Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi February 23, 2004. Mulanguteri wa xikolo u ta fambisa mpfuxeto wa timinete ta 30 lowu seketeriweke eka rungula ra tinkulumo leti nyikeriweke ku sukela eka vhiki ra January 5 ku ya eka February 23, 2004. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. Xana i yini lexi hi nga xi endlaka ku pfuna vayingiseri va hina ku vona ndlela leyi leswi hi swi vulaka eka nkulumo ya hina swi tirhaka ha yona? [2, be-TS tl. 158 tindz. 2-4] (1) Hi nga nyikela nkulumo hi ndlela leyi katsaka vayingiseri va hina ta ha suka. (2) Ndlela leyi nkulumo yi tirhaka ha yona yi fanele yi boxiwa nkarhi na nkarhi, a hi fanelanga hi yi boxa loko hi gimeta nkulumo ntsena. (3) Ndlela leyi nkulumo yi tirhaka ha yona yi fanele yi hlamuseriwa hi ndlela leyi nga ta pfuna leswaku vayingiseri va hina va “khutazana erirhandzwini ni le mintirhweni leyinene.”—Hev. 10:24.
2. Hikwalaho ka yini hi fanele hi hlawula marito ya hina hi vukheta? [4, be-TS tl. 160 ndz. 1 na bokisi ra vumbirhi] Marito ma ni matimba naswona ma nga tlhava kumbe ku khutaza. (Swiv. 12:18, 25) Tanihi leswi ku hlawula ka hina marito swi nga khumbaka ndlela leyi vanhu va titwaka ha yona hileswi hi swi vulaka, hi fanele hi xalamukela xilaveko xa ku lavisisa “marito lama tsakisaka.”—Ekl. 12:10.
3. Hi xihi xilaveko lexikulu xa ririmi lerinene lexi munhu a faneleke a xi fikelela lexi kandziyisiweke eka 1 Vakorinto 14:9, naswona xana hi nga xi tirhisa njhani eku dyondziseni ka hina? [5, be-TS tl. 161 tindz. 1-4] Vayingiseri va hina va fanele va twisisa ririmi ra hina hi ku olova. Marito yo olova lama hlawuriweke khwatsi, swiga swo koma ni marito yo kongoma swi ni matimba naswona swi hatla swi twisiseka. Loko hi tirhisa marito lama twisisekaka hi ku olova, hi kombisa leswaku ha va anakanyela vayingiseri va hina naswona hi endla leswaku swi va olovela ku tsundzuka leswi vuriweke.
4. Hi laha swi kombisiweke hakona eka Matewu 5:3-12 na Marka 10:17-21, hi wahi madyondziselo ya Yesu yo hlawuleka lama hi nga ma tekelelaka? [6, be-TS tl. 162 ndz. 4] Madyondziselo ya Yesu a ma olova. Hi nga tekelela Mudyondzisi Lonkulu hi ku vulavula khwatsi. Marito ya hina ma fanele ma veka mongo wa mhaka erivaleni ma nga wu tumbeti. Ku papalata ku tirhisa marito yo tala swi endla leswaku vanhu swi va olovela ku kuma vutivi lebyi kongomeke ni ku byi hlayisa.
5. Loko hi ri ensin’wini kumbe loko hi nyikela tinhlamulo eminhlanganweni ya vandlha, ha yini hi fanele hi tsakela ku tirhisa marito lama kombisaka nkhinkhi, ntlhaveko ni xiyimo xa mhaka? (Mat. 23:37, 38) [7, be-TS tl. 163 ndz. 3–tl. 164 ndz. 1] Marito lama hlamuselaka mhaka khwatsi ma nga endla leswaku vayingiseri va vona mhaka leyi hi yi vulaka hi mahlo ya mianakanyo, ni ku titwa hi ndlela leyi hi titwaka ha yona. Marito lama hlawuriweke kahle ma nga khumba timbilu, ma nyika ntshembo, ma tiyisa munhu la tshovekeke mbilu ni ku endla leswaku a rhandza Muvumbi.
