Loko Ku Nga Ri Na Munhu Ekaya
1. Hi xihi xiphiqo lexi tolovelekeke lexi hi langutanaka na xona masiku lawa loko hi ri karhi hi chumayela hi yindlu ni yindlu?
1 Etindhawini to tala swi ya swi tika ku kuma vanhu emakaya. ‘Eminkarhini leyi ya mangava,’ vo tala va boheka ku tirha tiawara to tala leswaku va ta kota ku kuma xo yisa enon’wini. (2 Tim. 3:1) Van’wana va va va ye eku xaveni kumbe va ye eku hungaseni. Xana hi nga swi kotisa ku yini ku byela vanhu volavo mahungu lamanene?
2. Xana hi fanele hi endla yini leswaku tindlu leti hi nga kumangiki munhu eka tona ku tlheleriwa eka tona?
2 Tsala Rungula Leri Lavekaka: Goza ro sungula i ku tsala tindlu leti u nga kumangiki munhu eka tona. Sweswo i swa nkoka ngopfu-ngopfu loko mi tshamela ku phindha-phindha nsimu ya n’wina. Xana wa tsala vito ra xitarata, nomboro ya nsimu, vito ra wena ni siku ra kona? U nga ha siya ndhawu yo tsala rungula rin’wana leri engetelekeke laha wena kumbe muhuweleri un’wana a nga ta tsala swo karhi loko a vuyela eka tindlu teto. Loko u heta nsimu yoleyo, tsundzuka ku hundzisela xiphephana xexo eka loyi a nga ta teka khadi ra nsimu yoleyo, handle ka loko a pfumele leswaku u tlhela u ya tirha tindlu toleto u nga kumangiki munhu eka tona. Tsala mavito ya vanhu lava tsakelaka eka xiphephana xin’wana leswaku u ta tlhelela eka vona.
3. Hi swihi swiringanyeto swin’wana swo vulavula ni vanhu lava u nga va kumangiki emakaya?
3 Ringeta Ku Ya Hi Nkarhi Wun’wana: Kumbexana van’wana lava u nga va kumangiki emakaya ninhlikanhi va nga ha kumeka nimadyambu kumbe hi mahelo-vhiki. Xana u nga hlela xiyimiso xa wena leswaku u tlhelela hi nkarhi lowu va kumekaka ha wona? (1 Kor. 10:24) Loko swi nga ri tano, u nga ha nyika muhuweleri un’wana xiphephana xexo xa lava nga riki kona ekaya leswaku a tlhelela hi nkarhi wun’wana. Kumbexana lava u nga va kumangiki emakaya u ngo va tsalela mapapila kumbe u ringeta ku va bela riqingho. Vahuweleri lava rihanyo ra vona ri va sivelaka ku famba hi yindlu ni yindlu va nga ha tsakela ku ku pfuna ku endla tano.
4. Hi xihi xikombiso lexi kandziyisaka nkoka wa ku tlhelela etindlwini leti ku nga kumiwangiki munhu eka tona?
4 Ku ni mhaka yin’wana leyi kombisaka ndlela leyi swi nga swa nkoka ha yona ku tlhelela etindlwini leti ku nga kumiwangiki munhu eka tona. Endzhaku ka loko vahuweleri va tlhelele endlwini yin’wana ku ringana malembe manharhu, va hetelele va n’wi kumile n’wini wa muti. Va kume leswaku nkarhi wolowo hinkwawo a a yimele ku endzeriwa hi Timbhoni leswaku a ta ya emahlweni ni dyondzo yakwe ya Bibele leyi a a ri na yona a nga si rhurhela endhawini yoleyo.
5. Hiloko swi te yihi laha nsimu yi vuriwaka leswaku yi tirhiwe hinkwayo?
5 Hetani Nsimu Ya N’wina: Hiloko swi te yini laha nsimu yi vuriwaka leswaku yi tirhiwe hinkwayo? Hi ntolovelo, hiloko ku endliwe matshalatshala yo vulavula ni munhu wo karhi emutini ha wun’we. Swi nga ha va swinene ku siya xiphephana kumbe magazini wa khale hi vutlhari emakaya lawa ku nga kumiwangiki munhu eka wona, ngopfu-ngopfu emasin’wini lawa ma tirhiwaka nkarhi na nkarhi. Nsimu yi fanele yi hetiwa hi tin’hweti ta mune. Kutani yi fanele yi tlheriseriwa eka mulanguteri wa nsimu leswaku a ta tsala efayeleni ya yena leswaku yi tirhiwile.
6. Ha yini hi fanele hi ringeta ku chumayela mahungu lamanene eka un’wana ni un’wana la nga ensin’wini ya hina?
6 Hi lava leswaku vanhu vo tala hilaha swi nga kotekaka hakona va kuma lunghelo ro dyondza ku vitana vito ra Yehovha kutani va ponisiwa. (Rhom. 10:13, 14) Leswi swi katsa lava va vaka va nga ri kona emakaya loko hi ri karhi hi chumayela hi yindlu ni yindlu. Tanihi muapostola Pawulo, tsakela “ku nyikela vumbhoni bya rixaladza hi mahungu lamanene ya musa lowu nga faneriwiki wa Xikwembu.”—Mint. 20:24.