Xana Wu Nga Kumiwa Kwihi Ntsako Wa Ntiyiso?

VANHU vo tala va vona onge ntsako wu nga kumiwa hi ku hlengeleta rifuwo ro tala. Xana wena u swi vona njhani? Hambiloko swilo leswi vonakaka swi nga ha hi tiselaka ntsako, a swi wu tiyisekisi; naswona ku tshamiseka a ku nge ri aki ripfumelo kumbe ku enerisa swilaveko swa moya.

EDyondzweni yakwe ya le Ntshaveni, Yesu Kreste u te: “[Swa tsaka] swisiwana emoyeni, hikuva Mfumo wa matilo i wa swona.” (Matewu 5:3) Yesu u tlhele a ku: “Mi tivonela eka makwanga wahi ni wahi, hikuva vutomi bya munhu a byi humi eka swilo leswi a swi fuweke hambiloko swi n’wi talele ngopfu.”—Luka 12:15.

Vo tala va lava ntsako hi ku nghenela rimbewu leri nga riki enawini ni ‘mintirho yin’wana ya nyama.’ (Vagalatiya 5:19-21) Hambiswiritano, ku tinyiketela eka ntsako wa nyama a swi wu tisi ntsako wa ntiyiso ni lowu khomelelaka. Entiyisweni, lava endlaka swilo leswo tano a va nge dyi ndzhaka ya Mfumo wa Xikwembu.—1 Vakorinto 6:9, 10.

Van’wana va herisa torha ra vona ra ku lava ntsako hi ku ringeta ku tixixima. Tilayiburari ni switolo leswi xavisaka tibuku swi tele hi tibuku ta ku hluvukisa vutomi bya munhu, kambe tibuku to tano a ti va nyikanga vanhu ntsako lowu nga heriki. Hikwalaho, xana ntsako wa xiviri hi nga wu kuma kwihi?

Leswaku hi ta va lava tsakeke hakunene, hi fanele hi xiya xilaveko xa moya lexi hi tswariweke hi ri na xona. Yesu u te: “[Swa tsaka] swisiwana emoyeni.” Kavula, a swi nga ta hi pfuna nchumu loko hi twisisa leswi leswi swi vulaka swona kambe hi nga endli nchumu ha swona. Hi xikombiso: Xana a ku ta humelela yini eka xitsutsumi lexi endzhaku ka mphikizano xi tsandzekaka ku enerisa ku navela ka miri wa xona mati? Xana a xi nga ta heleriwa hi mati hi ku hatlisa ni vuyelo byin’wana byo chavisa? Hi ku fanana, loko hi tsandzeka ku angula eka xilaveko xa hina xa swakudya swa moya, eku heteleleni hi ta tsana hi tlhelo ra moya. Leswi swi ta endla leswaku hi lahlekeriwa hi ntsako.

Yesu u xiye xilaveko xakwe xa moya hi ku hetiseka, a dyondza ni ku anakanyisisa hi Rito ra Xikwembu nkarhi na nkarhi. A a kota ku kuma ni ku hlaya swiyenge swa Matsalwa layo Kwetsima hi ku olova, naswona u dyondzise van’wana leswaku va endla leswi fanaka. (Luka 4:16-21; ringanisa Vaefesa 4:20, 21.) Yesu u tlhele a fanisa ku endla ku rhandza ka Tata wakwe wa le tilweni ni swakudya. Ku endla ku rhandza ka Xikwembu ku n’wi tisele ntsako lowukulu.—Yohane 4:34.

Ina, ntsako wa ntiyiso a wu nge kumiwi hi ku hlengeleta rifuwo; naswona ntsako a wu kumiwi hi ku enerisa nyama leyi nga ni vudyoho. Ntsako wa ntiyiso i xiyimo xa mbilu, lexi sekeriweke eripfumelweni ra xiviri ni vuxaka lebyinene na Yehovha Xikwembu. Kutani hilaha ku faneleke, mupisalema Davhida u yimbelerile: “[Ra tsaka] tiko leri Yehova a nga Šikwembu ša rona!”—Pisalema 144:15b.

[Xifaniso lexi nga eka tluka 23]

Ku va ni ripfumelo ni vuxaka lebyinene ni Xikwembu swi nga ku tisela ntsako wa xiviri