Xana Vukati Hi Byona Ntsena Xilotlelo Xa Ntsako?
‘U ntshunxekile, ku tekiwa hi loyi a n’wi lavaka, ntsena eHosini. Kambe wa tsaka swinene loko a tshamisa sweswo.’—1 VAKORINTO 7:39, 40.
1. Matsalwa ma n’wi hlamuserisa ku yini Yehova, naswona i yini leswi a nga swi endlela swivumbiwa swa yena?
YEHOVA i “Xikwembu lexi tsakeke.” (1 Timotiya 1:11, NW) Tanihi Munyiki Lonkulu wa “nyiko yin’wana ni yin’wana leyo saseka ni minkateko hinkwayo leyi hetisekeke,” u nyika swivumbiwa swa yena hinkwaswo swo tlhariha—swa nyama ni swa moya—ku nga leswi swi swi lavaka leswaku swi tsaka entirhweni wa yena. (Yakobo 1:17) Malunghana ni sweswo, nyenyana leyi yimbelelaka, ximbyanyana lexi tlanga-tlangaka, kumbe nkava-va-nga-heti leyi tlangaka, hinkwaswo swi kombisa leswaku Yehova u vumbe swiharhi leswaku swi tsakela vutomi etindhawini ta swona. Hi ndlela yo phata, mupisalema u tlhela a vula ni leswaku “miri ya Yehova yi šurile, tona tikedar ta Lebanon leti a nga ti simeka.”—Psalma 104:16.
2. (a) I yini lexi kombaka leswaku Yesu u kume ntsako eku endleni ka ku rhandza ka Tata wa yena? (b) I swivangelo swihi swa ntsako leswi vadyondzisiwa va Yesu va veke na swona?
2 Yesu Kriste i ‘xikombiso lexi pakanisaka xa vumunhu bya Xikwembu.’ (Vaheveru 1:3) Kutani ke, a swi hlamarisi leswi Yesu a vuriwaka ‘la tsakeke ni Mufumi la nga yexe.’ (1 Timotiya 6:15) U hi nyika xikombiso lexinene xa ndlela leyi ku endla ku rhandza ka Yehova ku nga enerisaka swinene ha yona ku tlula swakudya, ku humesa ku tsaka lokukulu. Yesu nakambe u kombisa leswaku ku nga va ni ku tsaka loko munhu a chava Xikwembu, hi leswaku, hi xichavo lexikulu ni ku chava loku tengeke ko papalata ku xi hlundzukisa. (Psalma 40:8; Esaya 11:3; Yohane 4:34) Loko vadyondzisiwa va 70 va vuye “hi ku tsaka” endzhaku ka pfhumba ro ya eku chumayeleni ka Mfumo, Yesu hi yexe ‘u tsakisiwile swinene hi moya lowo kwetsima.’ Endzhaku ko phofula ku tsaka ka yena eka Tata wakwe hi xikhongelo, u hundzulukele eka vadyondzisiwa ivi a ku: “Ma katekile mahlo lama vonaka leswi mi swi vonaka! Hikuva ndza mi byela leswaku vaprofeta lavo tala ni tihosi leto tala, va naverile ku vona leswi mi swi vonaka, kambe a va swi vonanga; hambi ku ri ku twa leswi mi swi twaka, a va swi twanga.”—Luka 10:17-24.
Swivangelo Swo Tsaka
3. Hi swihi swivangelo swin’wana swa ntsako?
3 Xana mahlo ya hina a ma fanelanga ma tsaka hi ku vona swilo leswi hi swi vonaka swi hetisisa Rito ni swikongomelo swa Yehova enkarhini lowu wa makumu? Xana a hi fanelanga hi tsakisisa hi ku twisisa vuprofeta lebyi vaprofeta ni tihosi to tshembeka, tanihi Esaya, Daniyele na Davhida va tsandzekeke ku byi twisisa? Xana a swi hi tsakisi ku tirhela Yehova, Xikwembu lexi tsakeke, ehansi ka vurhangeri bya Mufumi la tsakeke, Hosi ya hina Yesu Kriste? Kavula, ha tsaka!
4, 5. (a) Leswaku hi tshama hi tsakile entirhweni wa Yehova, hi fanele hi papalata yini? (b) Hi swihi swin’wana leswi vangaka ntsako, naswona leswi swi tlakusa xivutiso xihi?
