Tsima Ro Hlawuleka Ra October 16 Ku Ya Ka November 12!

¹ “Vukhongeri Bya Mavunwa Byi Ta Lovisiwa Ku Nga Ri Khale!” Yoleyo i nhloko-mhaka ya xiphephana xa Kingdom News No. 37, lexi nga ta fambisiwa emisaveni hinkwayo ku sukela n’hweti leyi taka. Eka mavhiki mambirhi yo sungula ya October, hi ta fambisa timagazini ta Xihondzo xo Rindza na Xalamuka! Kutani ku sukela hi Musumbhunuku, October 16 ku ya ka Sonto ya November 12, hi ta va hi khomeke ngopfu hi ku fambisa xiphephana xa Kingdom News No. 37. Hi mahelo-vhiki hi ta xi fambisa swin’we ni timagazini ta sweswinyana.

² Lava Nga Ta Hlanganyela: Hinkwavo lava nga vahuweleri va mahungu lamanene lava chivirikaka va fanele va hlanganyela hi xitalo. Van’wana va ta kota ku teka vuphayona bya nkarhinyana. Xana u ni vana kumbe vanhu lava u dyondzaka na vona Bibele lava endlaka nhluvuko hi tlhelo ra moya? Va pfune leswaku va vulavula ni vakulu leswaku va ta va kambela ku vona loko va faneleka ku va vahuweleri lava nga khuvuriwangiki. Vakulu va fanele va ya vulavula ni vahuweleri lava holeke leswaku va va khutaza ku huma nsimu, kumbexana va nga tirha swin’we ni vahuweleri lava nga ni ntokoto.

³ Mphakelo wa Kingdom News No. 37 wu karhi wa rhumeriwa emavandlheni hinkwawo leswaku muhuweleri ha wun’we a ta kuma tikopi ta kwalomu ka 50. Vanhu lava tsakelaka lava nga riki vahuweleri va nga ha nyikiwa tikopi ta ntlhanu leswaku va ta ti nyika swirho swa mindyangu ya vona ni vanghana. Vahuweleri hinkwavo ku katsa ni maphayona va fanele va hlayela leswaku va fambise swiphephana swingani kutani va tsala nhlayo ya kona endzhaku ka xiviko xa vona xa ntirho wa nsimu eku heleni ka n’hweti ya October ni ya November. Matsalana u ta tsala nhlayo hinkwayo leyi fambisiweke hi vandlha a yi rhumela erhavini eku heleni ka yin’wana ni yin’wana ya tin’hweti leti hatimbirhi. Swiphephana swihi na swihi swa Kingdom News leswi nga ta va swa ha sele loko tsima leri ri hela u nga ha swi fambisa kun’wana ni kun’wana loko u ri eku chumayeleni.

⁴ Leswi U Nga Swi Vulaka: Leswaku rungula leri ri fika etindleveni ta vanhu vo tala, komisa xingheniso xa wena. U nga ha ku: “Ndzi famba ndzi avelana ni vanhu rungula leri ra nkoka entirhweni lowu wo pfuna vanhu mahala. Hi lexi xa wena xiphephana. Ndzi kombela leswaku u sala u xi hlaya.” Nkarhi wun’wana swi nga antswa leswaku u siya bege loko u ri karhi u chumayela hi yindlu ni yindlu. Tiyiseka leswaku u va tsala ehansi hinkwavo lava tsakelaka.

⁵ Ndlela Yo Hlanganisa Nsimu Ya N’wina: Ematshan’weni yo fambisa xiphephana xa Kingdom News exitarateni, xi fambiseni hi yindlu ni yindlu ni le nsin’wini ya mabindzu loko swi koteka. Mavandlha ma khutaziwa ku heta tsima ra wona ra nsimu leyi nga aviwangiki hi October 15 leswaku ma ta kota ku hlanganyela hi xitalo ensin’wini ya wona ku sukela hi October 16. Xiphephana lexi a xi fanelanga xi fambisiwa ensin’wini leyi nga aviwangiki. Tsalani nomboro ya lomu mi nga kumangiki munhu kona, kutani mi ringeta ku tlhelela hi nkarhi wun’wana kumbe siku rin’wana. Ku sukela hi Musumbhunuku, November 6, ku nga ha siyiwa xiphephana emakaya lawa ku nga kumiwangiki munhu eka wona. Hambiswiritano, loko vandlha ri ri ni nsimu leyikulu leyi nga taka yi nga hlanganisiwi hinkwayo eka tsima leri, vakulu va nga ha vona swi fanerile leswaku ku sukela eku sunguleni ka tsima ku siyiwa swiphephana emakaya lawa ku nga kumiwangiki munhu eka wona.

⁶ Ku lovisiwa ka “Babilona Lonkulu” ku ya ku tshinela hi ku hatlisa. Vanhu va fanele va huma eka yena a nga si lovisiwa hilaha ku heleleke. (Nhlav. 14:8; 18:8) Hlela ka ha ri sweswi leswaku u hlanganyela hi xitalo eka tsima ra misava hinkwayo ro tivisa vanhu hinkwavo leswaku makumu ya vukhongeri bya mavunwa ma tshinele!