Fambani Tanihi Vanhu Vo Tlhariha
1 Loko Yesu a kombela vaphasi va mune va tinhlampfi leswaku va va valandzeri va yena, a va kanakananga, kambe ‘va n’wi landzele xikan’we-kan’we.’ (Mat. 4:18-22) Loko Sawulo wa le Tarso a hundzuka kutani a tlhela a vona, na yena a nga vanga na xinamu, kambe ‘hi ku hatlisa u sungule ku chumayela hi Yesu emasinagogeni.’ (Mint. 9:20) Nkarhi a wu yimi ndhawu yin’we, wu tshama wu ri eku fambeni; loko wo hundza, a wu nge he tlheli wu kumeka. Hi yona mhaka leyi swi nga swa nkoka leswaku hi ‘famba tanihi vanhu vo tlhariha’ malunghana ni ndlela leyi hi tirhisaka nkarhi wa hina ha yona.—Efe. 5:15, 16.
2 Xiendlakalo Lexi Nga Languteriwangiki: Lunghelo leri hi nga na rona ro tirhela Yehovha namuntlha swi nga endleka ri nga vi kona mundzuku. (Yak. 4:14) Hinkwerhu hi nga weriwa hi “xiendlakalo lexi nga languteriwangiki.” (Ekl. 9:11) Ku engetela kwalaho, hinkwerhu ha dyuhala kutani eka mafambiselo lawa ya sweswi ya swilo, a hi nge swi koti ku balekela “masiku ya khombo” lama fambisanaka ni ku kula naswona ma tlhela ma hi pimela leswi hi nga kotaka ku swi endla entirhweni wa Yehovha. (Ekl. 12:1) Hikwalaho, a hi vutlhari ku yi vekela etlhelo mhaka ya ku tinyiketela eka Xikwembu kumbe hi yimela leswaku swiyimo swa hina swi cinca ku ri kona hi nga ndlandlamuxaka ntirho wa hina wo chumayela hilaha hi nga kotaka hakona. (Luka 9:59-62) Abrahama u kume ku rhula ni ku eneriseka loko se a dyuharile kutani u fe a “kurile naswona a enerisekile” hikuva u tirhise vutomi byakwe hi ndlela ya vutlhari, u tinyiketele hi ku helela eka Yehovha.—Gen. 25:8.
3 Nkarhi Wu Komile: Nakambe hi lava ku tirhisa nkarhi wa hina hi vutlhari hikuva “nkarhi lowu seleke wu komile.” (1 Kor. 7:29-31) Ku nga ri khale xiyimiso lexi xa khale xa mafambiselo ya swilo xi ta hela. Malunghelo yo hlanganyela entirhweni lowukulu wo hlengeleta lava fanaka ni tinyimpfu enkarhini wa “ntshovelo wa misava” ma ta hela. (Nhlav. 14:15) Hi fanele hi tivonela leswaku hi nga pfumeleli ku karhateka ni swikavanyeto swa vutomi swi hi dyela nkarhi lowu a hi ta wu tirhisa ku antswa entirhweni wo chumayela. (Luka 21:34, 35) Swi ta hi tsakisa loko hi anakanya hi nkarhi lowu hi wu tirhiseke kutani hi kuma leswaku hi hlanganyele hi xitalo entirhweni wo tshovela!
4 Hi fanele hi tshama hi xalamukile leswaku hi nga hundziwi hi malunghelo yo tsakisa ya ntirho lama nga hi pfulekelaka. Onge hi nga tiyimisela ku endla hinkwaswo leswi hi nga swi kotaka leswaku hi tirhela Yehovha “ntsena loko ri vuriwa ‘Namuntlha.’” (Hev. 3:13) Loko hi endla tano, hi ta tikombisa hi ri lavo tlhariha, hikuva “loyi a endlaka ku rhandza ka Xikwembu u tshama hi masiku.”—1 Yoh. 2:17.