Xana U Na Yona Nsimu Ya Wena N’wini?

1. I yini nsimu ya wena n’wini?

¹ Nsimu ya wena n’wini hi leyi u tikombelelaka yona ivi u yi tirha. Yi nga ha va yi ri laha u kotaka ku fika kona hi ku hatlisa naswona u chumayela u ri wexe kumbe ni muhuweleri un’wana. Hambileswi swi nga swinene ku seketela malunghiselelo yo chumayela swin’we ni swirho swa vandlha loko swi koteka, swa pfuna ku pfa hi va ni nsimu ya hina vini leswaku hi ta kota ku wu endla hilaha ku hetisekeke ntirho wo chumayela, ngopfu-ngopfu emavandlheni lama nga ni masimu lamakulu.—Mint. 10:42.

2. Hi swihi swin’wana leswi ku va ni nsimu ya wena n’wini swi pfunaka ha swona?

² Vuyelo Bya Ku Va Na Yona: Van’wana va kume vuyelo lebyi engetelekeke loko va chumayela ensin’wini leyi va tikombeleleke yona leyi nga le kusuhi ni laha va tirhaka kona leswaku va ta kota ku chumayela hi nkarhi wo wisa ninhlikanhi kumbe hi ku hatlisa loko va chayisa entirhweni. Van’wana va lava leswaku va heta awara kumbe ku tlula, va ri karhi va chumayela swin’we tanihi ndyangu ekusuhi ni le kaya, va nga si ya eka Dyondzo ya Buku ya Vandlha. Sweswo swi endle leswaku maendzo yo vuyela ni tidyondzo ta Bibele swi va ekusuhi ni le kaya kutani swi hlayisa mali ni nkarhi naswona munhu a nga karhali. Tanihi leswi nkarhi wo tala va wu hetaka va ri eku chumayeleni, van’wana va kuma leswaku ku va ni nsimu ya vona vini swi va pfulela nkarhi wo va maphayona ya nkarhinyana ko talanyana kumbe va va maphayona ya nkarhi hinkwawo. Ku tlula kwalaho, ku va ni nsimu ya wena n’wini ni ku tolovelana ni vini va miti swi endla leswaku mabulo ya hina ma pfumelelana ni swilaveko swa vona ni leswi swi va karhataka kutani swi endla leswaku ntirho wa hina wo chumayela wu veka mihandzu yo tala.

3. Hi wihi ntokoto lowu phayona rin’wana ri veke na wona hikwalaho ka leswi ri nga ni nsimu ya rona?

³ Phayona rin’wana leri khutaziweke hi mulanguteri wa xifundzha leswaku ri va ni nsimu ya rona ri ri: “Ndzi xi amukerile xitsundzuxo lexi kutani ku nga ri khale ndzi tolovelane ni vini va miti va nsimu leyi ndzi averiweke yona hi tlhela hi va vanghana. Ndzi endle leswaku ndzi va endzela hi nkarhi lowu pfumelelanaka ni swiyimo swa vona. Sweswo swi endle leswaku maendzo ya mina yo vuyela ya 35 ma andza ma tlula 80 hi n’hweti, nakambe ndzi ni tidyondzo ta Bibele ta nkombo.”

4. Xana u nga yi kuma njhani nsimu ya wena n’wini naswona u nga yi tirha njhani?

⁴ Ndlela Yo Swi Endla: Loko u lava ku va ni nsimu ya wena n’wini, vulavula ni makwerhu la tamelaka masimu. U nga chavi ku kombela muhuweleri un’wana leswaku a tirha na wena naswona u tsala tindlu hinkwato leti nga riki na vanhu. U fanele ku tikarhatela ku hlanganisa nsimu yoleyo ku nga si hundza tin’hweti ta mune. Loko u tsandzeka, kombela mpfuno eka mulanguteri wa Dyondzo ya Buku ya Vandlha leyi u hlanganyelaka eka yona kumbe eka vahuweleri van’wana. Loko tin’hweti ta mune ti herile, u nga ha tlherisa khadi ra nsimu yoleyo kumbe u kombela ku tlhela u yi tirha. Hambiswiritano, u nga tshami ni khadi ra yona hilaha ku nga heriki kambe ri tlherise leswaku van’wana va ta kota ku kombela nsimu yoleyo, va yi tirha na vona. Loko u ri evandlheni leri nga ni nsimu leyitsongo kutani swi nga koteki ku va ni nsimu ya wena n’wini, kumbexana u nga kombela xiphemu xa nsimu yo karhi eka mulanguteri wa dyondzo ya buku ya wena.

5. I yini lexi lavekaka leswaku hi kota ku endla ntirho wa hina wo chumayela hilaha ku hetisekeke?

⁵ Ntirho wa hina wo chumayela “emisaveni hinkwayo leyi akiweke” a hi matlangwana. (Mat. 24:14) Wu lava leswaku matshalatshala yo wu endla ma kongomisiwa hi mfanelo. Ku seketela ntirho wo chumayela hi ri ntlawa hi ku va ni nsimu ya munhu hi yexe swi ta hi pfuna leswaku hi fikelela vanhu vo tala hilaha swi nga kotekaka hakona leswaku hi va chumayela mahungu lamanene.