4 Hikwalaho, loko hi lava ku tshama hi tsakile entirhweni wa Xikwembu, hi nga tshuki hi veka swisekelo swa hina swa ntsako eka mianakanyo ya misava. Yona, yi nga hi pfala mahlo hi ku olova hi leswi yi katsaka ku fuwa hi swilo leswi vonakaka, vutomi bya manyunyu, sweswo-sweswo. “Ntsako” wihi na wihi lowu kumiweke eka swilo swo tano wu ta va wa nkarhinyana, hikuva misava leyi ya hundza.—1 Yohane 2:15-17.
5 Vo tala va malandza ya Yehova lama tinyiketeleke va xiye leswaku ku fikelela tipakani ta misava a swi nge wu tisi ntsako wa xiviri. I Tata wa hina wa le tilweni ntsena la nyikelaka swilo swa moya ni swa nyama leswi tisaka ntsako wa xiviri eka malandza ya yena. Vona ndlela leyi hi nkhensaka ha yona swakudya swa moya leswi hi swi kumaka hi ku tirhisa “nandza la tshembekaka, wo tlhariha”! (Matewu 24:45-47) Nakambe hi tsakela swakudya swa nyama ni swilo swin’wana leswi vonakaka leswi hi swi kumaka evokweni ra Xikwembu ra rirhandzu. Kutani ke, ku ni nyiko leyi vangamaka ya ku nghenela vukati ni mintsako leyi fambelanaka na yona ya vutomi bya ndyangu. A swi hlamarisi leswi ku navela ka mbilu ya Nahume eka vingi va yena lava nga tinoni ku hlamuseriweke hi marito lawa: “Yehova a mi nyike uṅwana ni uṅwana e ku ṭaka e ndlwini ya nuna wa yena.” (Ruti 1:9) Kutani vukati i xilotlelo lexi nga yisaka eka ntsako lowukulu. Kambe xana vukati hi xona ntsena xilotlelo lexi yisaka eka vutomi lebyi tsakisaka? Vantshwa ngopfu-ngopfu va fanele ku xiyisisa swinene loko leswi swi ri tano.
6. Hi ku ya hi Genesa, a ku ri xihi xikongomelo-nkulu xa lunghiselelo ra vukati?
6 Loko yi hlamusela masungulo ya vukati, Bibele yi ri: “Šikwembu ši endla munhu hi šifaniso ša šona. Ši ṅwi endla a fana ni Šikwembu; ši endla wanuna ni wansati. Šikwembu ši va katekisa ši ku ka v̌ona: Tŝalanani, mi anḍa, mi tata misav̌a, mi yi fuma.” (Genesa 1:27, 28) Hi ku simekiwa ka vukati hi Yehova, Adamu u tirhisiwe ku tswala swivumbiwa leswi engetelekeke swa vanhu, xisweswo a kurisa rixaka ra vanhu. Kambe ku ni leswi engetelekeke ku tlula leswi evukatini.
‘Ntsena eHosini’
7. I xilaveko xihi xa vukati lexi mupatriarka un’wana wo tshembeka a lweleke ku xi hetisisa?
7 Tanihi leswi Yehova Xikwembu a nga Musunguri wa vukati, u ni mfanelo yo veka mimpimanyeto ya vukati lebyi nga ta tisela malandza yakwe ntsako. Eminkarhini ya Vapatriarka, ku tekana ni lava nga riki vagandzeri va Yehova a ku nga pfumeleriwi. Abrahama u endla leswaku nandza wa yena Eliyazara a hlambanya hi Yehova leswaku a nge n’wi tekeli Isaka, n’wana wa mupatriarka, nsati exikarhi ka Vakanana. Eliyazara u teke riendzo ro leha, naswona u landzele swileriso swa Abrahama hi vukheta, leswaku a ta kuma ‘nsati loyi Yehova a n’wi hlawuleleke n’wana wa n’wini wa yena.’ (Genesa 24:3, 44) Kutani Isaka u teke Rebeka. Loko n’wana wa vona Esawu a hlawule vavasati exikarhi ka vahedeni va Vaheti, vavasati lava “v̌a ṭhama v̌a dyisa Isak na Rebeka e mbiṭi.”—Genesa 26:34, 35; 27:46; 28:1, 8.
