Hambeta U “Endla Leswi Nga Swinene”
1 U endle leswinene hi ku va nandza wa Yehovha Xikwembu. Kambe, sweswi ntlhontlho lowu u langutaneke na wona eminkarhini leyi ya mangava i ku hambeta u “endla leswi nga swinene.” (Gal. 6:9) Hambileswi swi lavaka leswaku u endla matshalatshala lamakulu, u nga humelela. Njhani?
2 Hlakulela Xiyimo Xa Mianakanyo Xa Yesu: U nga swi kota ku tiyiselela miringo ku fana na Yesu hi ku tshama u anakanya hi ntshembo wa Mfumo. (Hev. 12:2, 3) Tiyiseka leswaku Yehovha wa ku rhandza ni leswaku u lava u humelela. (2 Pet. 3:9) N’wi tshembe hi mbilu ya wena hinkwayo, u tiyiseka leswaku u ta ku pfuna. (1 Kor. 10:13) Phikelela exikhongelweni, u kombela Yehovha a ku pfuna u tiyisela. (Rhom. 12:12) Tsakisiwa hi ntshembo wa leswaku ku tiyisela ka wena ku ta endla leswaku Xikwembu xi ku amukela. (Rhom. 5:3-5) Ku tshembeka ka wena eku hlakuleleni ka “langutelo ra mianakanyo leri fanaka ni leri Yesu Kreste a a ri na rona,” ku ta ku tisela ku eneriseka naswona ku tsakisa mbilu ya Yehovha.—Rhom. 15:5; Swiv. 27:11.
3 Hambeta U Endla Mintirho Leyinene: Ma tirhise hi xitalo malunghiselelo lawa Yehovha a ma endleleke vanhu va yena leswaku a va pfuna ku hambeta va endla mintirho leyinene. Namarhela xiyimiso lexinene xa ku hlaya Rito ra Xikwembu ni ku dyondza minkandziyiso leyi sekeriweke eBibeleni ya hlonga ro tshembeka ni ro tlhariha. Hi vutshembeki, lunghiselela minhlangano hinkwayo, u ya eka yona u tlhela u nyikela tinhlamuselo. Loko minhlangano ya Vukreste yi nga si sungula ni loko yi herile, burisana ni vamakwenu va moya. Tivekele tipakani leti u nga ti fikelelaka evutirhelini bya wena leswaku u ta hlanganyela ensin’wini u ri ni xikongomelo naswona u antswisa vuswikoti bya wena bya ku byela van’wana mahungu lamanene.
4 Leyi i ndlela leyi u nga hambetaka u endla leswinene ha yona, u tlhela u kuma ntsako lowu engetelekeke. Malunghana ni mhaka leyi, makwerhu wa le Italiya u te: “Nimadyambu loko ndzi muka endzhaku ko heta siku ndzi ri entirhweni wa Yehovha, i ntiyiso leswaku a ndzi tikoti hi ku karhala. Kambe ndzi va ndzi tsakile naswona ndzi nkhensa Yehovha ku va a ndzi nyike ntsako lowu ku nga riki na munhu la nga wu wutlaka eka mina.” Hilaha ku fanaka, hambeta u endla leswinene kutani na wena u ta kuma ntsako lowukulu.