Va Ta Swi Twisa Ku Yini?

1. Ha yini swi nga ha tikaka ku chumayela vanhu naswona ha yini hi phikelela hi va chumayela?

¹ Leswi siku ra Yehovha ri tshinelaka hi ku hatlisa, ku ni xilaveko xa xihatla xo pfuna vanhu vo tala leswaku va kuma vutivi lebyi kongomeke bya Xikwembu swin’we ni ku tiva hi ta xikongomelo xa xona hi vanhu. (Yoh. 17:3; 2 Pet. 3:9, 10) Leswi swi nga ha tika minkarhi yin’wana tanihi leswi vanhu vo tala va nga ha hi hlekulaka loko hi chumayela kumbe va nga hi tekeli enhlokweni. (2 Pet. 3:3, 4) Nilokoswiritano, hi ni swivangelo swo pfumela leswaku va ha ri kona vanhu ensin’wini ya hina lava nga ta amukela mahungu lamanene siku leri hi nga ta va chumayela. Xana vanhu volavo va ta ma twisa ku yini mahungu lamanene loko ku ri hava munhu la nga ta va chumayela?—Rhom. 10:14, 15.

2. Xana xikombiso xa muapostola Pawulo xi hi khutaza njhani?

² Ku Langutana Ni Nkaneto: Leswi ka ha riki ni vanhu vo tala lava lavaka ku twa mahungu lamanene ya Mfumo wa Xikwembu, a hi fanelanga hi tshika ku ma chumayela. Muti wa Filipiya hi wona wo sungula eYuropa lowu muapostola Pawulo a chumayeleke mahungu lamanene eka wona. Loko Pawulo na Silasi va hehliwe hi mavunwa ya rihlaza, va biwe hi tinhonga kutani va hoxiwa ekhotsweni. (Mint. 16:16-24) Hambiswiritano, sweswo a swi endlanga leswaku Pawulo a khomiwa hi rhumbyana lerova a tshika ku chumayela. Loko a ye eTesalonika, ku nga muti wa vumbirhi lowu a wu endzeleke loko a ri eka riendzo rakwe ra vurhumiwa, u ‘kume vurhena hikwalaho ka Xikwembu.’ (1 Tes. 2:2) Xana xikombiso xa Pawulo a xi hi nyiki swivangelo leswi hi susumetelaka leswaku ‘hi nga tshiki’ ku chumayela?—Gal. 6:9.

3. I yini lexi nga ha endlaka leswaku vanhu lava enkarhini lowu hundzeke a va nga swi tsakeli ku yingisa mahungu lamanene va cinca langutelo ra vona?

³ Vanhu vo tala lava a va nga lavi ku twa nchumu hi mahungu lamanene ku ringana malembe yo tala, se va cince langutelo ra vona. Ku wa ka ikhonomi hi xitshuketa, ku khomiwa hi vuvabyi, ku feriwa hi swirho swa ndyangu kumbe ku twa swiviko swa swiendlakalo leswi tsemaka nhlana leswi endlekaka emisaveni swi nga ha endla leswaku va cinca langutelo ra vona. (1 Kor. 7:31) Vana van’wana lava vatswari va vona a va nga lavi ku hi yingisa loko hi chumayela se va kurile naswona vona va swi lava ku hi yingisa. Loko hi hambeta hi chumayela vanhu vo tano swi ta endla leswaku va kota ku “[vitana] vito ra Yehovha” va nga si heleriwa hi nkarhi wo endla tano.—Rhom. 10:13.

4. I yini lexi hi susumetelaka ku hambeta hi chumayela hi “nga rhuteli”?

⁴ Ku “Nga Rhuteli”: Rirhandzu leri hi nga na rona hi Xikwembu ni hi muakelani ri ta hi susumetela leswaku hi hambeta hi “nga rhuteli” entirhweni wo chumayela ni wo endla vadyondzisiwa, hilaha vaapostola va hi lembe-xidzana ro sungula va endleke hakona. (Mint. 5:42) Vo tala namuntlha ‘va ni nhlomulo naswona va konya hikwalaho ka swilo hinkwaswo leswi nyenyetsaka’ leswi endlekaka sweswi. (Ezek. 9:4) Hakunene vanhu vo tano va ntshunxeka va tlhela va va ni ntshembo loko va twa mahungu lamanene! Hambiloko vanhu vo tala va ala ku yingisa, hi ni xitiyisekiso lexi nga eMatsalweni xa leswaku Yehovha wa ma tsakela matshalatshala lawa hi ma endlaka.—Hev. 13:15, 16.