Ntsako Wa Ntiyiso eNtirhweni Wa Yehova
“Wa tsaka loyi Xikwembu xa Yakobo xi nga mupfuni wa yena, loyi ntshembo wakwe wu nga eka Yehova Xikwembu xa yena.”—PSALMA 146:5, NW.
1, 2. I yini leswi vuriweke hi nhlamuselo ya ntsako, naswona xana ntsako wu vula yini eka vanhu vo tala namuntlha?
NTSAKO i yini? Vatsari va swihlamusela-marito, vativi va filosofi ni vafundhisi a a va ri karhi va ringeta ku wu hlamusela hi malembe xidzana yo tala. Kambe a va si yi nyikela nhlamuselo leyi amukelekaka hinkwako. Encyclopædia Britannica ya pfumela: “‘Ntsako’ i rin’wana ra marito lama nga twisisekiki.” Ntsako wu tikomba wu vula swilo swo hambana eka vanhu vo hambana, hi ku ya hi ndlela leyi va langutaka vutomi ha yona.
2 Eka vanhu vo tala ntsako wu vula ku va ni rihanyo lerinene, rifuwo ni vanghana lavanene. Kambe, ku ni vanhu lava nga na swona swilo sweswo hinkwaswo, kambe va ri hava ntsako. Eka vavanuna ni vavasati lava tinyiketeleke eka Yehova Xikwembu, Bibele yi nyikela nhlamuselo ya ntsako leyi hambaneke swinene ni langutelo leri tolovelekeke.
Langutelo Leri Hambaneke Hi Ntsako
3, 4. (a) I vamani lava Yesu a nga te va tsaka? (b) I yini lexi xiyekaka eka swiaki swa ntsako leswi Yesu a swi boxeke?
3 Eka Dyondzo yakwe ya le Ntshaveni, Yesu Kriste a nga vulanga leswaku ntsako wu titshege hi rihanyo lerinene, rifuwo, sweswo-sweswo. U vule leswaku va tsaka lava “khathalelaka xilaveko xa vona xa moya” ni lava “nga ni ndlala ni torha ra leswo lulama.” Nhlamuselo ya Yesu leyi vonakaka yi nga tolovelekanga yi yelana swinene ni tinhlamuselo leti timbirhi leti lavekaka ku kuma ntsako wa ntiyiso: “Va tsaka lava rilaka hikuva va ta chaveleriwa.” (Matewu 5:3-6, NW) Kavula, Yesu a a nga vuli swona leswaku vanhu va to swi pfuketana va tsaka loko va lahlekeriwe hi murhandziwa wa vona. Kambe, a a vulavula hi lava vilelaka hi xiyimo xa vona xa vudyoho ni mimbuyelo ya xona.
4 Muapostola Pawulo u vulavule hi swivumbiwa swa vanhu leswi konyaka hikwalaho ka xidyoho hi ku tiva leswaku hi ntshembo lowu swi nga na wona swi ta “ntshunxiwa . . . evuhlongeni bya leswo bola.” (Varhoma 8:21, 22) Vanhu lava amukelaka lunghiselelo ra Yehova leri pfalaka xidyoho hi gandzelo ra nkutsulo ra Kriste ni lava va endlaka ku rhandza ka Xikwembu va chaveleriwa hakunene naswona va kuma ntsako. (Varhoma 4:6-8) Eka Dyondzo ya le Ntshaveni, Yesu nakambe u te va tsaka “lavo rhula,” “va tintswalo,” “va timbilu leti tengeke,” ni “lava kondletelaka ku rhula.” U tiyisekise leswaku hambi loko va xanisiwa, vanhu vo tano lava titsongahataka a va nge lahlekeriwi hi ntsako wa vona. (Matewu 5:5-11, NW) Swa tsakisa ku xiya leswaku swivumbeko leswi leswi tlakukeke swa ntsako, swi endla swigwili ni swisiwana swi fana.
