Swiringanyeto Swo Fambisa Broxara Leyi Nge Xikongomelo Xa Vutomi I Yini? U Nga Xi Kumisa Ku Yini?
Endzhaku ko xewetana ni n’wini wa muti, u nga ha ku:
“A swi kanakanisi leswaku namuntlha vutomi byi ni swiphiqo ni swilo swo tala leswi hetaka matimba. Xana u ehleketa leswaku hi swona leswi vutomi a byi fanele byi va xiswona ku sukela eku sunguleni? [Yimela nhlamulo.] Broxara leyi yi hlamusela leswaku xikongomelo xo sungula xa Xikwembu malunghana ni vanhu ni misava xi ta hetiseka. [Bula hi xifaniso lexi nga eka matluka 20-1. Kutani u hlaya ndzimana 9, leyi hlamuselaka Esaya 14:24 na 46:11.] Loko ndzi vuya ndzi ta ku komba tsalwa ra Bibele leri vulaka leswaku Xikwembu xi ta tlhela xi endla leswaku misava leyi yi va Paradeyisi.” Fambisa broxara, ivi u n’wi byela leswaku u ta vuya rini.
Eka riendzo ro vuyela, u nga ha ku:
“Enkarhini lowu hundzeke, ndzi vule leswaku xikongomelo xa Xikwembu hileswaku vanhu va hanya emisaveni leyi nga paradeyisi hilaha ku nga heriki. [Tlhela u n’wi komba xifaniso lexi nga eka matluka 20-1.] Xiya leswaku Yesu, Petro na Davhida, na vona va vulavule hi Paradeyisi.” N’wi kombele a ta ni broxara ya yena. Pfulani eka matluka 21-2, kutani mi bula hi tindzimana 10-13. N’wi byele hi ta dyondzo ya Bibele, kumbe leswaku u ta tlhela u vuya u ta bula na yena hi swihlokwana leswi nga eka matluka 29-30.
Muntshwa la nga muhuweleri, a nga ha ku:
“Tintangha ta mina to tala a ti tiyiseki hi vumundzuku bya tona. Xana u ehleketa leswaku vana lava nga ta tswariwa enkarhini lowu taka va ta hanya vutomi byo antswa? [Yimela nhlamulo.] Bibele yi vulavula hi vumundzuku lebyi tsakisaka bya vanhu hinkwavo. [Pfula exifanisweni lexi nga eka tluka 31 ra broxara, u hlaya marito ya xona. Endzhaku ka sweswo u hlaya 2 Petro 3:13.] Broxara leyi yi vulavula hi mikateko leyi Xikwembu xi yi hlayiseleke vanhu. [Kandziyisa swihlokwana leswi nga eka matluka 29-30, ivi u n’wi fambisela broxara.] Ndzi ta tsakela ku tlhela ndzi vuya ndzi ta bula na wena hi xitshembiso xa Xikwembu xa ku herisa tinyimpi hinkwato.” Hlelani leswaku u nga vuya rini.
Eka riendzo ro vuyela, u nga ha ku:
“Siku leriya loko ndzi ku endzerile, ndzi ku hlamuselenyana hi xikongomelo xa Xikwembu xa ku endla misava leyi yi tlhela yi va paradeyisi. [Tlhela u n’wi komba xifaniso lexi nga eka tluka 31.] Ndzi ta tsakela ku twa leswi u swi ehleketaka hi ta xitshembiso xa Xikwembu xa ku herisa tinyimpi hinkwato.” N’wi kombele leswaku a ta ni broxara yakwe, kutani mi hlaya mi tlhela mi bula hi tindzimana 3-6 eka tluka 29. N’wi byele leswaku loko u vuya mi ta bula hi tindzimana 7-8.
Loko munhu lonkulu a tirha ni n’wana, a nga ha titivisa, a tivisa ni n’wana, kutani a ku:
“Loko u nga vileli, ________ u ta ku komba xifaniso a tlhela a ku hlayela tsalwa eBibeleni. [N’wana u komba munhu yoloye xifaniso a tlhela a n’wi hlayela marito lama nga eka tluka 31 ni tsalwa ra Nhlavutelo 21:4.] Broxara leyi yi hlamusela leswi Xikwembu xi nga ta swi endla hi swiphiqo leswi hi langutanaka na swona namuntlha. [Hlamusela swihlokwana leswi nga eka matluka 29-30 hi ku komisa, ivi u n’wi fambisela broxara.] Loko hi vuya, ndzi ta ku komba leswi Bibele yi swi vulaka hi ta ku herisiwa ka mavabyi hinkwawo.”
Eka riendzo ro vuyela munhu lonkulu, a nga ha ku:
“Tolweni wa masiku loko hi bula, ndzi ku byele leswaku ndzi lava ku ku komba leswi Bibele yi swi vulaka hi ta ku herisiwa ka mavabyi hinkwawo. Xiya leswi vuriwaka laha.” N’wi kombele a ta ni broxara yakwe, kutani mi bula hi tindzimana 9-14 eka tluka 29. N’wi hlamusele hi ta dyondzo ya Bibele, kumbe u n’wi byela leswaku loko u vuya mi ta bula hi tindzimana 15-17.