE KA VHIKI NI VHIKI

11. I Ntiyiso kumbe I Mavunwa: Eka 1 Vakorinto 2:9, muapostola Pawulo u vulavula hi swilo leswi Yehovha a swi lunghiseleleke vanhu va yena vo tshembeka leswaku swi va ndzhaka ya vona. Hlamusela. [1, ip-2-TS tl. 366 bokisi] I Mavunwa. Hilaha mongo wu kombisaka ha kona, Pawulo u tsala hi vutlhari bya Yehovha lebyi tumbetiweke, malunghana ni xikongomelo xa yena xo tisa ku rhula ni vun’we evuakweni hinkwabyo. (1 Kor. 2:7) Lava va nga tiviki nchumu hi timhaka ta moya a va nge byi twisisi vutlhari lebyi enteke, lebyi byi paluxiwaka eka vanhu lava nga ni moya wa Xikwembu ntsena. (1 Kor. 2:10)

12. Xana marito lama kumekaka eka 1 Vakorinto 10:13 ma tirha eka miringo yihi, naswona Yehovha u yi ‘pfurisa ku yini ndlela yo huma’ eka yona? [2, w91-TS 10/1 matl. 10-11 tindz. 11-14] Marito lawa lama huhuteriweke ma kombetela eka xiyimo xin’wana ni xin’wana lexi vanhu va langutanaka na xona, lexi xi nga endlaka munhu leswaku a nga tshembeki eka Xikwembu. (1 Kor. 10:6-11) Yehovha u pfula ndlela hi ku hi endlela malunghiselelo ya ku hi tiyisa hi tlhelo ra moya. Loko malunghiselelo lawa hi ma tirhisa, hi ta swi kota ku hlula miringo kutani hi tshama hi tshembekile ku kondza hi fa.

13. Xana xikombiso xa Yesu xa ku hanana xi va khumba njhani Vakreste? (2 Kor. 8:9) [4, w92-TS 1/15 tl. 16 ndz. 10] Hambileswi Yesu a a fuwile ematilweni, u tshike rifuwo rero hi ku swi rhandza kutani a ta a ta hanya tanihi munhu wa nyama la nga xisiwana leswaku vanhu lava nga ta amukela gandzelo rakwe ra nkutsulo va vuyeriwa. Leswi hi nga valandzeri va Yesu, hi fanele hi tinyiketela hina vini hi tlhela hi tirhisa ni swilo swa hina leswaku hi endla ku rhandza ka Yehovha ni ku pfuna van’wana leswaku va kuma vutomi.

14. Xana Nawu i “mukongomisi wa hina la yisaka eka Kreste” hi ndlela yihi? (Gal. 3:24) [5, w02-TS 6/1 tl. 15 ndz. 11] Esikwini ra Pawulo, mukongomisi a a ri nandza kumbe hlonga leri khathalelaka vana endyangwini lowukulu ni ku tlhela ri va heleketa exikolweni. Hilaha ku fanaka, hambileswi Nawu a wu endleriwe ku lemukisa Vaisrayele hi xidyoho lexi va nga na xona, a wu tlhela wu va sirhelela eka ku ti khoma ko biha ni le ka mikhuva yo biha ya vukhongeri bya mavunwa ni ku va kongomisa eka Mesiya, loyi a a ta va dyondzisa ndlela yo kuma vutomi. (Gal. 3:19)

15. I yini “swilo swa masungulo swa misava” leswi hi faneleke hi tivonela eka swona leswaku swi nga hi hambukisi? (Kol. 2:8) Leswi swi katsa vuxisi bya filosofi, vutlhari bya nyama ni vonelo ra misava leri fumaka vanhu lava nga riki Vakreste va ntiyiso. Swilo swo tano swi xungeta vumoya bya hina naswona swi thyakisa mianakanyo ya Vakreste va ntiyiso. [7, w94-TS 12/15 tl. 16 tindz. 12-13]