Hikwalaho Ka Yini Hi Fanele Ku Hambeta Hi Tlhelela?

¹ Xana u tshama u tivutisa xivutiso xexo, kumbexana loko u ri karhi u tilunghiselela ku ya ensin’wini? Etindhawini tin’wana laha nsimu ya hina yi tirhiwaka nkarhi na nkarhi, vini va miti va nga ha swi xiya leswaku hi vamani kutani va hatlisa va hi hlongola. Va nga ri vangani va nga angula hi ndlela leyinene. Kambe, ku ni swivangelo swo tala leswi twalaka leswi endlaka hi hambeta hi tlhelela.

² Xo sungula, hi lerisiwe ku hambeta hi chumayela rungula ra Mfumo kukondza makumu ma fika. (Mt. 24:14; 28:19, 20) Muprofeta Esaya a a lava ku tiva leswaku u fanele a hambeta ni ntirho wakwe wo chumayela ku fikela rini. Nhlamulo leyi a yi kumeke yi tsariwe eka Esaya 6:11. Swi le rivaleni leswaku—u byeriwe ku hambeta a tlhelela eka vanhu ni rungula ra Xikwembu. Hilaha ku fanaka namuntlha, hambiloko va nga ha hi hlongola, Yehovha u langutele leswaku hi hambeta hi endzela vanhu lava tshamaka ensin’wini ya ka hina. (Ezek. 3:10, 11) Lebyi i vutihlamuleri byo kwetsima lebyi hi byarhisiweke byona.—1 Kor. 9:17.

³ Xivangelo xin’wana lexi endlaka hi hambeta hi tlhelela hileswaku swi hi nyika nkarhi wo kombisa ku enta ka ku tinyiketela ka hina eka Yehovha. (1 Yoh. 5:3) Ku tlula kwalaho, loko hi vona leswi vumundzuku lebyi tshinelaka byi va khomeleke swona vanhu, xana hi nga tshika ku tsundzuxa vaakelani va hina hi rirhandzu? (2 Tim. 4:2; Yak. 2:8) Loko hi endla xiavelo xa hina hi ku tshembeka swi va nyika nkarhi lowu engetelekeke wa leswaku va angula eka rungula ra Xikwembu leri ponisaka, leswaku va ta ka va nga vuli leswaku a va tsundzuxiwanga.—Ezek. 5:13.

⁴ Ku engetela kwalaho, a hi swi tivi leswaku hi rini laha vanhu va nga ta hundzuka etimbilwini ta vona. Va nga ha susumetiwa hi ku cinca ka swiyimo swa vona vini, mhangu endyangwini wa vona, kumbe swiyimo swa misava leswi nga ta va vangela ku ehleketisisa swinene hi vumundzuku bya vona. Hi hala tlhelo, swilo leswi hi nga ha swi vulaka emakaya ya vona swi nga ha endla leswaku va angula kahle. (Ekl. 9:11; 1 Kor. 7:31) Nakambe, vanhu va rhurha. Hi nga ha kuma vaaki lavantshwa ensin’wini ya ka hina lava nga angulaka eka mahungu lamanene—kumbexana i vantshwa lava nga ni vutihlamuleri lava tshamaka va ri voxe lava ehleketisisaka swinene hi xikongomelo xa vona evuton’wini.

⁵ Xana hi ta hambeta hi tlhelela? Ina! Matsalwa ma hi nyika nsusumeto lowukulu leswaku hi hambeta hi tlhelela eka vanhu. Eku heteleleni, loko ntirho wo chumayela wu herile, Yehovha u ta hi katekisa hikwalaho ka matshalatshala ya hina lawa hi hambetaka hi ma endla evutirhelini, naswona u ta katekisa lava anguleke kahle eka mahungu lamanene ya Mfumo.—1 Tim. 4:16.