“Gidi Ra Malembe Lerintshwa—Xana Vumundzuku Byi Ku Khomele Yini?”
1 I khale vanhu emisaveni hinkwayo va ri karhi va tivutisa xivutiso lexi. Hambileswi munhu a koteke ku endla swilo swo tala eka malembe-xidzana lama hundzeke, vanhu va pfilunganyekile hileswi se ku hundzeke magidi ya malembe ku nga si tlhantlhiwa swiphiqo swa xisekelo leswi hlaselaka vanhu. (Yobo 14:1; Ps. 90:10) Vanhu va nga ku kuma kwihi ku wisa?
2 Hi n’hweti ya October na November, hi ta va ni lunghelo ro hlawuleka ra ku nyika vaakelani va hina nhlamulo ya xivutiso xexo. Njhani? Hi ku fambisiwa ka xiphephana xa Kingdom News No. 36. Xi ni nhloko-mhaka leyi nge “Gidi Ra Malembe Lerintshwa—Xana Vumundzuku Byi Ku Khomele Yini?” Exiphen’wini xo sungula xa n’hweti ya October, hi ta fambisa timagazini ta Xihondzo xo Rindza na Xalamuka! Kutani ku sukela hi Musumbunuku wa October 16, ku ya fika hi Ravuntlhanu wa November 17, hi ta hlanganyela entirhweni lowukulu wa ku fambisa Kingdom News No. 36. Hi nkarhi wa tsima leri, hi ta nyikela nyingiso eku fambisiweni ka Kingdom News No. 36 exikarhi ka vhiki. Hi mahelo-vhiki, hi ta xi fambisa ni timagazini leti nga enkarhini.
3 Xana U Ta Hlanganyela Hi Xitalo? Vakulu, malandza ya vutirheli ni maphayona va fanele ku rhangela entirhweni lowu hikuva hi vona va languteriweke ku endla tano. Vahuweleri vo tala va lulamise swiyimo swa vona leswaku va va maphayona ya nkarhinyana hi n’hweti yin’we kumbe ha timbirhi ka tona hi nkarhi wa tsima leri. Van’wana va kunguhata ku tirha nkarhi lowu engetelekeke ensin’wini ku tlula lowu va toloveleke ku tirha wona.
4 Vafambisi va Tidyondzo ta Buku ta Vandlha va nga pfuna swinene ku khutaza un’wana ni un’wana entlaweni wa vona leswaku a hlanganyela hi xitalo eku fambisiweni ka Kingdom News No. 36. Swi nga ha endleka ku ri ni vahuweleri lava holeke entirhweni wa ku chumayela. Vakulu va fanele ku va endzela ku vona loko ku nga endliwa swo karhi ku va pfuna. Kumbexana ku nga endliwa malunghiselelo ya leswaku muhuweleri la nga ni ntokoto a famba ni munhu un’we la holeke, entirhweni wa nsimu etin’hwetini leti. Kumbexana swingheniso swo olova swa ku fambisa Kingdom News No. 36 swi nga sisimula vahuweleri lava.
5 Leri ku ta tlhela ku va lunghelo lerinene eka swichudeni swa Bibele leswi se swi nga kusuhi ni ku heta ku dyondza buku leyi nge Vutivi, leswi hi hala tlhelo swi fanelekaka ku va vahuweleri lava nga khuvuriwangiki, leswaku swi sungula ku hlanganyela evutirhelini. Hambi ku ri vana va nga hlanganyela entirhweni lowu wo tsakisa.
6 Lexi lavekaka i xingheniso xo olova. U nga ha ku:
◼ “Ndzi nyikele nkarhi wa mina hi ku tirhandzela leswaku ndzi pfuna eku fambiseni rungula leri ra nkoka swinene eka ndyangu wun’wana ni wun’wana laha [vula vito ra muti kumbe tiko]. Kopi leyi i ya wena. Ndzi kombela u sala u yi hlaya.” Swi nga va swinene ku siya nkwama wa tibuku wa le nsin’wini ekaya loko u fambisa Kingdom News No. 36.
7 Minhlangano Ya Ntirho Wa Nsimu Leyi Hleriweke Kahle: Vakulu va fanele ku vona leswaku malunghiselelo ya ku nyikela vumbhoni ma endliwa hi nkarhi naswona ma tirha. Ngopfu-ngopfu mulanguteri wa ntirho u fanele ku tiyiseka leswaku ku ni nsimu leyi eneleke leyi nga ta tirhiwa hi yindlu ni yindlu ni ya mabindzu, leswaku vahuweleri hinkwavo va hlanganyela hi xitalo entirhweni lowu. Laha swi kotekaka, siku rin’wana ni rin’wana exikarhi ka vhiki, hi mahelo-vhiki ni nimadyambu ku fanele ku lunghiseleriwa minhlangano ya ntirho. Ku nga ha endliwa ni malunghiselelo ya ku hlangana nindzhenga leswaku ku ta vuyeriwa vana va xikolo, lava tirhaka ni van’wana.
8 Lexi U Faneleke U Xi Endla Hi Makaya Lama Nga Riki Na Vanhu: Pakani ya hina i ku vulavula ni vini va miti vo tala hilaha hi nga swi kotaka hakona. Loko u kuma ku nga ri na munhu ekaya, tsala adirese ya kona kutani u tlhela u vuyela hi nkarhi wun’wana. Loko ko kala ku fika vhiki ro hetelela ra tsima leri u nga si kuma munhu emakaya wolawo, u nga siyela vini va kaya rero xiphephana xa Kingdom News No. 36 laha vahundzi va ndlela va nga ta ka va nga xi voni. Vakulu va nga ha byela vandlha leswaku ri siya xiphephana xa Kingdom News No. 36 emakaya lama nga riki na munhu, eka riendzo ro sungula, loko ku tirhiwa nsimu leyi nga aviwangiki ni tindhawu ta le makaya, ni tindhawu leti nga ni nsimu leyikulu leyi swi nga endlekaka leswaku tsima leri ri hela yi nga si hlanganisiwa.
9 A Hi Gingiritekeni! Mavandlha ma fanele ku lwela ku hlanganisa nsimu ya wona ku nga si hela tsima leri hi November 17. Loko nsimu ya ka n’wini yi ri yikulu swinene, vahuweleri van’wana va nga ha tirha va ri voxe loko sweswo swi koteka naswona ku nga ri na khombo. Lunghiselelo leri ri ta endla leswaku swi olova ku fikelela vanhu vo tala lava tsakelaka hilaha swi nga kotekaka hakona. Tiyiseka leswaku u hlayisa mavito ya vanhu hinkwavo lava tsakelaka, lava u va kumeke.
10 Vakulu va fanele ku vona leswaku vandlha ri ta lava timagazini tingani leti engetelekeke kutani va endla xikombelo xa leti lavekaka. Phayona rin’wana ni rin’wana ro hlawuleka, ra nkarhi hinkwawo ni ra nkarhinyana ri ta nyikiwa tikopi ta 250 ta Kingdom News No. 36, kasi muhuweleri un’wana ni un’wana wa vandlha u ta nyikiwa tikopi ta 50. Kutani, xana u lunghekile naswona u ku langutele hi mahlo-ngati ku va la gingiritekaka entirhweni lowu wo hlawuleka? Mawaku lunghelo leri hi nga na rona ra ku tivisa vaakelani va hina hinkwavo hi switshembiso swa Xikwembu swa vumundzuku lebyi ngo va kwala nyongeni!