Vanhu Lava Tsakeke Swinene eMisaveni
1 “Va tsaka vanhu lava Xikwembu xa vona ku nga Yehovha!” (Ps. 144:15) Marito wolawo ma hlamusela Timbhoni ta Yehovha ti ri vanhu lava tsakeke swinene emisaveni. A wu kona ntsako lowu tlulaka lowu tisiwaka hi ku tirhela Xikwembu xi ri xin’we xa ntiyiso lexi hanyaka, Yehovha. Leswi a nga “Xikwembu lexi tsakeke,” ntsako wa yena wu vonaka eka lava n’wi gandzelaka. (1 Tim. 1:11) Hi swihi swivumbeko swin’wana swa vugandzeri bya hina leswi endlaka leswaku hi tsaka swonghasi?
2 Swivangelo Swa Ku Va Lava Tsakeke: Yesu u hi tiyisekisile leswaku hi ta kuma ntsako loko hi ‘khathala hi xilaveko xa hina xa moya.’ (Mat. 5:3) Xilaveko xexo hi xi enerisa hi ku hambeta hi dyondza Bibele ni ku va kona eminhlanganweni ya hina hinkwayo ya Vukreste. Ku dyondza ntiyiso wa Rito ra Xikwembu ku hi ntshunxile eka mavunwa ni vuhomboloki bya vukhongeri. (Yoh. 8:32) Nakambe, Matsalwa ma hi dyondzise ndlela leyinene ngopfu ya ku hanya. (Esa. 48:17) Hikwalaho ka sweswo, hi kuma vunakulobye lebyinene bya Vukreste enhlengeletanweni ya hina ya vamakwerhu leyi tsakeke.—1 Tes. 2:19, 20; 1 Pet. 2:17.
3 Hi kuma ku eneriseka lokukulu hi ku yingisa milawu leyi tlakukeke ya Xikwembu hikuva ha swi tiva leswaku ya hi sirhelela naswona Yehovha wa tsaka loko hi endla tano. (Swiv. 27:11) Muhleri un’wana wa phepha-hungu u te: “Hambileswi Timbhoni ta Yehovha ti hanyaka hi milawu leyi tikaka, a ti vonaki ti pfumala ntsako. Ti tshama ti tsakile. Leti kuleke ni letitsongo [exikarhi ka tona] ti vonaka ti ri ni ntsako lowu nga tolovelekangiki ni lowu ringaniseriweke kahle.” Hi nga va pfunisa ku yini van’wana leswaku va kuma ntsako lowu hi nga na wona?
4 Pfuna Van’wana Leswaku Va Kuma Ntsako: Ku hava ntsako emisaveni naswona vanhu hi ntolovelo a va voni vumundzuku byi ta va lebyi tsakisaka. Kambe, hina hi vona vumundzuku byi ta va lebyi tsakisaka, hi tiva leswaku siku rin’wana ku hlunama ku nge he tlheli ku va kona. (Nhlav. 21:3, 4) Hikwalaho, hi hlanganyela hi ku hiseka evutirhelini, hi lava vanhu va timbilu leti tshembekeke leswaku hi ta va byela ntshembo lowu hi nga na wona ni leswi hi kholwaka leswaku Yehovha u ta swi endla.—Ezek. 9:4.
5 Makwerhu un’wana wa xisati la nga phayona u te: “A wu kona nchumu lowu enerisaka ku tlula ku pfuna vanhu va tiva Yehovha ni ntiyiso wa yena.” A hi endleni hinkwaswo leswi nga emandleni ya hina ku khutaza vanhu vo tala leswaku va amukela tidyondzo ta le kaya ta Bibele. Ku tirhela Yehovha ni ku tinyiketela ku pfuna van’wana leswaku va n’wi tirhela, swi tisa ntsako lowukulu ngopfu.—Mint. 20:35.