Ku Chumayela Ku Hi Pfuna Leswaku Hi Tiyisela
1 Rito ra Xikwembu ri hi khutaza ku “[tsutsuma] hi ku tiyisela eka mphikizano lowu vekiweke emahlweni ka hina.” (Hev. 12:1) Tanihi leswi xitsutsumi xi faneleke xi tiyisela leswaku xi ta kota ku wina, na hina hi fanele hi tiyisela leswaku hi ta kuma hakelo ya vutomi lebyi nga heriki. (Hev. 10:36) Xana vutirheli bya Vukreste byi nga hi pfuna njhani leswaku hi tiyisela hi ku tshembeka ku ya fika emakumu?—Mat. 24:13.
2 Ku Tiyisiwa Hi Tlhelo Ra Moya: Leswi hi twarisaka xitshembiso lexi hlamarisaka xa misava leyintshwa yo lulama lexi nga eBibeleni swi hi pfuna leswaku hi tshama hi ri ni ntshembo. (1 Tes. 5:8) Loko hi ya ensin’wini minkarhi hinkwayo, hi va ni lunghelo ro twarisa ntiyiso lowu hi wu dyondzeke eBibeleni. Hi va ni lunghelo ro lwela ripfumelo ra hina, naswona swa hi tiyisa emoyeni.
3 Leswaku hi dyondzisa van’wana hi ndlela leyi humelelaka, hina hi hexe hi fanele hi wu twisisa kahle ntiyiso wa Bibele. Hi fanele hi endla ndzavisiso, hi tlhela hi anakanyisisa hi mhaka leyi hi yi hlayeke. Matshalatshala lawa hi ma endlaka ma engetela vutivi bya hina, ma tiyisa ripfumelo ra hina naswona ma hi phyuphyisa hi tlhelo ra moya. (Swiv. 2:3-5) Xisweswo loko hi ri karhi hi ringeta ku pfuna van’wana na hina vini ha titiyisa.—1 Tim. 4:15, 16.
4 Ku hisekela nsimu i swa nkoka swinene hikuva i man’wana ya “mahavelo hinkwawo lama humaka eka Xikwembu,” lawa hi faneleke hi va na wona leswaku hi kota ku yima hi tiyile eku lwisaneni na Diyavulosi ni madimona yakwe. (Efe. 6:10-13, 15) Ku va hi tshama hi khomekile entirhweni wo kwetsima swi hi pfuna ku anakanyisisa hi swilo leswi akaka ni ku papalata ku onhiwa hi misava ya Sathana. (Kol. 3:2) Loko hi ri karhi hi dyondzisa van’wana tindlela ta Yehovha, nkarhi na nkarhi hi tsundzuxiwa ku hambeta hi tikhoma hi ndlela leyinene.—1 Pet. 2:12.
5 Xikwembu Xi Hi Nyika Matimba: Xo hetelela, ku hlanganyela ka hina entirhweni wo chumayela swi hi dyondzisa ku titshega hi Yehovha. (2 Kor. 4:1, 7) Hakunene yoleyo i mhaka leyinene! Sweswo a swi nge hi hlomiseli ntsena leswaku hi hetisisa vutirheli bya hina kambe swi ta tlhela swi hi endla hi kota ku langutana ni swiyimo swin’wana ni swin’wana leswi hi nga hlangavetanaka na swona evuton’wini. (Filp. 4:11-13) Hakunene, ku dyondza ku titshega hi Yehovha hi ku helela i mhaka ya nkoka leswaku hi kota ku tiyisela. (Ps. 55:22) Ku chumayela ku hi pfuna leswaku hi tiyisela hi tindlela to tala.