8. I minsivelo yihi leyi ntwanano wa Nawu wu yi vekeke evukatini, naswona hikwalaho ka yini?
8 Ehansi ka ntwanano wa Nawu, ku tekana ni vavanuna kumbe vavasati lava nga va matiko yo karhi ya Vakanana a swi yirisiwile. Yehova u lerise vanhu va yena: “U nga ṭhuki u v̌a ni ku tekana na v̌ona; u nga ṭhuki u nyika v̌anhwanyana v̌a wena e ka v̌ana v̌a v̌ona; kambe u nga ṭhuki u tekela v̌ana v̌a wena e v̌anhwanyana v̌a v̌ona. Hikuv̌a v̌a ta hambukisa v̌ana v̌a wena kule na mina, v̌a ya tirela ŝikwembu ŝiṅwana, kutani v̌ukari bya Yehova i ngi byi ta mi pfurela, a mi heta kaṅwe.”—Deuteronoma 7:3, 4.
9. I xitsundzuxo xihi xa vukati lexi Bibele yi xi nyikaka Vakriste?
9 A swi hlamarisi leswi minsivelo leyi fanaka ya ku tekana ni lava nga riki vagandzeri va Yehova yi tirhaka ni le xikarhi ka bandlha ra Vukriste. Muapostola Pawulo u tsundzuxe vapfumeri-kulobye: “Mi nga rhwaleni mpingu wun’we ni lava nga riki vapfumeri; hikuva ku tirhisana ku kwihi exikarhi ka ku lulama ni ku homboloka xana? Kumbe ku vonakala ku ni ku yelana kwihi ni munyama ke? Xana Kriste na Lowo biha, va nga hela hi ku twanana xana? Kumbe mupfumeri a nga fambelana hi mukhuva wihi ni loyi a nga riki mupfumeri xana?” (2 Vakorinto 6:14, 15) Xitsundzuxo xexo xi tirha hi tindlela to hambana-hambana, naswona xa tirha hakunene eka ku nghenela vukati. Xitsundzuxo lexi twisisekaka xa Pawulo eka malandza hinkwawo lama tinyiketeleke eka Yehova i xa leswaku va fanele va kunguhata ku tekana ni munhu “ntsena loko a ri un’we ni Hosi.”—1 Vakorinto 7:39, NW, nhlamuselo ya le hansi.
Ku Hluleka Ku Teka ‘eHosini’
10. I yini lexi Vakriste vo tala lava nga nghenelangiki vukati va xi endlaka, naswona i xivutiso xihi lexi tlakukaka?
10 Vakriste vo tala lava nga si nghenelaka vukati va hlawule ku landzela xikombiso xa Yesu Kriste hi ku hlakulela nyiko yo titshamela voxe. Kutani ke, hikwalaho ka ku hluleka ku kuma munghana la chavaka Xikwembu kutani va teka ‘eHosini,’ Vakriste vo tala vo tshembeka va veke ntshembo wa vona eka Yehova, naswona va tshame va nga byi ngheneli vukati ku ri ni ku tekana ni la nga riki mupfumeri. Moya wa Xikwembu wu va nyika mihandzu yo tanihi ntsako, ku rhula, ripfumelo ni ku tikhoma, leyi va pfunaka ku hlayisa ku titshamela voxe loku tengeke. (Vagalatiya 5:22, 23) Exikarhi ka lava va hlangavetaneke ni ndzingo lowu wo tinyiketela eka Xikwembu hi laha ku humelelaka, ku ni nhlayo leyikulu ya vamakwerhu va xisati va Vakriste. Ematikweni yo tala, va tlula vamakwerhu va xinuna hi nhlayo, naswona va ni xiphemu lexikulu entirhweni wo chumayela. Ina, “[Yehova u] letela rito; kutani v̌av̌asati la’vo tala v̌a v̌ikela mahungu lamanene.” (Psalma 68:11) Kahle-kahle, vo tala va malandza ya Xikwembu ya xinuna ni ya xisati lama nga nghenelangiki vukati, ma hlayisa vutshembeki bya wona hikuva ma ‘tshemba Yehova hi timbilu ta wona hinkwato, naswona u ma basisela tindlela ta wona.’ (Swivuriso 3:5, 6) Xana swi vula leswaku lava sweswi va nga swi kotiki ku nghenela vukati ‘eHosini’ a va nge tsaki?
