Vutlharhi Lebyi Humaka Eka Xikwembu I Bya Risima
1 Vanhu van’wana va anakanya leswaku Timbhoni ta Yehovha ti fanele ti tikarhatela ku pfuna ku hunguta swiphiqo leswi vanhu va nga na swona namuntlha. Vanhu vo tano va tsandzeka ku vona ntikelo wa ntirho lowu hi wu endlaka wa ku dyondzisa Bibele. Swi hi laha muapostola Pawulo a tsaleke ha kona: “Ku vulavula hi ta mhandzi ya nxaniso i vuphukuphuku eka lava lovaka, kambe eka hina lava hi ponisiwaka i matimba ya Xikwembu.” (1 Kor. 1:18) Hakunene, ha swi tiva leswaku ntirho wo chumayela wa Vukreste, hi wona ntirho wa nkoka swinene lowu endliwaka emisaveni namuntlha.
2 Vutomi Byo Antswa Sweswi: Matshalatshala lama endliwaka hi vanhu yo tlhantlha swiphiqo swa vanhu a ma na vuyelo lebyi nyawulaka. Milawu leyi arisaka vugevenga a yi ku hungutanga ku andza ka vugevenga. Mintwanano ya ku rhula ni mavuthu yo tisa ku rhula a swi yi herisanga nyimpi. Mintirho yo pfuna vanhu yi tsandzekile ku herisa vusweti. (Ps. 146:3, 4; Yer. 8:9) Ku hambana ni sweswo, rungula ra Mfumo ri hundzule vutomi bya vanhu va timiliyoni hi ku va pfuna leswaku va ambala vumunhu lebyintshwa lebyi amukelekaka eka Xikwembu. (Rhom. 12:2; Kol. 3:9, 10) Leswi swi endla leswaku va tsakela vutomi lebyi antswaka sweswi.—1 Tim. 4:8.
3 Vumundzuku Lebyi Tsakisaka: Vutlharhi lebyi humaka eka Xikwembu a byi hi pfuni ku langutana ni mintlhontlho ya vutomi bya sweswi ntsena kambe byi tlhela byi pfuna leswaku hi byi lunghiselela kahle vumundzuku bya hina. (Ps. 119:105) Byi hi endla hi vona vuhava bya ku ringeta ku lunghisa xiyimiso lexi xa swilo. (Ekl. 1:15; Rhom. 8:20) Ha tsaka swinene hi leswi hi nga hetiki vutomi bya hina hi ri karhi hi hlongorisa tipakani ta hava! Ematshan’weni ya sweswo, hi hisekela xitshembiso xa Yehovha xo tshembeka xa “matilo lamantshwa ni misava leyintshwa” laha ku nga ta va ni ku lulama. Loko siku ra Yehovha ra ku avanyisa ri fika, swi ta va erivaleni leswaku lava va titshegeke hi vutlhari bya Xikwembu va hlawule kahle.—2 Pet. 3:10-13; Ps. 37:34.
4 Hambileswi vutlhari bya Xikwembu byi nga ha vonakaka byi ri vuhunguki eka vanhu lava hisekelaka “vutlhari bya minkarhi leyi,” kambe entiyisweni hi yona ndlela leyi nga yona yo yi landzela. (1 Kor. 1:21; 2:6-8) Hi yona mhaka leyi hi hambetaka hi twarisa rungula leri humaka eka Xikwembu emisaveni hinkwayo, hikuva hi “xona ntsena xi tlhariheke.”—Rhom. 16:27.