Bokisi Ra Swivutiso

◼ Xana “hlonga ro tshembeka ni ro tlhariha” ri pfumelelana ni mhaka ya leswaku Timbhoni ti hlangana ti va mintlawa yo karhi leswaku ti ta endla ndzavisiso wa Matsalwa ni ku kanetana hi leswi ti swi kumeke loko ti ri karhi ti endla ndzavisiso?—Mat. 24:45, 47.

Doo, a ri pfumelelani na swona! Nilokoswiritano, ku ni Timbhoni to karhi eswiphen’wini swo hambana-hambana swa misava, leti vumbeke mintlawa leyi tiendlelaka ndzavisiso ti ri toxe etimhakeni to karhi leti khumbaka Bibele. Tin’wana ti endla ndzavisiso wa Bibele wa marito ya Xiheveru ni ya Xigriki ti ri toxe, leswaku ti ta kambisisa loko hakunene Vuhundzuluxeri Bya Misava Leyintshwa byi pakanisa. Tin’wanyana ti kambisisa timhaka ta le Bibeleni leti khumbaka sayense. Ti simeke ti-Website eka khompyuta ni laha vanhu va nga vulavurisanaka na tona hi yona khompyuta leswaku ti ta vulavurisana ni vanhu ni ku kanetana na vona hi mavonelo ya tona. Ti tlhela ti hlela minhlangano ni ku kandziyisa tibuku leti tsariweke leswi ti swi kumeke nileswaku ti engetela eka leswi dyondziweke eminhlanganweni ya hina ya Vukreste ni le minkandziyisweni ya hina.

Vanhu va Yehovha emisaveni hinkwayo va kuma ndzetelo lowu ringaneke ni xikhutazo hi tlhelo ra moya eminhlanganweni ya vandlha, etinhlengeletanweni ni le mintsombanweni, swin’we ni le ka minkandziyiso leyi humesiwaka hi nhlengeletano ya Yehovha. Yehovha u kongomisa vanhu va yena hi ku tirhisa moya wa yena wo kwetsima ni Rito ra yena ra ntiyiso leswaku va “hlangana hilaha ku faneleke emianakanyweni yin’we ni le ndleleni yin’we ya ku ehleketa,” leswaku va tshama va ‘tiyile eripfumelweni.’ (1 Kor. 1:10; Kol. 2:6, 7) A swi kanakanisi leswaku ha ma tlangela malunghiselelo ya moya lawa Yehovha a hi nyikaka wona emasikwini lawa ya makumu. Hikwalaho “hlonga ro tshembeka ni ro tlhariha” a ri ti amukeli tibuku, minhlangano kumbe ti-Website leswi nga humesiwiki kumbe leswi nga hleriwangiki hi nkongomiso wa rona.—Mat. 24:45-47.

A swi bihanga loko vanhu va lava ku tirhisa matimba ya vona yo ehleketa leswaku va seketela mahungu lamanene. Hambiswiritano, a nga kona loyi a faneleke a kavanyeta leswi Yesu Kreste a swi hetisisaka hi ku tirhisa nhlengeletano ya yena ya laha misaveni namuntlha. Eka lembe-xidzana ro sungula, muapostola Pawulo u lemukise hi ku heta nkarhi etimhakeni leti dyaka nkarhi to fana ni “ta matimu ya swivongo, leti makumu ya tona ku nga vuhava, kambe ti vangaka swivutiso leswi lavaka ndzavisiso ku nga ri ku ava nchumu wo karhi lowu humaka eka Xikwembu mayelana ni ripfumelo.” (1 Tim. 1:3-7) Vakreste hinkwavo va fanele va lwela ku “papalata swivutiso swa vuphukuphuku ni matimu ya swivongo ni madzolonga ni ku lwisana ni Nawu, hikuva a swi pfuni nchumu naswona i swa hava.”—Tito 3:9.

Eka lava va navelaka ku endla ndzavisiso lowu dzikeke wa Bibele, hi va khutaza leswaku va hlaya tivholumo ta Insight on the Scriptures, buku leyi nge “Matsalwa Hinkwawo Ma Huhuteriwe Hi Xikwembu Naswona Ma Pfuna,” swin’we ni minkandziyiso yin’wana yo kota leyi hlamuselaka vuprofeta lebyi kumekaka eBibeleni bya Daniyele, Esaya ni bya Nhlavutelo. Minkandziyiso leyi yi tamele rungula ro tala leri hi nga ri dyondzaka eBibeleni hi tlhela hi anakanyisisa ha rona kutani hi ‘tala vutivi lebyi kongomeke bya ku rhandza ka Xikwembu hi vutlhari hinkwabyo ni ku twisisa ka moya, leswaku hi famba hi mukhuva lowu fanelaka eka Yehovha leswaku hi n’wi tsakisa hi ku helela hi ri karhi hi veka mihandzu entirhweni wun’wana ni wun’wana lowunene ni ku kula eku tiveni ka Xikwembu hi ku kongoma.’—Kol. 1:9, 10.