11. Vakriste lava titshameleke voxe hikwalaho ko xixima milawu ya Bibele va fanele va tiyiseka hi yini?
11 A hi tsundzukeni leswaku hi Timbhoni ta Yehova, Xikwembu lexi tsakeke, leti tirhaka ehansi ka Mufumi la tsakeke Yesu Kriste. Kutani loko ku xixima ka hina minsivelo leyi andlariweke kahle eBibeleni ku hi susumetela ku titshamela hexe hi leswi hi nga n’wi kumiki munghana wa vukati ‘eHosini,’ xana swa twala ku anakanya leswaku Xikwembu na Kriste va ta hi tshika hi nga tsakanga? Doo. Kutani ke, hi nga ha heta hi ku vula leswaku swa koteka ku tsaka tanihi Vakriste hambi loko hi nga byi nghenelanga vukati. Yehova a nga ha hi endla hi tsaka hambi loko hi nghenele vukati kumbe hi titshamele hexe.
Xilotlelo Xa Ntsako Wa Ntiyiso
12. Xana mhaka ya tintsumi leti nga yingisangiki yi kombisa yini hi ku nghenela vukati?
12 Vukati a hi xilotlelo xi ri xoxe xo kuma ntsako eka malandza hinkwawo ya Xikwembu. Hi xikombiso, vona tintsumi. Emahlweni ka Ndhambi, tintsumi tin’wana ti hlakulele ku navela loku nga riki ka ntumbuluko eka swivumbiwa swa moya, ti sungula ku nga anariseki hi leswi ti nga ta ka ti nga ngheneli vukati, kutani ti ambala mimiri ya nyama leswaku ti ta kota ku teka vavasati tanihi vasati va tona. Hikwalaho ka leswi tintsumi leti ti ‘sukeke laha a ku ri kaya ka tona,’ Xikwembu xi “bohile tintsumi ta kona hi tinketani, xi ti pfalela hi laha ku nga heriki exinyamini lexi chavisaka ku fikela siku lerikulu ra ku avanyisiwa.” (Yuda 6; Genesa 6:1, 2) Entiyisweni, Xikwembu a a xi nga lunghiselelanga leswaku tintsumi ti teka. Kutani ke, ku nghenela vukati a ku vanga xilotlelo xa ntsako eka tona.
13. Ha yini tintsumi to kwetsima ti tsakile, naswona leswi swi kombisa yini eka malandza hinkwawo ya Xikwembu?
13 Kambe, tintsumi leto tshembeka ti tsakile. Yehova u andlale masungulo ya misava ivi “tinyeleti ta mixo ti ba huwa ya ku tsaka ni vana va Xikwembu [va tintsumi] va yimbelela hi vun’we.” (Yobo 38:7, The New Jerusalem Bible) Ha yini tintsumi to kwetsima ti tsakile? Hikuva minkarhi hinkwayo ti tirhela Yehova Xikwembu, “ti yingisa mpfumawulo wa rito ra yena” leswaku ti ri hetisisa swinene. Ti tsakela ku “endla leswi n’wi tsakisaka.” (Psalma 103:20, 21, NW, nhlamuselo ya le hansi) Ina, ntsako wa tinsumi leto kwetsima wu huma eka ku tirhela Yehova hi ku tshembeka. Sweswo i xilotlelo xa ntsako wa ntiyiso ni le ka vanhu. Hikwalaho, Vakriste lava totiweke lava tekeke, lava sweswi va tirhelaka Xikwembu hi ntsako, a va nge ngheneli vukati loko va pfuxeriwe evuton’wini bya le tilweni, kambe va ta va lava tsakeke tanihi swivumbiwa swa moya leswi endlaka ku rhandza ka Xikwembu. Ku nga khathariseki leswaku va nghenele vukati kumbe e-e, malandza layo tshembeka hinkwawo ya Yehova ya nga tsaka hikuva swisekelo swa ntiyiso swa ntsako i ntirho wo tshembeka eka Muvumbi.
“[Swi] Tlula . . . V̌afana Ni V̌anhwana”
14. I xitshembiso xihi xa vuprofeta lexi nyikiweke vatsheniwa lava chavaka Xikwembu le Israyele wa khale, naswona ha yini leswi swi nga ha vonakaka swi nga tolovelekanga?