Xisekelo Xa Ntsako Wa Ntiyiso
5. Hi xihi xisekelo xa ntsako wa malandza ya Xikwembu lama tinyiketeleke?
5 Xihlovo xa ntsako wa ntiyiso a xi kona eka rifuwo. Hosi yo tlhariha, Solomoni, yi te: “Mikateko ya Yehova yi fuwisa munhu, a nga ṅwi engeteli mikaralo.” (Swivuriso 10:22) Eka swivumbiwa leswi xiyaka vuhosi bya Yehova bya vuako hinkwabyo, ntsako wu va kona ntsena loko ku ri na mikateko ya Xikwembu. Munhu la tinyiketeleke la nga ni nkateko wa Yehova ni loyi a wu twaka ehenhla ka yena wa tsaka hakunene. Hi ku ya hi Bibele, ntsako wu katsa ku aneriseka, ni ku hetisisa swo karhi entirhweni wa Yehova.
6. I yini lexi lavekaka eka vanhu va Yehova leswaku va tsaka hakunene?
6 Ntsako wa ntiyiso wu titshege swinene hi vuxaka lebyinene na Yehova. Byi tiyisiwa hi ku rhandza Xikwembu ni ku tshembeka eka xona. Malandza ya Yehova lama tinyiketeleke ma pfumelelana swinene ni marito ya Pawulo: “Hikuva ku hava ni un’we wa hina la tihanyelaka . . . hi hanyela [Yehova], . . . hi va [Yehova].” (Varhoma 14:7, 8) Hikwalaho, ntsako wa xiviri a wu nge kumiwi handle ko yingisa Yehova ni ku titsongahatela ku rhandza ka yena hi ntsako. Yesu u te: “[Va tsaka, NW] lava yingisaka Rito ra Xikwembu, va vuya va ri hlayisa!”—Luka 11:28.
Swiaki Swo Hambana-hambana Swa Ntsako
7, 8. (a) Xana swiaki swa ntsako swi nga aviwa njhani? (b) I yini leswi nga vuriwaka hi vukati ni ku veleka vana?
7 Swiaki leswi nga laha henhla swa ntsako swi nga ha vitaniwa “swisekelo” kumbe “misinya ya milawu,” hi mhaka ya leswi swi nga swa nkoka eka malandza ya Yehova lama tinyiketeleke hi minkarhi hinkwayo. Ntlhandla-kambirhi, ku na leswi nga ha vuriwaka swiaki leswi hambanaka, leswi nkarhi wun’wana swi nga wu tisaka ntsako kambe nkarhi wun’wana swi tsandzekaka. Hi nkarhi wa vapatriarka ni wa le mahlweni ka Vukriste, vukati ni ku veleka vana a swi tekiwa tanihi leswi bohaka leswaku ku va ni ntsako. Leswi swi kombisiwa hi xikombelo xa Rahele lexi hlomulaka mbilu eka Yakobo: “Nḍi he v̌ana, loko ŝi nga ri tano nḍi ta fa.” (Genesa 30:1) Langutelo leri ra ku veleka vana a a ri pfumelelana ni xikongomelo xa Yehova hi nkarhi wolowo.—Genesa 13:14-16; 22:17.
8 Vukati ni ku veleka vana a a swi tekiwa tanihi mikateko leyi humaka eka Xikwembu exikarhi ka vanhu va Yehova va minkarhi ya khale. Hambi swi ri tano, mahlomulo a a ma fambisana ni swiyimo leswi ni swin’wana hi nkarhi wa makhombo ematin’wini ya vona. (Ringanisa Psalma 127, 128 na Yeremiya 6:12; 11:22; Swirilo 2:19; 4:4, 5.) Hikwalaho, swi le rivaleni leswaku vukati ni ku veleka vana a hi swiaki leswi hetisekeke swa ntsako.
