Ha Yini Hi Hambeta Hi Chumayela?

¹ Xana se ku hundze nkarhi wo leha ntirho wa ku chumayela hi Mfumo wu ri karhi wu endliwa endhawini ya ka n’wina? (Mat. 24:14) Loko swi ri tano, u nga ha vona onge nsimu ya vandlha ra ka n’wina se yi hlanganisiwe kahle. Kutani loko u chumayela, kumbexana vanhu vo tala lava u vulavulaka na vona va vonaka va nga ri tsakeli rungula ra Mfumo. Hambiswiritano, xiya leswi vadyondzisiwa va ntiyiso va Yesu va swi pfumelaka eka tluka 141 ra buku leyi nge Vuprofeta Bya Esaya II: “Etindhawini tin’wana, vuyelo bya vutirheli bya vona byi nga vonaka byi nga nyawuli loko byi ringanisiwa ni ntirho kun’we ni matshalatshala lawa va ma endleke. Kambe . . . va tiyisela.” Nilokoswiritano, ha yini va hambeta va chumayela?

² Tsundzuka Yeremiya: Ku tiyisela ka hina hi ku tshembeka entirhweni wa ku chumayela a ku fanelanga ku titshega hi loko vanhu va hi yingisa kumbe va nga hi yingisi. Hambileswi Yeremiya a yingisiweke hi vanhu va nga ri vangani naswona vo tala va kaneteke rungula ra yena, u hete malembe ya 40 a ri karhi a chumayela ensin’wini leyi fanaka. Ha yini Yeremiya a tiyiserile? Hikuva a a endla ntirho lowu Xikwembu xi n’wi leriseke wona naswona ku tiva ka yena leswi nga ta humelela enkarhini lowu taka ku n’wi susumetele ku hambeta a va ni xivindzi xa ku chumayela.—Yer. 1:17; 20:9.

³ Hi langutane ni xiyimo lexi fanaka. Yesu “u hi lerise leswaku hi chumayela evanhwini ni ku nyikela vumbhoni bya rixaladza bya leswaku loyi hi Yena la lerisiweke hi Xikwembu leswaku a va muavanyisi wa lava hanyaka ni lava feke.” (Mint. 10:42) Rungula leri hi ri tameleke ri nga endla leswaku lava ri yingisaka va pona naswona lava nga ri yingisiki va lovisiwa. Vanhu va ta avanyisiwa hi ku landza ndlela leyi va angulaka ha yona emahungwini lamanene. Hikwalaho, hi ni vutihlamuleri bya ku endla hilaha hi lerisiweke ha kona. Hambiloko vanhu va ala ku yingisa, hi kuma lunghelo ra ku va komba leswaku hi va rhandza hi mbilu hinkwayo nileswaku hi tinyiketele eka Yehovha, hi ku phikelela ku endla leswi hi faneleke hi swi endla. Kambe ka ha ri ni leswi engetelekeke.

⁴ Ha Vuyeriwa: Ku nga khathariseki leswaku vanhu va angurisa ku yini ensin’wini, loko hi endla ku rhandza ka Xikwembu hi va ni ku rhula etimbilwini ta hina, ha eneriseka, hi kuma ntsako, ku nga swilo leswi ku nga riki na ndlela yin’wana leyi hi nga swi kumaka ha yona. (Ps. 40:8) Vutomi bya hina byi sungula ku va ni xikongomelo. Loko hi ya hi hlanganyela hi xitalo evutirhelini, timbilu ni mianakanyo ya hina swi tshama swi ri karhi swi anakanya hi ntshembo ni ntsako wa ku hanya emisaveni leyintshwa ya Xikwembu. Ku tshama hi ri karhi hi anakanyisisa hi switshembiso leswi swa Matsalwa, swi tiyisa vumoya ni vuxaka bya hina na Yehovha.

⁵ Hambiloko swi vonaka onge hi tirhela endzhaku entirhweni wa hina wa ku chumayela, mbewu ya ntiyiso yi ta byaleka embilwini ya munhu wo karhi ivi yi mila hi nkarhi lowu Yehovha a nga ta vona swi fanerile leswaku yi mila. (Yoh. 6:44; 1 Kor. 3:6) A nga kona ni un’we wa hina la tivaka leswaku i vangani vanhu lava nga ta dyondza hi ta Mfumo hikwalaho ka matshalatshala ya vanhu va Yehovha, ku nga ha va ku ri ensin’wini ya ka n’wina kumbe emisaveni hinkwayo.

⁶ Hi fanele ku yingisa xiletelo xa Yesu hi xihatla lexikulu, lexi nge: “Tshamani mi langutile, tshamani mi hitekile, hikuva a mi swi tivi leswaku nkarhi lowu vekiweke wu fika rini. Kambe leswi ndzi mi byelaka swona, ndzi swi byela hinkwavo, Tshamani mi rindzile.” (Mar. 13:33, 37) Kutani ke, onge hinkwerhu hi nga hambeta hi chumayela mahungu lamanene ya Mfumo, hi tsakisa mbilu ya Yehovha loko hi ri karhi hi hlanganyela eku hlawulekiseni ka vito ra yena lerikulu ni leri kwetsimaka.