Hambetani Mi Chumayela!
1 I ku rhandza ka Xikwembu leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Tim. 2:4) Hikwalaho ka sweswo, xi hi nyike xiavelo xa ku chumayela mahungu lamanene. (Mat. 24:14) Loko hi twisisa leswaku ha yini hi fanele ku hambeta hi chumayela, a hi nge pfumeleli nchumu wu hi heta matimba kumbe wu hi kavanyeta.
2 Ha Yini Hi Phikelela? Ku ni swikavanyeto swo tala emisaveni leswi endlaka leswaku vanhu va rivala kumbe va nga swi tekeli enhlokweni leswi hi va byelaka swona. Hikwalaho hi fanele ku tshama hi ri karhi hi va tsundzuxa hi rungula ra Xikwembu ra ku ponisa. (Mat. 24:38, 39) Tlhandlakambirhi, swiyimo swa vutomi bya vanhu swi tshamela ku cinca. Kasi ni swiyimo swa misava swi nga hundzuka hi ndlela leyi nga rindzeriwangiki hi ku copeta ka tihlo. (1 Kor. 7:31) Mundzuku, vhiki leri taka kumbe n’hweti leyi taka, vanhu lava hi va chumayelaka va nga langutana ni swiphiqo kumbe mivilelo leyi nga va endlaka va anakanyisisa hi mahungu lamanene lawa hi va tiselaka wona. Xana a wu nkhensi leswi Mbhoni leyi ku tiseleke ntiyiso yi phikeleleke?
3 Ku Tekelela Tintswalo Ta Xikwembu: Hi ku lehisa mbilu, Yehovha u pfumelele leswaku nkarhi wu hundza a nga si avanyisa lavo homboloka. Hi ku tirhisa hina, u hambete a khongotela lava timbilu letinene leswaku va hundzulukela eka yena kutani va ponisiwa. (2 Pet. 3:9) Hi ta va ni nandzu wa ngati loko ho ka hi nga hambeti hi chumayela rungula ra tintswalo ra Xikwembu eka vanhu, hi va lemukisa hi nkarhi wa Xikwembu lowu taka wa ku avanyisa hinkwavo lava nga ti fularheliki tindlela ta vona to homboloka. (Ezek. 33:1-11) Hambileswi minkarhi yin’wana ku chumayela ka hina ku nga amukeriwiki hi mandla mambirhi, a hi fanelanga hi hela matimba hi tshika ku endla matshalatshala ya ku pfuna vanhu va timbilu leti tshembekeke leswaku va vona tintswalo letikulu ta Xikwembu.—Mint. 20:26, 27; Rhom. 12:11.
4 Ku Kombisa Rirhandzu Ra Hina: Yehovha Xikwembu, u tirhise Yesu Kreste leswaku a humesa xileriso xa ku chumayela mahungu lamanene emisaveni hinkwayo. (Mat. 28:19, 20) Hambiloko vanhu va nga swi lavi ku yingisa, hi ni lunghelo ra ku kombisa rirhandzu ra hina ni ku tinyiketela ka hina eka Xikwembu hi ku hambeta hi endla leswi nga swinene.—1 Yoh. 5:3.
5 Onge hi nga tiyimisela ku hambeta hi chumayela! Leswi ka ha riki ‘siku ra ku ponisa’ ra Yehovha, a hi endleni tano hi ku hiseka.—2 Kor. 6:2.