Ntsako Handle Ka Vukati eNkarhini Wa Khale
9. Ha yini nhwana wa Yafta a a hamba a bumabumeriwa lembe na lembe?
9 Malandza yo tala ya Xikwembu ma wu kumile ntsako wa ntiyiso handle ko nghenela vukati. Hi ku xixima ku hlambanya ka tata wakwe, nhwana wa Yafta u titshamele yexe. Ku ringana nkarhi wo karhi yena ni vanhwana-kulobye va byi rilerile vunhwana byakwe. Kambe mawaku ntsako lowu a veke na wona hi ku tirha nkarhi hinkwawo endlwini ya Yehova, kumbexana a ri exikarhi ka “v̌av̌asati la’v̌a hlengeletanaka e nyangweni ya tabernakela ya nhlengeletano”! (Eksoda 38:8) Hikwalaho ka leswi, a a bumabumeriwa lembe na lembe.—Vaavanyisi 11:37-40.
10. Xana Yehova u lave yini eka Yeremiya, naswona xana swi tikomba onge a a hanya vutomi lebyi nga tsakisiki hikwalaho ka swona?
10 Hikwalaho ka minkarhi leyi nga tshamisekangiki leyi muprofeta Yeremiya a hanyeke ha yona, Xikwembu xi lave leswaku a papalata ku teka ni ku va ni vana. (Yeremia 16:1-4) Kambe Yeremiya u tokote ntiyiso wa marito ya Xikwembu: “Ku katekile munhu l’a tiṭhembelaka Yehova, loyi ku ṭhemba ka yena ku nga ka Yehova!” (Yeremia 17:7) Eka malembe hinkwawo yo tlula 40 ya ntirho wa vuprofeta, Yeremiya u tirhele Xikwembu hi ku tshembeka a a ri wanuna la nga tekangiki. Hi laha hi tivaka ha kona, a nga kalanga a teka ni ku va ni vana. Kambe i mani la nga kanakanaka leswaku Yeremiya a a tsakile, ku fana ni masalela yo tshembeka ya Vayuda lama ‘tsakeleke vunene bya Yehova’?—Yeremia 31:12.
11. Hi swihi swikombiso swin’wana swa Matsalwa swa malandza ya Yehova lama tshembekaka lawa a ma tsakile hambi loko ma ri hava munghana wa vukati?
11 Vanhu van’wana vo tala va tirhele Yehova hi ntsako va ri hava vanghana va vukati. A va ri lava titshameleke voxe, tinoni, kumbe vavanuna lava feriweke. Exikarhi ka vona a ku ri na muprofeta wa xisati Ana; kumbexana na Dorkasi, kumbe Tabita; muapostola Pawulo; ni xikombiso lexikulu eka hinkwaswo—Yesu Kriste.
Ku Titshamela Wexe Hi Ntsako Namuntlha
12. I yini leswi man’wana ya malandza ya Yehova lama tsakeke ma swi amukeleke namuntlha, naswona hikwalaho ka yini?
12 Namuntlha, Timbhoni ta Yehova ta magidi ti tirhela Xikwembu hi ku tshembeka ti ri hava vanghana va vukati. Van’wana va swi kotile ku amukela xirhambo xa Yesu: “Loyi a kotaka ku amukela mhaka leyi [nyiko ya ku titshamela wexe], a a yi amukele.” Va endle leswi “hikwalaho ka Mfumo wa matilo.” (Matewu 19:11, 12) Hi leswaku, va tirhisa ntshunxeko wa vona lowu humaka eka Xikwembu hi ku nyikela nkarhi ni matimba yo tala eku ndlandlamuxeni ka swilaveko swa Mfumo. Vo tala va vona va tirha tanihi maphayona, varhumiwa, kumbe swirho swa ndyangu wa Bethele eyindlu-nkulu ya Sosayiti ya Watch Tower kumbe eka rin’wana ra marhavi ya yona.
