“Nsimu Ya Ka Hina Hi Yi Tirhe Ko Tala!”

¹ Xana u tshama u twa onge nsimu ya ka n’wina yi tirhiwe ko tala lerova a ya ha ri na vanhu lava fanaka ni tinyimpfu? Kumbexana u teriwe hi mianakanyo leyi: ‘Ndzi tiva ndlela leyi vanhu va nga ta angula ha yona. Ha yini hi fanele ku hambeta hi tlhelela eka vanhu lava nga tsakeriki?’ I ntiyiso leswaku tinsimu to tala ti tirhiwa ko tala. Hambiswiritano, hi fanele ku va ni langutelo lerinene hi mhaka leyi. Hikwalaho ka yini? Xiya swivangelo swa mune leswi nyikiweke laha hansi.

² Swikhongelo Swa Hina Swi Hlamulekile: Yesu u te: “Hakunene, ntshovelo i wukulu, kambe vatirhi a hi vangani. Hikokwalaho kombelani N’wini wa ntshovelo leswaku a rhumela vatirhi entshovelweni wa yena.” (Luka 10:2) Se ku hundze makume ya malembe hi ri karhi hi kombela Yehovha leswaku a hi nyika vatirhi lava engetelekeke. Etindhawini to tala, sweswi hi ni vatirhi lava engetelekeke lava a va laveka naswona hi hlanganisa nsimu ko tala. Xana a hi fanelanga hi tsakisiwa hi mhaka ya leswaku Yehovha u hlamule swikhongelo swa hina?

³ Ku Phikelela Ku Veka Mihandzu Leyinene: Hambi ku ri emasin’wini lama tirhiwaka ko tala, vanhu va ha amukela rungula ra Mfumo naswona va kuma vutivi bya ntiyiso. Hikwalaho hi fanele ku ya eka vanhu hi ku phindha-phindha hi ri ni ntshembo wa leswaku hi ta kuma vanhu lava engetelekeke va timbilu to tshembeka. (Esa. 6:8-11) Hilaha vadyondzisiwa vo sungula va Yesu va endleke hakona, ‘a hi hambeteni hi ya’ eka vanhu va nsimu ya ka hina, hi lwela ku pfuxa ku tsakela ka vona Mfumo wa Xikwembu.—Mat. 10:6, 7.

⁴ EPortugal mavandlha yo tala ma hlanganisa nsimu ya wona vhiki rin’wana ni rin’wana, kambe ka ha kumeka vanhu lava fanaka ni tinyimpfu. Makwerhu un’wana wa xisati u ni langutelo lerinene. U ri: “Mixo wun’wana ni wun’wana ndzi nga si ya ensin’wini, ndzi khongela Yehovha leswaku a ndzi pfuna ndzi kuma munhu la nga tsakelaka ku dyondza Bibele.” Siku rin’wana u hlele ku dyondza ni vanhu lava tirhaka endhawini yo lunghisa misisi. Kambe, endzhakunyana ku te munhu un’we a ta dyondza. Munhu yoloye u te: “Vanhu lavaya a va tsakeli, hi mina ntsena ndzi tsakelaka.” Ku nga si hela n’hweti, munhu yoloye a a fambisa tidyondzo timbirhi ta Bibele ta yena n’wini. Hi ku hatlisa endzhaku ka sweswo u khuvuriwile kutani endzhaku a nghenela ntirho wa vuphayona!

⁵ Ntirho Wa Endliwa: Mahungu lamanene ma karhi ma chumayeriwa, hilaha Yesu a profeteke hakona. (Mat. 24:14) Hambi ku ri etindhawini leti vanhu va nga ‘swi laviki ku hi yingisa,’ ntirho wa ku chumayela wa va lemukisa. Hi swi rindzerile leswaku van’wana swi nga endleka va nga wu amukeli ntiyiso kumbe va wu kaneta. Kambe, swi fanerile leswaku vanhu vo tano va lemukisiwa hi ku avanyisa ka Yehovha loku taka.—Ezek. 2:4, 5; 3:7, 8, 19.

