Swiringanyeto Swo Fambisa Broxara Leyi Nge Xana Xikwembu Xa Hi Khathalela Hakunene?
Endzhaku ko boxa ta mahungu lama tsemaka nhlana, u nga ha ku:
“Xana u tshama u tivutisa leswaku ha yini Xikwembu xi tshika vanhu va xaniseka, loko hakunene xi khathala hi vona? [Yimela nhlamulo.] Broxara leyi yi hlamula xivutiso lexi, hi ndlela leyi khumbaka mbilu, naswona yi tlhela yi komba leswi Xikwembu xi nga ta swi endla ku nga ri khale. [N’wi kombe swifaniso leswi nga eka tluka 27, kutani u hlaya Pisalema 145:16 leyi nga eka ndzimana 22.] Xana Xikwembu xi ta ku herisa njhani ku xaniseka hinkwako ka vanhu? Ndzi ta tsakela ku bula na wena hi nhlamulo ya xivutiso lexi loko ndzi vuya.” N’wi fambisele broxara kutani mi hlela siku leri u nga vuyaka ha rona.
Eka riendzo ro vuyela, u nga ha ku:
“Tolweni wa masiku loko ndzi ku endzerile hi hlaye tsalwa leri. [Hlaya kumbe u hlamusela Pisalema 145:16.] Hiloko ndzi tlakusa xivutiso lexi nge: Xana Xikwembu xi ta ku herisa njhani ku xaniseka hinkwako ka vanhu?” N’wi kombele leswaku a ta ni broxara yakwe. Kutani mi pfula eka matluka 27-8, mi bula hi tindzimana 23-5. N’wi hlamusele hi dyondzo ya Bibele, kumbe u n’wi byela leswaku loko u vuya mi ta bula hi tindzimana 26-7.
Muntshwa la nga muhuweleri, a nga ha ku:
“Tintangha ta mina to tala ti tivutisa leswaku misava yi ta va yi ri njhani endzhaku ka malembe ya khume kumbe ya 15. Wena u ehleketa leswaku vutomi byi ta va byi ri njhani hi nkarhi wolowo? [Yimela nhlamulo.] Swiphiqo leswi hi swi vonaka namuntlha swi kombisa leswaku hi hanya emasikwini ya makumu. [Hlaya 2 Timotiya 3:1-3.] Broxara leyi yi ni tinhlamulo ta swivutiso leswi landzelaka. [Hlaya swivutiso leswi nga exifunengetweni, kutani u n’wi fambisela yona.] Loko ndzi vuya, naswona u ri ni nkarhinyana, ndzi ta bula na wena hi timhaka leti tiyisaka nhlana ta ku herisiwa ka mavabyi ni ku dyuhala.” N’wi byele leswaku u ta vuya rini.
Eka riendzo ro vuyela, u nga ha ku:
“Enkarhini lowu hundzeke loko hi bula, ndzi vule leswaku ndzi lava ku ta bula na wena hi ta ku herisiwa ka mavabyi ni ku dyuhala. Mhaka yoleyo yi kumeka laha.” N’wi kombele leswaku a ta ni broxara yakwe, kutani mi hlaya mi tlhela mi bula hi tindzimana 6-7 eka matluka 23-4. N’wi byele leswaku mi ta tlhela mi bula hi tindzimana 8-9 loko u vuya.
Loko munhu lonkulu a famba ni n’wana, a nga ha titivisa, a tivisa ni n’wana, ivi a ku:
“Loko u swi tsakela, ________ a nga ku hlayela tsalwa. [N’wana u hlaya Pisalema 37:29 a tlhela a yi hlamuselanyana.] Broxara leyi yi hlamusela ndlela leyi ha yona Xikwembu xi nga ta hetisisa xikongomelo xa xona eka vanhu ni laha misaveni. [N’wi kombe swifaniso leswi nga eka matluka 24-7.] Loko hi vuya, ndzi ta ku komba switshembiso leswi hlamarisaka leswi Bibele yi swi vulaka hi ta ku pfuxiwa ka vafi.” N’wi fambisele broxara mi hlela leswaku u nga vuya rini.
Eka riendzo ro vuyela, munhu lonkulu a nga ha ku:
“Siku leriya hi hlaye Pisalema 37:29, hiloko ndzi vula leswaku ndzi ta ku komba leswi Bibele yi swi vulaka hi ta ku pfuxiwa ka vafi. Xiya leswi yi swi vulaka laha.” N’wi kombele leswaku a ta ni broxara yakwe kutani mi bula hi tindzimana 12-14 eka matluka 24-5. N’wi hlamusele hi ta dyondzo ya Bibele, kumbe u n’wi byela leswaku loko u vuya mi ta bula hi tindzimana 15-16.