Xivangelo Xa Ku Va Hi Tshamela Ku Tlhelela
1. Hi xihi xivutiso lexi tlakukaka malunghana ni ntirho wa hina wo chumayela?
1 Etindhawini to tala, hi hlanganisa nsimu ya hina hi ku phindha-phindha. Hi tshamela ku tlhelela etindlwini leti hi nga tshama hi nghena eka tona, hambileswi swi nga ha endlekaka vini va miti va hi byela leswaku a va tsakeli. Ha yini hi tshamela ku ya eka vanhu lava va nga hi amukelangiki enkarhini lowu hundzeke?
2. Hi xihi xivangelo-nkulu xa ku va hi phikelela ensin’wini?
2 Ku Rhandza Yehovha Ni Vanhu: Xivangelo-nkulu xa ku va hi phikelela ensin’wini hileswi hi rhandzaka Yehovha. Timbilu ta hina ti hi susumetela ku byela van’wana hi ta Xikwembu xa hina lexikulu. (Luka 6:45) Ndlela leyi hi n’wi rhandzaka ha yona Yehovha yi hi susumetela ku rhandza milawu ya yena ni ku pfuna van’wana leswaku na vona va yi rhandza. (Swiv. 27:11; 1 Yoh. 5:3) Ku tiyisela ka hina hi ku tshembeka entirhweni lowu a ku titsheganga hi ndlela leyi vanhu va angulaka ha yona. Hambiloko Vakreste va lembe-xidzana ro sungula va xanisiwile, va hambete va chumayela “va nga rhuteli.” (Mint. 5:42) Loko vanhu va ala ku rhiya ndleve, hi nga pfumeleli sweswo swi hi heta matimba, ematshan’weni ya sweswo hi fanele hi yima hi tiyile hi kombisa ndlela leyi rirhandzu ra hina ni ku tinyiketela ka hina eka Yehovha swi dzikeke ha yona.
3. Xana ku rhandza vanhu swi ta hi pfuna njhani leswaku hi hambeta hi va chumayela?
3 Xin’wana lexi hi endlaka hi phikelela hileswi hi rhandzaka vaakelani va hina. (Luka 10:27) Yehovha a nga lavi leswaku ku lovisiwa ni munhu ni un’we. (2 Pet. 3:9) Hambi ku ri ensin’wini leyi tirhiwaka nkarhi na nkarhi, ha ha va kuma vanhu lava lavaka ku tirhela Yehovha. Hi xikombiso, le Guadeloupe, laha ku nga ni Mbhoni yin’we ya Yehovha eka vanhu van’wana ni van’wana va 56, n’wexemu ku khuvuriwe vanhu va 214. Kwalomu ka vanhu va 20 000 va ve kona eXitsundzuxweni, ku nga kwalomu ka munhu un’we eka vanhu van’wana ni van’wana va 22 va kwalaho!
4. Xana nsimu yi cinca hi tindlela tihi?
4 Ku Cinca Ka Vanhu eNsin’wini: Swiyimo swi tshama swi ri karhi swi cinca-cinca ensin’wini ya hina. Loko hi tlhela hi endzela muti wolowo lowu eku sunguleni a ku ri ni vanhu lava nga tsakeliki, hi nga ha amukeriwa hi munhu wo karhi endyangwini wolowo—kumbexana loyi a nga si tshamaka a twa hi ta rungula ra hina—kutani a rhiya ndleve. Kumbexana hi nga ha kuma se ku tshama vanhu van’wana lava tsakelaka. Vana lava vatswari va vona va nga tsakeliki va kula kutani va huma miti. Vana vo tano va nga ha tsakela ku twa rungula ra Mfumo.
5. I yini lexi nga endlaka leswaku vanhu va angula kahle?
5 Vanhu na vona va cinca. Muapostola Pawulo, khale ka yena a a ri “musandzi ni muxanisi ni murhukani.” (1 Tim. 1:13) Hilaha ku fanaka, vanhu vo tala lava namuntlha se va tirhelaka Yehovha, eku sunguleni a va nga wu tsakeli ntiyiso. Van’wana va vona swi nga ha endleka a va ri vakaneti va mahungu lamanene. Loko swiyimo swa misava swi ri karhi swi cinca, khale ka lava a va ri vakaneti kumbe vanhu lava a va nga tsakeli, ku nga ha humelela swin’wana leswi nga ta va endla leswaku va rhiya ndleve. Van’wana va nga ha sungula ku tsakela endzhaku ka loko va weriwe hi khombo ro tanihi ku feriwa hi xirho xa ndyangu, ku heleriwa hi ntirho wo tihanyisa, kumbe va ve ni xiphiqo xa timali kumbe mavabyi.
6. Ha yini hi fanele hi hambeta hi chumayela hi ku hiseka?
6 Mafambiselo lawa ya swilo ma ya ma mbombomela, kambe ntirho wa hina wo chumayela ni wo dyondzisa wu ya wu lava ku endliwa hi xihatla. (Esa. 60:22) Hikwalaho, hi hambeta hi chumayela hi ku hiseka ni ku tikarhatela ku tshama hi ri ni langutelo lerinene. Swi nga ha endleka munhu loyi hi nga ta vulavula na yena enkarhini lowu taka a rhiya ndleve. Kutani hi fanele hi hambeta hi chumayela! ‘Hi ku endla tano, hi ta tiponisa hi tlhela hi ponisa ni lava va hi yingisaka.’—1 Tim. 4:16.