⁶ A Hi Si Heta: A swi le mandleni ya hina ku endla xiboho xa nkarhi wa ku tshika ntirho wa ku chumayela. Yehovha u wu tiva kahle nkarhi lowu faneleke. Wa swi tiva loko va ha ri kona kumbe va nga ha ri kona vanhu lava nga amukelaka mahungu lamanene ensin’wini ya ka hina. Namuntlha, vanhu van’wana va vula leswaku a va tsakeli, kambe ku cinca lokukulu evuton’wini bya vona—ku lahlekeriwa hi ntirho, ku hlaseriwa hi vuvabyi lebyi xungetaka vutomi, ku feriwa hi loyi u n’wi rhandzaka—ku nga endla leswaku va tsakela enkarhini wun’wana. Hikwalaho ka xihlawuhlawu kumbe ku tshama va khomekile lerova va tsandzeka ni ku rhiya ndleve, vanhu vo tala a va si tshama va ri twa rungula leri hi ri chumayelaka. Ku va endzela ko tala mi tiyisa vunghana swi nga va xalamukisa kutani va sungula ku yingisela.

⁷ Lava va nga kula emalembeni ya sweswinyana naswona se va nga ni mindyangu ya vona, va sungule ku teka vutomi byi ri bya risima naswona va tivutisa swivutiso leswi nga hlamuriwaka hi Rito ra Xikwembu ntsena. Manana un’wana la ha riki muntshwa u amukele Timbhoni timbirhi ekaya ra yena kutani a ku: “Loko ndza ha ri xinhwanyetana a ndzi nga swi twisisi leswaku ha yini manana a hlongola Timbhoni a ti byela leswaku a nga tsakeli, kasi a to lava ku bula hi Bibele ntsena. Ndzi tibyele leswaku loko ndzi kula, ndzi tekiwa kutani ndzi va ni muti wa mina, ndzi ta kombela Timbhoni ta Yehovha leswaku ti ndzi endzela ti ta ndzi hlamusela Bibele.” U endle tano kutani sweswo swi tsakise Timbhoni leti n’wi endzeleke.

⁸ Xana U Nga Endla Leswi Engetelekeke? Minkarhi yin’wana a hi vanhu lava hi yaka eka vona lava endlaka leswaku swi tika ku tirha nsimu leyi hlanganisiwaka ko tala. Minkarhi yin’wana hi hina. Xana hi sungula hi ri ni mavonelo lama hoxeke? Sweswo swi nga khumba langutelo ra hina kumbexana ni mavulavulelo ya hina ni ndlela leyi hi langutekaka ha yona enghoheni. Kombisa ku va ni langutelo lerinene naswona nghohe ya wena a yi kombise leswaku u tsakile. Ringeta ku tirhisa xingheniso lexintshwa. Cinca-cinca rungula ra wena naswona u lwela ku ri antswisa. Kumbexana u nga ha cinca xivutiso xa wena lexi u sungulaka bulo ha xona kumbe u tirhisa tsalwa rin’wana ebulwini ra wena. Vutisa vamakwerhu van’wana leswi va swi kumeke swi tirha hi ndlela leyi humelelaka loko va ri ensin’wini leyi. Tirha nsimu ni vahuweleri vo hambana-hambana ni maphayona kutani u xiya lexi endlaka va humelela evutirhelini bya vona.

⁹ Ntirho wa ku chumayela hi Mfumo wu huma eka Yehovha naswona wa wu katekisa, kutani ku hlanganyela ka hina eka wona ku kombisa leswaku ha n’wi rhandza naswona hi rhandza vaakelani va hina. (Mat. 22:37-39) Hikwalaho a hi endleni ntirho wa hina kukondza wu hela, hi nga hetiwi matimba hi ku tirha nsimu ko tala.