13. I swikombiso swihi leswi kombisaka leswaku Mukriste a nga tsaka hambi a titshamele yexe?
13 Makwerhu un’wana wa xisati la rhandzekaka la dyuhaleke u nyike mhaka ya vutomi bya yena nhloko-mhaka leyi nge “Ku Titshamela Wexe U Tsakile Tanihi Phayona.” (The Watchtower, May 1, 1985, matluka 23-6) Makwerhu un’wana wa xisati la titshameleke yexe la heteke malembe yo tlula 50 a tirha eBethele u te: “Ndzi aneriseka swinene hi vutomi ni ntirho wa mina. Sweswi ndzi tirha swinene ku tlula rini na rini entirhweni lowu ndzi wu rhandzaka swinene. A ndzi tisoli. Ndzi nga tlhela ndzi endla xiboho lexi fanaka.”—The Watchtower, June 15, 1982, tluka 15.
14, 15. (a) Hi ku ya hi muapostola Pawulo, ku laveka yini loko munhu a ta tshama a nga byi ngheneli vukati? (b) Ha yini Pawulo a vula leswaku munhu la titshameleke yexe u endla ku ‘antswa’ naswona ‘wa tsaka’?
14 Xiya rito leri nge “xiboho.” Pawulo u tsarile: “Kambe loko [wihi na wihi, NW] a yima a tiyile embilwini ya yena, a nga ri na lexi xi n’wi sindzisaka kambe a kota ku tikhoma hi yexe, ú ta va a endla swona loko a tiboha embilwini ya yena ku tshamisa sweswo a nga [ngheneli vukati, NW]. Hikokwalaho, loyi a [nghenelaka vukati, NW] u endla swona; kambe loyi a nga [byi ngheneliki, NW] u endla leswi antswaka ku tlula swona.” (1 Vakorinto 7:37, 38) Ha yini swi ‘antswa’? Pawulo wa hlamusela: “Ndzi lava leswaku mi nga vi na swivilelo. Loyi a nga tekangiki u tikarhatela swa Hosi, ku vona hilaha a nga tsakisaka Hosi hakona; . . . Wansati loyi a nga tekiwangiki, kumbe wanhwana, u tikarhatela swa Hosi, . . . Ndzi vula leswi ku mi pfuna, . . . ku endlela leswaku swilo hinkwaswo swi famba swinene, mi tinyiketa ku tirhela Hosi, mi nga anakanyi swin’wana.” 1 Vakorinto 7:32-35.
15 Xana ku “tirhela Hosi, mi nga anakanyi swin’wana” hi ku lava ‘ku amukeriwa hi Hosi,’ ka yelana ni ntsako? Handle ko tipfinyinga Pawulo a a anakanya tano. Loko a vulavula hi noni ya Mukriste, u te: “U ntshunxekile, a nga ha tekiwa hi loyi a lavaka ku tekiwa hi yena, ntsena a swi fambe hilaha Hosi yi swi rhandzaka hakona. Hambiswiritano, a swi ta antswa eka yena loko a titshamela ntsena a nga tekiwi; sweswo i miehleketo ya mina, naswona ndza kholwa leswaku na mina ndzi ni Moya wa Xikwembu.”—1 Vakorinto 7:39, 40.
Mimpfuno Ya Ku Nga Ngheneli Vukati
16. Hi yihi mimpfuno yin’wana leyi kumiwaka hi Timbhoni ta Yehova leti titshameleke toxe?
16 Ku nga khathariseki leswaku Mukriste u titshamele yexe hikwalaho ka xiboho xa munhu hi xiyexe kumbe hi ku bohiwa hi swiyimo, ku titshamela wexe ku na mimpfuno yo tala ya munhu hi xiyexe. Hi ntolovelo vanhu lava titshameleke voxe va ni nkarhi wo tala wo dyondza Rito ra Xikwembu ni ku anakanyisisa ha rona. Loko va xi tirhisa kahle xiyimo lexi, vumoya bya vona bya enta. Leswi va nga hava munghana wa vukati wo avelana swiphiqo swa vona na yena, vo tala va dyondza ku titshega swinene hi Yehova, naswona va lava nkongomiso wa yena eka swilo hinkwaswo. (Psalma 37:5) Leswi swi va endla va va ni vuxaka bya le kusuhi swinene na Yehova.
