Hi Nga Swi Endla Leswi Yehovha A Swi Kombelaka
1. Hi yihi mintlhaveko leyi hi nga bohekaka ku langutana na yona minkarhi yin’wana naswona ha yini?
1 Ku hanya hi ku pfumelelana ni milawu ya Yehovha ni misinya ya milawu yakwe i ndlela yo antswa yo yi landzela namuntlha, naswona swi hi pfuna leswaku hi tivekela xisekelo xa vumundzuku lebyi nga heriki. (Ps. 19:7-11; 1 Tim. 6:19) Kambe, misava ya Sathana yi endla swilo swi hi tikela. Nyama ya hina leyi nga hetisekangiki na yona a yi hi tshiki. Minkarhi yin’wana hi nga titwa hi hela matimba loko hi ri karhi hi ringeta ku hetisisa vutihlamuleri bya hina bya Matsalwa. (Ps. 40:12; 55:1-8) Hi nga ha kanakana leswaku hi nga swi kota ku endla hinkwaswo leswi Yehovha a kombelaka leswaku hi swi endla. Loko hi titwa hi ndlela yoleyo, i yini lexi nga hi pfunaka leswaku hi languta swilo hi ndlela ya moya?
2. Xana Yehovha u ringanisela hi ndlela yihi eka leswi a swi languteleke eka hina?
2 Milawu Ya Yehovha A Yi Tiki: Yehovha a nge pfuki a kombele swilo leswi swi nga riki ematimbeni ya hina. Milawu ya yena a yi tiki kambe i ya ku pfuna hina. (Det. 10:12, 13; 1 Yoh. 5:3) Wa swi tiva leswaku hi tsanile, “wa tsundzuka leswaku hi ntshuri.” (Ps. 103:13, 14) Hi tintswalo ta xona Xikwembu xi amukela leswi hi xi endlelaka swona, hambiloko swiyimo swa hina swi hi kavanyeta. (Lev. 5:7, 11; Mar. 14:8) Xa hi rhamba leswaku hi hoxa mindzhwalo ya hina eka xona, naswona xa hi tiyisekisa leswaku xi ta endla leswaku hi tshama hi tshembekile.—Ps. 55:22; 1 Kor. 10:13.
3. Xana Yehovha u hi pfuna njhani leswaku hi tiyisela?
3 Xilaveko Xa Ku Tiyisela: Timhaka ta le Bibeleni ta vanhu lava hlayiseke vutshembeki vo fana na Eliya, Yeremiya na Pawulo, ti kombisa leswaku swa laveka ku tiyisela. (Hev. 10:36) Yehovha u va tiyisile eminkarhini yo tika ni loko va hele matimba. (1 Tih. 19:14-18; Yer. 20:7-11; 2 Kor. 1:8-11) Naswona ku tshembeka ka vamakwerhu eminkarhini ya hina ka hi khutaza swinene. (1 Pet. 5:9) Ku anakanyisisa hi swikombiso leswi swi nga hi pfuna leswaku hi nga heli matimba.
4. Ha yini swi ri swa nkoka ku tshama hi ri karhi hi tsundzuka switshembiso swa Xikwembu?
4 Ku langutela switshembiso swa Xikwembu i “nsoma wa moya-xiviri.” (Hev. 6:19) Ku susumetele Abrahama na Sara leswaku va amukela xikombelo xa Yehovha xa leswaku va siya kaya ra vona kutani va ya ‘tshama tanihi valuveri etikweni ra xitshembiso.’ Ku nyike Muxe matimba yo seketela vugandzeri bya ntiyiso hi xivindzi. Ku tiyise Yesu leswaku a tiyiselela mhandzi ya nxaniso. (Hev. 11:8-10, 13, 24-26; 12:2, 3) Na hina loko hi tshama hi ri karhi hi langutele swinene switshembiso swa Xikwembu swa misava leyintshwa ya ku lulama, hi ta swi kota ku tshama hi tiyile.—2 Pet. 3:11-13.
5. Swi nga hi khutaza njhani ku anakanya hi swiendlo swa hina swo kombisa ku tshembeka swa nkarhi lowu hundzeke?
5 Ku tsundzuka swiendlo swa hina swo kombisa ku tshembeka, ku tinyiketela ni xivindzi enkarhini lowu hundzeke, naswona swi nga hi nyika matimba yo ya emahlweni ni ntirho. (Hev. 10:32-34) Swi hi tsundzuxa ntsako lowu hi wu kumaka loko hi nyika Yehovha leswi a swi kombelaka eka hina—ku nga ku tinyiketela eka yena hi moya-xiviri hinkwawo.—Mat. 22:37.