NKULUMO NO. 1
6. I yini nhloko-mhaka ya nkulumo naswona ku tshama u ri karhi u yi tsundzuka swi nga ku pfuna njhani eku hleleni ni le ku hlawuleni ka rungula leri u nga ta ri tirhisa enkulumeni ya wena? [1, be-TS tl. 39 ndz. 6–tl. 40 ndz. 1] Nhloko-mhaka ya nkulumo i mhaka-nkulu kumbe yinhla yo karhi leyi ku nga ta vulavuriwa ha yona. Ku kambisisa marito-nkulu lama nga eka nhloko-mhaka ni ku endla ndzavisiso eminkandziyisweni hi ri karhi hi tsundzuka nhloko-mhaka, swi ta hi pfuna leswaku hi nga xi rivali xikongomelo xa hina loko hi ri karhi hi hlela rungula ra hina.
7. (a) Xana swi vula yini ku basa emoyeni naswona ha yini ku basa hi tlhelo ra moya ku fanele ku tekiwa ku ri ka nkoka swinene ku tlula ku basa kwihi na kwihi kun’wana? Ku basa emoyeni swi vula ku tshama evugandzerini bya ntiyiso ni ku tshama hi tihambanisile ni vugandzeri bya mavunwa, hi nga vi xiphemu xa byona naswona hi nga byi hlanganisi ni vugandzeri bya ntiyiso. Ntshembo wa hina wa vutomi lebyi nga heriki wu katsa ku tshama hi basile hi tlhelo ra moya. (2 Kor. 6:17; Nhlav. 18:4) (b) Xana Vakreste va nga swi papalata njhani ku rhandza mahanyelo lama thyakeke lama tolovelekeke emisaveni? [2, w-TS 02 2/1 matl. 5-6] Ku rhandza mahanyelo lama thyakeke swi nga vonaka hi ndlela leyi munhu a hlawulaka vuhungasi ni swiambalo ha yona. Vakreste va fanele va papalata vuhungasi lebyi kombisaka mahanyelo lama nga fambisaniki ni mahanyelo lawa khutaziwaka eBibeleni. Vakreste va fanele va papalata ku ambala swiambalo leswi kokelaka nyingiso lowu nga fanelangiki emirhini wa munhu, va ambala hi ndlela leyi xiximekaka.
8. Exikarhi ka misinya ya milawu hinkwayo leyi kumekaka eBibeleni xana hi yihi leyi nga ya nkoka swinene? [3, w-TS 02 2/15 tl. 5 tindz. 1, 4, 6] Misinya ya milawu ya nkoka leyi nga eMatsalweni hi leyi yi khumbaka vuxaka bya hina na Yehovha hi ku kongoma. Wun’wana wa mintiyiso ya nkoka leyi kumekaka eBibeleni hi leswaku Yehovha i Muvumbi, Xikwembu xa Matimba Hinkwawo ni La nge Henhla-henhla. (Ps. 83:18) Leswi swi fanele swi hi endla leswaku hi lava ku kongomisiwa hi yena evuton’wini bya hina.—1 Kor. 10:31.
9. Xana ntwela-vusiwana i yini, naswona Yesu u yi kombise njhani mfanelo leyi? [4, w02 4/15 tl. 25 tindz. 4-5] Ntwela-vusiwana wu katsa ku twa ku vava loku van’wana va ku twaka. Loko Yesu Kreste a hanyisa munhu la feke tindleve, u swi endlele exihundleni kumbexana leswaku a nga n’wi khomisi tingana kumbe ku n’wi chavisa. (Mar. 7:32-35) Loko a vona ndlela leyi noni a yi karhateke ha yona, leyi a yi ri enkosini wa n’wana wa yona wa jaha loyi a a ri yexe, Yesu u tirhise matimba yakwe hi ku pfumelelana ni ku rhandza ka Xikwembu kutani a pfuxa jaha leri. (Luka 7:11-16) Namuntlha, Yesu tanihi Muprista la Tlakukeke wa “hi tshandzisa eku tsaneni ka hina.”—Hev. 4:15.