17, 18. (a) Hi wahi malunghelo ya ntirho lowu engetelekeke wa nsimu lama nga kona eka malandza ya Yehova lama titshameleke woxe? (b) Xana malandza man’wana ya Yehova lama titshameleke woxe ma wu hlamusela njhani ntsako wa wona?
17 Vakriste lava nga byi nghenelangiki vukati va ni nkarhi wo kurisa ntirho wa vona wa nsimu ku tisa ku dzuneka eka Yehova. Ndzetelo wo hlawuleka lowu sweswi wu nyikeriwaka eXikolweni xa Ndzetelo wa Vutirheli wu hikeriwe eka vamakwerhu va xinuna lava nga tekangiki kumbe lava feriweke hi vanghana va vukati. Vamakwerhu va xisati lava titshameleke voxe na vona va ntshunxekile ku fanelekela malunghelo entirhweni wa Xikwembu. Makwerhu wa xisati la dyuhaleke la boxiweke eku sunguleni u tinyiketele ku tirha etikweni ra le Afrika, loko hi laha a vuleke ha kona, a a ri “wansati la tsaneke emirini wa malembe yo tlula 50 hi vukhale.” Naswona u tshame kwalaho, hambi ku ri hi nkarhi wa ku yirisiwa, loko varhumiwa hinkwavo va hlongoriwa. Wa ha tirha kwalaho tanihi phayona, hambi leswi sweswi a nga ni malembe yo tlula 80 hi vukhale. Xana u tsakile? Loko a rungula ta vutomi byakwe u tsarile a ku: “Ndzi swi kotile ku tirhisa ntshunxeko lowu engetelekeke lowu ku titshamela wexe ku wu nyikelaka leswaku ndzi tshama ndzi khomekile evutirhelini, naswona leswi swi ndzi tisele ntsako lowukulu. . . . Hi malembe lawa hinkwawo vuxaka bya mina na Yehova byi entile. Tanihi wansati la titshameleke yexe etikweni ra le Afrika, ndzi n’wi kume a ri Musirheleri.”
18 Nakambe, lexi xiyekaka i marito ya makwerhu wa xinuna la tirheke eyindlu-nkulu ya Sosayiti ya Watch Tower hi makume ya malembe. A a tsakile hambi leswi a nga byi nghenelangiki vukati, naswona hambi leswi a a ri ni ntshembo wa le tilweni a a nga ri na ntshembo wo tlhela a nghenela vukati. Loko a ri na malembe ya 79 u tsarile: “Siku na siku ndzi kombela Tatana wa le tilweni hi xikhongelo leswaku a ndzi pfuna, a ndzi nyika vutlhari byo tihlayisa emoyeni naswona ndzi hanyile ni ku tiya emirini leswaku ndzi ta hambeta ndzi endla ku rhandza kakwe loku kwetsimaka. Eka malembe lawa ya makume-mune-kaye lama hundzuke ndzi ri entirhweni wa Yehova, ndzi tiphine swinene hi vutomi lebyi tsakisaka, lebyi vuyerisaka ni lebyi katekisiweke. Naswona hi tintswalo leti nga fanelangiki ta Yehova ndzi langutele ku hambeta ndzi n’wi tirhela, ku tisa ku dzuneka ni ku kwetsima eka yena ni leswaku vanhu vakwe va katekisiwa. . . . Ntsako wa Yehova wu ndzi pfuna leswaku ndzi hambeta ndzi lwela ripfumelo, ndzi langutele nkarhi lowu ha wona valala va Yehova va nga ta va va herisiwile naswona misava hinkwayo yi tele hi ku kwetsima.”—Tinhlayo 14:21; Nehemia 8:10; The Watchtower, November 15, 1968, matluka 699-702.