14 Hambi loko Mukriste la tshembekaka a nga ngheneli vukati, Xikwembu xi nga endla leswaku a tsaka. Xikhutazo xi nga kumiwa eka marito lawa hi vuprofeta ya kongomisiweke eka vatsheniwa va Israyele wa khale: “Hikuv̌a Yehova o v̌urisa ŝeŝo, a ku: E ka v̌aṭheniwa la’v̌a nga ta hlayisa tisabata ta mina, la’va nga ta hlawula le’ŝi nḍi ṭakisaka, la’v̌a nga ta tiyisela e ntwananweni wa mina, nḍi ta v̌a nyika e ndlwini ya mina ne rihlampfini ra mina e v̌uṭhamo ni v̌ito le’ri nga ta tlula ra v̌afana ni v̌anhwana; nḍi ta v̌a nyika v̌ito le’ri nga heriki, leri nga hlanguriwiki.” (Esaya 56:4, 5) Munhu a nga ha va a langutele leswaku vanhu lava a va ta tshembisiwa nsati ni vana leswaku va ta kurisa mavito ya vona. Kambe va tshembisiwe swin’wana swo “tlula . . . v̌afana ni v̌anhwana”—vito leri nga ta tshama hi laha ku nga heriki endlwini ya Yehova.
15. Ku nga vuriwa yini hi ku hetiseka ka Esaya 56:4, 5?
15 Loko vatsheniwa lava va tekiwa tanihi mhaka yo fanekisela ya vuprofeta leyi katsaka “Israel wa Šikwembu,” va yimela vatotiwa lava amukelaka vutshamo lebyi nga heriki endlwini ya Yehova ya moya, kumbe tempele. (Vagalatiya 6:16, BX) Handle ko kanakana, vuprofeta lebyi byi ta tirha hi ku kongoma eka vatsheniwa va Xikwembu va Israyele wa khale lava pfuxiwaka. Loko va amukela gandzelo ra nkutsulo ra Kriste ni loko va hambeta va hlawula leswi Yehova a swi lavaka, va ta amukela “v̌ito le’ri nga heriki” emisaveni leyintshwa ya Xikwembu. Leswi nakambe swi ta tirha ni le ka lava va “tinyimpfu tin’wana” enkarhini lowu wa makumu, lava tshikaka ku nghenela vukati ni ku veleka vana leswaku va ta tinyiketela hi laha ku heleleke entirhweni wa Yehova. (Yohane 10:16) Van’wana va vona va nga ha fa va nga byi nghenelanga vukati naswona va nga ri ni vana. Kambe loko va tshembekile, eku pfuxiweni ka vafi va ta amukela ‘swin’wana leswi tlulaka vafana ni vanhwana’—vito leri “nga heriki, le’ri nga hlanguriwiki” efambiselweni lerintshwa ra swilo.
Vukati A Hi Xilotlelo Xi Ri Xoxe Xa Ntsako
16. Ha yini ku nga ha vuriwaka leswaku a hi minkarhi hinkwayo ku nghenela vukati ku tisaka ntsako?
16 Vanhu van’wana va vona onge ntsako wu kumeka ntsena loko u nghenela vukati. Hambi swi ri tano, hi fanele ku pfumela leswaku hambi ku ri exikarhi ka malandza ya Yehova namuntlha, a hi minkarhi hinkwayo ku nghenela vukati swi tisaka ntsako. Swi tlhantlha swiphiqo swin’wana, kambe hakanyingi swi nga tisa swiphiqo swo nonon’hwa ku langutana na swona ku tlula leswi tokotiwaka hi vanhu lava titshameleke voxe. Pawulo u vule leswaku ku nghenela vukati swi tisa ‘mahlomulo enyameni.’ (1 Vakorinto 7:28) Ku ni minkarhi yin’wana leyi munhu la ngheneleke vukati a ‘vilelaka’ ni ku ‘avana.’ Minkarhi yo tala u swi kuma swi nonon’hwa ku ‘tirhela Hosi hi ku chivirika, handle ko kavanyeteka.’—1 Vakorinto 7:33-35.
17, 18. (a) I yini lexi valanguteri van’wana lava famba-fambaka va xi vikeke? (b) I xitsundzuxo xihi lexi Pawulo a xi nyikeleke, naswona ha yini swi ri swa nkoka ku xi tirhisa?
17 Ku nghenela vukati ni ku nga byi ngheneli havumbirhi i nyiko ya Xikwembu. (Ruti 1:9; Matewu 19:10-12) Hambi swi ri tano, leswaku u humelela eka swona, ku anakanyisisa hi xikhongelo i swa nkoka. Valanguteri lava famba-fambaka va vika leswaku Timbhoni to tala ti nghenela vukati ta ha ri titsongo swinene, hakanyingi va va vatswari va nga si lulamela ku byarha vutihlamuleri lebyi. Byin’wana bya vukati byo tano bya onhaka. Mimpatswa yin’wana ya swi kota ku langutana ni swiphiqo swa yona, kambe vukati bya yona a byi yi tiselanga ntsako. Hi laha William Congreve, mutsari wa mintlango wa Munghezi a tsaleke ha kona, lava va ngheneleke vukati hi ku hatlisa “va nga tisola hi ku famba ka nkarhi.”
