Marungula Ya Swa Mfumo

◼ Hi ve ni lembe rin’wana ra hlawuleka ra ku akiwa ka Tiholo ta Mfumo. Entiyisweni, swa khutaza swinene ku vona leswaku eka malembe manharhu lama hundzeke ku akiwe tiholo ta kwalomu ka 180. Ha yi tlangela swinene mikateko ya Yehovha leyi fuweke!

Xana u wu kombisile moya lowunene wa ku tirha hi ku tirhandzela hi ku hoxa xandla eku akiweni ka Holo ya Mfumo? Kutani a wu ta va u kume ntsako lowu tisiwaka hi ku nyika. (Mint. 20:35) Ku engetela eka vatirhi va ku tirhandzela va laha tikweni ra ka hina, vatirhi van’wana va ku tirhandzela vo aka Holo ya Mfumo a va huma entsungeni, va ta pfuneta. Hikwalaho ka mpfuno lowu, Komiti yin’wana Yo Aka Ya Xifundzha yi swi kotile ku aka Tiholo ta Mfumo ta 11 hi tin’hweti ta 9. Ku hiseka ko tano ku nyikela vumbhoni lebyinene evitweni ra Yehovha, ku va khumba swinene vanhu va ndhawu ku tlhela ku tsakisa hinkwerhu ka hina.

Muapostola Pawulo u tsarile: “Hi ku ringanisela, leswi mi seleke na swona sweswi swi pfala ku kayivela ka vona.” (2 Kor. 8:14) Ninamuntlha, ku ringanisela loku fanaka ku endla leswaku ku va ni mali leyi lavekaka yo aka Tiholo ta Mfumo. Mavandlha yo tala lama yimeke kahle a ma ri karhi ma pfuna mavandlha lamantsongo hi ku ma lombela mali yo aka Holo ya Mfumo. Ha yi tlangela minyikelo ya n’hweti ni n’hweti leyi rhumeriwaka eka Nkwama wo Aka Tiholo ta Mfumo swin’we ni mali leyi lombiweke leyi mavandlha ma yi hakelaka n’hweti ni n’hweti, hikuva hi yi tirhisela ku pfuna mavandlha lama lavaka ku aka Tiholo ta Mfumo.

Tiholo ta Mfumo ta 19 leti landzelaka ta ha ku nyikeriwa etin’hwetini leti hundzeke: Nkande, Ezakheni East, Incotshane na Klaarwater (KwaZulu-Natal); Amsterdam na Kwamhlanga (Mpumalanga); Mafikeng South, Cassel, Huhudi, Dryharts, Magogoe-Koikoi na Ikhutseng (North West); Club View na Namahadi (Free State); Ginsberg na Nonibe (Eastern Cape); Ncweng (Northern Cape); Boipatong (Gauteng) na Mantabeni (Swaziland).

Ha mi khutaza hinkwenu leswaku mi hambeta mi seketela Komiti Yo Aka Ya Xifundzha xa ka n’wina. Tiyisekani leswaku mi landzelela milawu ya vuhlayiseki loko mi ri eku tirheni. Hambileswi ku nga va ni timhangu tintsongo, Tikomiti To Aka Ta Xifundzha ta 25 ti ni rhekhodo leyinene yo tirha hi ndlela leyi hlayisekeke. Tikomiti tin’wana To Aka Ta Xifundzha ti kunguhata ku hatlisisa ntirho wa tona wo aka hi lembe ra ntirho lerintshwa leswaku ti ta kota ku pfuna mavandlha yo tala lamantsongo lama ha lavaka Tiholo ta Mfumo. Hikokwalaho ka ha ri ni xilaveko lexikulu xa vatirhi vo tala va ku tirhandzela. Xana u nga swi kota ku pfuna hi ndlela yo karhi? Onge matshalatshala ya n’wina ma nga hambeta ma seketeriwa hi moya lowo kwetsima hi ku ya hi ku rhandza ka Yehovha.—Hev. 2:4.