Vumbhoni Bya Ripfumelo!
1. Hi swihi swiendlakalo leswi nga tsakisiki leswi Yesu a profeteke leswaku swi ta endleka?
1 Vaapostola va rhiye ndleve loko Yesu a vulavula hi ku va kona ka yena ni ku hela ka mafambiselo lawa ya swilo. Vanhu a va ta langutana ni swiendlakalo leswi nga tsakisiki swo kota nyimpi, ku kayivela ka swakudya, ku tsekatseka ka misava ni mavabyi. Endzhaku ka sweswo Yesu u vule leswaku valandzeri va yena va ta vengiwa, va xanisiwa ni ku dlayiwa. A ku ta va ni vaprofeta va mavunwa lava a va ta hambukisa vanhu vo tala. Vanhu vo tala a va ta heleriwa hi rirhandzu.
2. Ha yini swi hlamarisa ku vona mahungu lamanene ma chumayeriwa emisaveni hinkwayo?
2 Vaapostola va fanele va hlamarile loko Yesu a vula leswaku mahungu lamanene ya Mfumo wa Xikwembu ma ta chumayeriwa emisaveni hinkwayo leyi akiweke endzhaku ka loko a heta ku va byela timhaka teto leti nga tsakisiki. (Mat. 24:3-14) Namuntlha hi vona ku hetiseka loku hlamarisaka ka vuprofeta byebyo lebyi tsakisaka. Hambileswi hi hanyaka eminkarhini leyi nga ni khombo, hi chumayela mahungu lamanene hi ku hiseka. Loko rirhandzu ra vanhu ri ya ri hunguteka, ra hina ri ya ri kula. Hi chumayela rixaka rin’wana ni rin’wana hambileswi hi vengiwaka “ematikweni hinkwawo.”
3. Hi yihi mintsengo leyi ku tiyisaka nhlana loko u ri karhi u kambisisa Xiviko Xa Misava Hinkwayo?
3 Swa khutaza ku kambisisa ntirho lowu Timbhoni ta Yehovha ti wu endleke elembeni ra ntirho ra n’wexemu, hilaha wu xaxametiweke hakona eka chati leyi kumekaka eka matluka 3 ku ya eka 6. Emalembeni ya 16 lama hundzeke, lembe ha rin’we ku tirhiwe tiawara leti tlulaka biliyoni entirhweni wo chumayela ni ku endla vadyondzisiwa. Byolebyo i vumbhoni bya leswaku Timbhoni ta Yehovha ti ni ripfumelo! Nhlayo ya maphayona yi andze hi 8,7 wa tiphesente, vahuweleri va andze hi 3,1 wa tiphesente kasi tidyondzo ta Bibele ti andze hi 4,4 wa tiphesente. Lava khuvuriweke eka lembe ra ntirho ra n’wexemu va tlula va lembe leri hundzeke hi tiphesente ta 20,1. Swi tsakisa ngopfu ku vona vanhu va kwalomu ka timiliyoni ta nkombo va tirhela Yehovha hi ku tshembeka naswona a wu kona nkarhi ematin’wini ya vanhu lowu nga pimanisiwaka ni ndlela leyi va tirhaka hi ku tshembeka ha yona! Loko u ri karhi u kambisisa chati leyi, i yini lexi ku tiyisaka nhlana?
4. Hi swihi swiphiqo leswi wanuna un’wana a a fanele a swi hlula loko a nga si khuvuriwa?
4 Hambileswi mintsengo leyi yi tsakisaka, hi nga rivali leswaku yi tiyisekisa leswaku ku ni vanhu lava nga ni ripfumelo. Hi xikombiso, Guillermo u kulele eBolivia. U velekiwe hi 1935 naswona u sungule ku tirha emasin’wini ya coca loko a ri ni malembe ya kaye. U sungule ku cakunya matluka ya coca lama dakwaka a ha ri ntsongo leswaku a rivala maxangu ya ku tirha bya mbhongolo. Hi ku famba ka nkarhi u sungule ku nwa ku tlula mpimo a tlhela a dzaha fole. Loko a sungula ku dyondza leswi Xikwembu xi swi languteleke eka yena, u tshike ku dzaha ni ku nwa ku tlula mpimo. Kambe ku tshika ku cakunya matluka ya coca a ku nga ri matlangwana hikuva u kule hi wona. U khongerile a nga heli mbilu kutani eku heteleleni, a wu hlula mukhuva lowu. Loko se a wu hlurile, u khuvuriwile. U ri: “Sweswi ndzi titwa ndzi basile naswona ndzi tsakile.”
5. I yini lexi u tiyimiseleke ku xi endla?
5 Hakunene Yehovha wa khathala hi vanhu. U lava leswaku va hundzuka. (2 Pet. 3:9) Na hina hi tiyimisela ku va pfuna leswaku va hundzuka. Onge timbilu ta hina ti nga hi pfuna leswaku hi endla hinkwaswo leswi hi nga swi kotaka leswaku hi pfuna vanhu va timbilu letinene va tiva va tlhela va rhandza Yehovha ku fana na hina.