Xana Ntsako Wa Ntiyiso Wu Titshege Ha Yini?
19. Ntsako wa hina minkarhi hinkwayo wu ta titshega ha yini?
19 Vuxaka bya hina bya risima na Yehova, ku amukeriwa hi yena ni ku katekisiwa hi yena—leswi hi swona swiaki leswi nga ta hi tisela ntsako wa ntiyiso hi laha ku nga heriki. Hi ku va na langutelo leri rinene eka leswi vangaka ntsako wa xiviri, hambi ku ri malandza ya Yehova lama ngheneleke vukati ma swi xiya leswaku vukati bya wona a hi nchumu wa nkoka ku tlula hinkwaswo evuton’wini bya vona. Va yingisa xitsundzuxo xa muapostola Pawulo: “Ndzi mi byela mhaka leyi, vamakwerhu: Nkarhi a wa ha ri kona. Ku sukela sweswi, lava nga ni vasati va fanele ku endla wonge hi loko va nga ri na vona.” (1 Vakorinto 7:29) Leswi a swi vuli leswaku va fanele va honisa vasati va vona. Vavanuna lava vupfuke va Vakriste va rhangisa ntirho wa Yehova, naswona vasati va vona lava chavaka Xikwembu, va rirhandzu ni lava nga ni nseketelo va endla tano, van’wana va tirha nkarhi lowu taleke tanihi vaseketeri va vanuna va vona.—Swivuriso 31:10-12, 28; Matewu 6:33.
20. Hi rihi langutelo lerinene leri Vakriste vo tala va nga na rona eka malunghelo ya vona ya vukati?
20 Vamakwerhu lava tekeke lava nga valanguteri lava famba-fambaka, vatirhi va ku tirhandzela lava nga eBethele, vakulu va bandlha—ina, Vakriste hinkwavo lava tekeke lava rhangisaka swilaveko swa Mfumo—a va ‘yi tirhisi ngopfu misava’; va tirhela ku nghenisa malunghelo ya vona ya vukati evuton’wini bya vona byo tinyiketela ku tirhela Yehova. (1 Vakorinto 7:31) Kambe, va tsakile. Hikwalaho ka yini? Hi mhaka ya leswi xivangelo-nkulu xa ntsako wa vona ku nga riki vukati bya vona kambe ku nga ku tirhela Yehova. Naswona vavanuna ni vavasati vo tala lava tshembekaka—ina, ni vana va vona—va tsaka ha swona.
21, 22. (a) Hi ku ya hi Yeremia 9:23, 24, i yini lexi faneleke xi hi endla hi khapa hi ntsako? (b) Hi swihi swiaki swa ntsako leswi boxiwaka eka Swivuriso 3:13-18?
21 Muprofeta Yeremiya u tsarile: “Yehova o v̌urisile, a ku: L’a nga ni v̌utlhari a nga ṭhuki a tiḍunisa hi v̌utlhari bya yena, l’a nga ni matimba a nga tiḍunisi hi matimba ya yena; na yena mufuwi a nga tiḍunisi hi rifuwo ra yena; kambe l’a tiḍunisaka a a tiḍunisele mhakeni leyi: hi leŝaku o ni ku twisisa ni v̌utlhari bya ku nḍi tiv̌a, hikuv̌a hi mina Yehova nḍi endlaka hi musa, ni fanelo, ni le’ši lulameke e misav̌eni; hikuv̌a nḍi ṭakisiwa hi ŝona, ku v̌ula Yehova.”—Yeremia 9:23, 24.