18 Valanguteri van’wana lava famba-fambaka va vike leswaku vamakwerhu van’wana va xinuna lavantshwa va papalata ku endla xikombelo xa ntirho wa le Bethele kumbe ku tiendla va kumeka eka Xikolo xa Ndzetelo wa Vutirheli hi mhaka ya ku chava xilaveko xo tshama malembenyana va nga tekanga. Kambe muapostola Pawulo u tsundzuxa leswaku munhu a nga byi ngheneli vukati a nga si “hundza ku baleka ka vuntshwa bya yena,” hi leswaku, ku yima ku fikela loko ku navela loku nga lawulekiki ka rimbewu ku hungutekile. (1 Vakorinto 7:36-38, NW) Malembe lama u ma heteke u titshamele wexe ma ku nyika ntokoto wa nkoka ni vutlhari, ma ku veka eka xiyimo lexi antswaka xo hlawula munghana wa vukati kumbe ku endla xiboho lexi kambisisiweke kahle xo titshamela wexe.
19. Hi nga xi tekisa ku yini xiyimo loko hi nga ri na xilaveko xo nghenela vukati?
19 Van’wana va hina hi hundzile eka ku baleka ka vuntshwa, ni nyanyuko wa kona wa matimba wa vuxaka bya rimbewu. Nkarhi wun’wana hi nga ha anakanya hi mikateko ya ku nghenela vukati kambe kahle-kahle hi ri na yona nyiko yo titshamela wexe. Yehova a nga vona hi n’wi tirhela hi laha ku humelelaka loko hi titshamela hexe, naswona hi ri hava xilaveko xo nghenela vukati, lexi nga hi endlaka leswaku hi tshiketa malunghelo man’wana entirhweni wa yena. Loko vukati ku nga ri xilaveko naswona hi nga n’wi kumi munghana, Xikwembu xi fanele xi ri ni swin’wana leswi xi hi vekeleke swona. Kutani ke, a hi tshembeni leswaku xi ta hi nyika leswi hi swi lavaka. Ntsako lowukulu wu huma eka ku amukela leswi swi vonakaka swi ri ku rhandza ka Xikwembu eka hina hi ku titsongahata, hi laha vamakwerhu va Vayuda va ‘tsakeke ni ku dzunisa Xikwembu’ ha kona hi ku vona leswaku xi amukele Vamatiko lava hundzukeke leswaku va ta kuma vutomi.—Mintirho 11:1-18.
20. (a) Hi xihi xitsundzuxo xo titshamela wexe lexi laha xi nyikiwaka Vakriste lavantshwa? (b) I yinhla-nkulu yihi mayelana ni ntsako leyi tshamaka yi ri ntiyiso?
20 Kutani ke, ku nghenela vukati ku nga va xilotlelo xa ntsako, kambe ku nga ha tlhela ku pfula nyangwa wa vutomi bya swiphiqo. Ntiyiso i wun’we: Ku nghenela vukati a hi yona ntsena ndlela yo kuma ntsako. Swilo hinkwaswo swi kambisisiwile, xisweswo swi nga va swinene eka muntshwa wa Mukriste ku ringeta ku pfumelela ku titshamela yexe ku ringana malembenyana. Malembe yo tano ya nga ha tirhisiwa kahle ku tirhela Yehova ni ku kula emoyeni. Hambi swi ri tano, ku nga khathariseki malembe kumbe nhluvuko wa moya, yinhla leyi ya xisekelo yi tshama yi ri ntiyiso eka hinkwavo lava tinyiketeleke hi ku helela eka Xikwembu: Ntsako wa ntiyiso wu ta hi ku tirhela Yehova hi ku tshembeka.
A Wu Ta Hlamurisa Ku Yini?
◻ Ha yini malandza ya Yehova ma tsakile?
◻ Ha yini ku nghenela vukati ku nga ri xilotlelo xa ntsako lowukulu?
◻ Loko va hlawula munghana wa vukati, ku laveka yini eka vanhu va Yehova?
◻ Ha yini swi twala ku pfumela leswaku Vakriste lava titshameleke voxe va nga tsaka?
◻ I yini lexi faneleke ku pfumeriwa hi ku nghenela vukati ni ntsako?