Hambeta U Chumayela, U Nga Heli Matimba
1 Minkarhi yin’wana hi nga ha vona onge nsimu ya hina yi tirhiwe ngopfu kambe a yi vanga na vuyelo byo nyawula. Nilokoswiritano, ku ni swivangelo leswi hi bohaka ku hambeta hi chumayela.—Mat. 28:19, 20.
2 Vumbhoni: Yesu u vule ka ha ri emahlweni leswaku ntirho wo chumayela hi Mfumo wu ta va “vumbhoni ematikweni hinkwawo” naswona wu ta va xikombiso xa nkoka xa “makumu ya mafambiselo ya swilo.” (Mat. 24:3, 14) Loko vanhu va hi vona hi chumayela mahungu lamanene ya Mfumo, hi ndlela yoleyo vumbhoni byi va byi ri karhi byi hangalaka. Loko hi fambile vanhu van’wana va nga ha sala va heta nkarhi wo leha kumbe masiku va ha vulavula hi ta ku va endzela ka hina, hambiloko va nga ri amukelanga rungula ra hina. Ku tiva leswaku ha yini hi fanele hi chumayela swi hi pfuna leswaku hi tiyisela. Hi tsakisa Yehovha loko hi hlanganyela eku hetisekeni ka vuprofeta bya Bibele hi ku chumayela ni hi ku twarisa rungula ra xitsundzuxo.—2 Tes 1:6-9.
3 Hi Fanele Hi Tiyisela: Hikwalaho ka leswi ku nga ni swilo swo tala leswi kavanyetaka vanhu ni leswi va dyelaka nkarhi wa vona, hi fanele hi phikelela loko hi lava leswaku va tsakela rungula ra hina. Ku hele lembe wansati un’wana a endzeriwa vhiki rin’wana ni rin’wana kambe a a nga si tshama a pfumela leswaku Timbhoni ti vulavula na yena hi Bibele. Endzhaku ka loko a pfumerile, u swi rhandzile leswi ti n’wi byeleke swona lerova a amukela dyondzo ya Bibele, a sungula ku ya eminhlanganweni naswona swi nga si ya kwihi u vule leswaku u lava ku khuvuriwa.
4 Swiyimo swa misava leyi swi cinca hi ku hatlisa, naswona leswi swi endla leswaku ni vanhu va cinca ndlela leyi va langutaka swilo ha yona. Vo tala lava a va nga lavi ku twa nchumu loko hi va endzela ro sungula, sweswi va nga ha yingisa rungula ra hina leri phyuphyisaka. Loko munhu un’we a yingisa rungula ra Mfumo, ha swi vona leswaku ku phikelela ka hina i ka nkoka.
5 Emisaveni hinkwayo, va ya va engeteleka vanhu lava “konyaka hikwalaho ka swilo hinkwaswo leswi nyenyetsaka leswi endliwaka.” (Ezek. 9:4) Vanhu va timbilu letinene lava yingisaka rungula ra Mfumo i xikombiso xa leswaku a hi tirheli mahala. (Esa. 2:2, 3) Hikokwalaho, onge hi nga ya emahlweni hi nga heli matimba, naswona hi tiyisela hi rirhandzu loko hi ri karhi hi ‘twarisa mahungu lamanene ya leswo antswa.’—Esa. 52:7; Mint. 5:42.