22 Hambi hi byi nghenerile vukati kumbe e-e, xihlovo-nkulu xa hina xa ntsako ku fanele ku ri ku tiva Yehova ni ku khorwiseka leswaku hi kuma mikateko ya yena hi ku va hi endla ku rhandza ka yena. Nakambe ha tsaka leswi hi tivaka leswaku mimpimanyeto leyinene hi yihi, swilo leswi Yehova a swi tsakelaka. Hosi Solomoni muteki wa tshengwe a nga tekanga vukati byi ri byona ntsena xilotlelo xa ntsako. U te: “Ku katekile munhu loyi a kumaka ku twisisa, ni loyi a kumaka v̌utlhari! Hikuv̌a binḍu ra byona ri tlula silver, ni ku anḍa ka byona ku tlula nsuku; byi tlula tiperla hi risima, hikwaŝo le’ŝi nav̌etaka a ŝi byi ringani. Ku leha ka masiku ku le v̌okweni ra šinene ra byona; ku fuma ni ku twala ŝi le v̌okweni ra šimaṭi. Tindlela ta byona i tindlela le’ti ṭakisaka, mitila hikwayo ya byona yi ni ku rula. I muri wa v̌utomi e ka la’v̌a byi fuweke, la’v̌a byi hlayisaka v̌a katekile.”—Swivuriso 3:13-18.
23, 24. Ha yini hi fanele hi tiyiseka leswaku malandza hinkwawo yo tshembeka ya Yehova ma ta tsaka emafambiselweni lamantshwa ya swilo?
23 Onge hinkwavo lava exikarhi ka hina va ngheneleke vukati va nga kuma ntsako lowu nga heriki eku endleni ka ku rhandza ka Xikwembu. Naswona onge vamakwerhu va hina va xinuna ni va xisati lava titshameleke voxe hi ku tihlawulela kumbe hi ku bohiwa hi swiyimo va nga tiyiselela miringo ya vona hinkwayo naswona va kuma ntsako ni ku aneriseka entirhweni wa Yehova sweswi ni hi laha ku nga heriki. (Luka 18:29, 30; 2 Petro 3:11-13) Eka fambiselo leri taka ra Xikwembu ra swilo, “tibuku” ti ta pfuriwa. (Nhlavutelo 20:12) Tona ti ta va ti ri na milawu leyintshwa leyi tsakisaka. leyi tiselaka vanhu lava yingisaka ntsako.
24 Hakunene, hi nga tiyiseka leswaku ‘Xikwembu xa hina lexi tsakeke’ xi hi vekele swilo leswinene ngopfu leswi nga ta hi tisela ntsako lowu heleleke. (1 Timotiya 1:11) Xikwembu xi ta hambeta xi ‘pfula voko ra xona ivi xi anerisa ku navela ka xivumbiwa xin’wana ni xin’wana lexi hanyaka.’ (Psalma 145:16) A swi hlamarisi leswi ku nga ni ntsako wa ntiyiso, naswona wu nga ta tshama wu ri kona eku tirheleni Yehova.
A Wu Ta Angurisa Ku Yini?
◻ Hi xihi xisekelo xa ntsako wa malandza ya Yehova lama tinyiketeleke?
◻ Eminkarhini ya Bibele, hi wahi malandza man’wana lama tinyiketeleke ya Yehova lawa a a ma tsakile kambe ma titshamele woxe?
◻ Ha yini Pawulo a bumabumele ku titshamela wexe, naswona xana Vakriste van’wana va kume leswi ku ri vutomi lebyi tsakisaka hi ndlela yihi?
◻ Xana ntsako wa hina minkarhi hinkwayo wu ta titshega ha yini?
◻ Ha yini hi fanele hi tiyiseka leswaku vanhu hinkwavo vo tshembeka va ta tsaka emafambiselweni lamantshwa ya swilo?
[Xifaniso lexi nga eka tluka 16]
Vamakwerhu vo tala va xisati lava titshameleke voxe va tirhela Yehova hi ntsako tanihi vatirheli va nkarhi hinkwawo
[Xifaniso lexi nga eka tluka 18]
Ku tirhela swilaveko swa Yehova i xihlovo-nkulu xa ntsako