10. Xana Swivuriso 11:11 yi tirha njhani emavandlheni ya vanhu va Yehovha? [7, w-TS 02 5/15 tl. 27 tindz. 1-3] Yehovha u katekisa mavandlha lama fanaka ni muti lama eka wona ku nga ni vanhu va moya, lava dzunisaka yena. Xisweswo, a hi fanelanga hi yingisa vaxopaxopi ni rihlevo lero biha, leswi vangaka ku onhaka kambe hi fanele hi ringeta ku hlakulela moya wo rhula ni ku tshembeka.
KU HLAYA KA BIBELE KA VHIKI NA VHIKI
11. I yini lexi yimeriwaka hi “murhi wa vutomi” lowu boxiweke eka Genesa 2:9? Murhi wu yimela xitiyisekiso xa Xikwembu xa vutomi lebyi nga heriki eka loyi a nga ta pfumeleriwa ku dya mihandzu ya wona. Xisweswo, endzhaku ka loko Adamu na Evha va dyohile, a swi fanela leswaku va hlongoriwa aEdeni ni ku va sivela leswaku va nga ha tlheli va nghena entangeni.—Gen. 3:22-24. [1, it-2 tl. 247 ndz. 4; w-TS 99 4/15 matl. 7-8]
12. Hikwalaho ka yini nsati wa Lota a file? (Gen. 19:26) [4, w-TS 90 4/15 tl. 18 ndz. 10] Swi le rivaleni leswaku a rhandza kaya ra yena ni swilo leswi vonakaka leswi a ri na swona eSodoma ku tlula Xikwembu.—Luka 17:31, 32.
13. Eka drama ya vuprofeta leyi nga eka Genesa ndzima 24, i mani la fanekiselaka (a) Abrahama, (b) Isaka, (c) Eliyezere nandza wa Abrahama, (d) tikamela ta khume na (e) Raveka? (a) Abrahama u fanekisela Yehovha; (b) Isaka u fanekisela Xinyimpfana xa Xikwembu, Kreste Yesu; (c) Eliyezere u fanekisela moya lowo kwetsima; (d) tikamela ta khume ti fanekisela Rito ra Xikwembu leri heleleke ni ku hetiseka; naswona (e) Raveka u fanekisela nsati wa Xinyimpfana, swirho swa ntlawa wa mutekiwa, leswi nhlayo ya swona ku nga 144 000. [5, w-TS 89 7/1 matl. 27-8]
14. Xana Xikwembu xi kunguhatele Yakobo na Esawu? (Gen. 25:23) Yehovha u kote ku vona xiyimo xa mahahlwa lawa ka ha ri emahlweni. U fanele a xiye leswi loko a vona ka ha ri emahlweni timfanelo leti un’wana ni un’wana wa vafana lava a va ta va na tona ivi a vula vuyelo bya kona. (Ps. 139:16) Kambe laha ku hava lexi kombisaka leswaku u kunguhate vumundzuku bya vona kumbe leswaku u kunguhate ndlela leyi xiendlakalo xin’wana ni xin’wana a xi ta endleka ha yona evuton’wini bya vona. [6, rs-TS tl. 77 ndz. 1]
15. Xana Rahele u ve xikombiso lexinene hi ndlela yihi emhakeni yo endla matshalatshala lamakulu lama katekisiweke hi Yehovha? (Gen. 30:1-8) [7, w-TS 02 8/1 matl. 29-30] Rahele a a yi tlangela ndzhaka ya yena. A a xi tiva kahle xitshembiso xa Yehovha xa leswaku u ta katekisa Yakobe. Makwavo wakwe Leya, ku nga nsati wo sungula wa Yakobe, u katekisiwe hi majaha ya mune loko Rahele yena a ha ri mhika. (Gen. 29:31-35) Ematshan’weni yo titshandza, u hambete a khongela eka Yehovha kutani a teka magoza lama faneleke lama pfumelelanaka ni ku rhandza ka Xikwembu swin’we ni swikhongelo swakwe.