Tsima Ro Fambisa Xiphephana Xo Hlawuleka Hi October 20—November 16!
1 Ku sukela hi Musumbhunuku wa October 20 ku ya emahlweni ku ringana mavhiki ya mune, hi ta va hi ri eka tsima ro hlawuleka ro fambisa xiphephana lexintshwa lexi nge Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? Ha tshemba leswaku tsima leri ro hlawuleka emisaveni hinkwayo ri ta endla leswaku vanhu va tsakela ntiyiso.—Yoh. 17:17.
2 Xiphephana lexi xi nyikela tinhlamulo to koma leti humaka eBibeleni ta swivutiso swa tsevu swa nkoka, leswi nge: “Xana Xikwembu xa hi rhandza hakunene?” “Xana tinyimpi ni ku xaniseka swi ta kala swi hela?” “Xana ku endleka yini hi hina loko hi fa?” “Xana ku ta endleka yini hi varhandziwa va hina lava feke?” “Ndzi fanele ndzi khongela hi ndlela yihi leswaku Xikwembu xi yingisa xikhongelo xa mina?” ni lexi nge “Ndzi nga wu kuma njhani ntsako evuton’wini?” Tikereke ta Vujagana a ti si tshama ti nyika vanhu tinhlamulo leti enerisaka ta swivutiso leswi. Hambi ku ri vanhu vo tala lava nga riki Vakreste swivutiso leswi swa va karhata, kambe swi nga endleka leswaku a va swi tivi leswaku va nga kuma tinhlamulo ta swona eBibeleni. Kutani a hi kanakani leswaku rungula leri ri ta fikelela timbilu ta vanhu vo tala.
3 Hlanganisani Nsimu Ya N’wina: Endlani leswi mi nga swi kotaka leswaku mi hlanganisa nsimu ya n’wina hinkwayo. Loko mi ri ni nsimu leyikulu, vakulu va nga ha mi khutaza leswaku mi siya kopi ya xiphephana emakaya lawa mi nga kumangiki munhu eka wona. U nga rivali ku nyika vaakelani, maxaka, vatirhi-kuloni kumbe lava u nghenaka na vona xikolo ni van’wana lava u toloveleke ku bula na vona. Kumbexana u nga hlela swiyimo swa wena leswaku u teka vuphayona bya nkarhinyana hi October kumbe hi November. Xana u ni n’wana kumbe xichudeni xa Bibele lexi endlaka nhluvuko eku tiyiseni vuxaka bya xona ni Xikwembu, naswona xi nga fanelekaka ku va muhuweleri la nga khuvuriwangiki leswaku xi ta hlanganyela na hina eka tsima leri? Loko swi ri tano tivisa vakulu.
4 Leswi U Nga Swi Vulaka: Leswaku rungula leri ri fikelela vanhu vo tala swi ta va swinene ku komisa xingheniso xa wena. Vutisa n’wini wa muti xin’wana xa swivutiso leswi nga exifunengetweni xa xiphephana kutani u n’wi komba nhlamulo ya kona. Leswi swi ta pfuna vahuweleri hinkwavo leswaku va cinca-cinca swingheniso swa vona hi ku ya hi leswi vanhu va karhatekaka ha swona ensin’wini ya n’wina. Loko munhu a tsakela, n’wi tsale ehansi kutani u tlhelela eka yena. Hi mahelo-vhiki, mi nga fambisa timagazini swin’we ni xiphephana lexi. Loko tsima leri ri hela hi November 16, hi ta ya emahlweni hi fambisa buku leyi nge Leswi Bibele Yi Swi Dyondzisaka. Swiphephana leswi swi nga ta va swi sele hi ta swi fambisa ku fana ni leswin’wana leswi hi nga na swona.
5 Sungula Dyondzo Ya Bibele: Xiphephana lexi xi endleriwe ku hi pfuna leswaku hi sungula tidyondzo ta Bibele. Loko u endla riendzo ro vuyela eka munhu loyi a kombiseke ku tsakela, u nga ha n’wi vutisa leswaku hi wihi ntiyiso wa le Bibeleni lowu nga n’wi chavelela? N’wi kombe tluka ro hetelela ra xiphephana xexo laha ku hlamuseriwaka malunghiselelo ya hina ya dyondzo ya Bibele, kutani u n’wi nyika buku leyi nge Leswi Bibele Yi Swi Dyondzisaka. Loko swi koteka, bulani hi ndzimana yin’we kumbe timbirhi ehansi ka ndzima leyi nga ni rungula leri engetelekeke ra mhaka leyi n’wi chaveleleke.
6 Yehovha u lava vanhu lava nga ta n’wi gandzela “hi moya ni ntiyiso.” (Yoh. 4:23) Onge hinkwerhu hi nga tikarhatela ku hoxa xandla eka tsima leri ro hlawuleka ro pfuna vanhu leswaku va tiva ntiyiso!