‘Ku Ni Swo Tala Swo Swi Endla eNtirhweni Wa Hosi’
1 Hakunene hi ni xiyimiso lexi teleke xa mintirho ya swa le tilweni lexi hi xi languteleke hi April na May! Hi April 14 hi ta tlangela Xitsundzuxo xa rifu ra Kreste. Vanhu vo tala hi laha swi nga kotekaka ha kona va fanele ku khutaziwa ku va kona eka xiendlakalo xolexo xa nkoka: van’wamabindzu lava hi va toloveleke, maxaka lama nga riki vapfumeri, vadyondzi-kulorhi, vanhu lava ha ku sungulaka ku tsakela ni swichudeni swa Bibele. Tsala mavito ya lava u kunguhataka ku va rhamba leswaku ni un’we a nga sali.
2 Vhiki leri nga ta landzela hi ta khutaza hinkwavo lava veke kona eXitsundzuxweni leswaku va ta twa nkulumo ya le rivaleni yo hlawuleka hi April 23, leyi nga ni nhloko-mhaka leyi nge “Makumu Ya Vukhongeri Bya Mavunwa Ma Tshinele.” Hi tshemba leswaku vanhu vo tala lava tsakelaka lava nga ta twa rungula leri ra matimba va ta vona xilaveko xo tihlanganisa ni vandlha nkarhi na nkarhi, ku nga ri hi swiendlakalo swo hlawuleka ntsena.
3 Ku Ta Humesiwa Xiphephana Xo Hlawuleka Lexi Nge Kingdom News: Lexi nga ta tsakisa ngopfu eka nhlangano wa April 23 ku ta va ku humesiwa ka xiphephana lexi nga enkarhini xa matluka ya mune lexi nge Kingdom News No. 34 lexi nga ta hangalasiwa swinene ku fikela hi May 14. Xana a wu pfumeli leswaku ‘ku ni swo tala swo swi endla entirhweni wa Hosi’ hi nguva leyi ya Xitsundzuxo?—1 Kor. 15:58.
4 Mphakelo wa swiphephana swa Kingdom News wu ta rhumeriwa evandlheni rin’wana ni rin’wana. Mabokisi lama nga ni swiphephana swa Kingdom News ma fanele ku vekiwa endhawini leyi hlayisekeke naswona a ma fanelanga ku pfuriwa ku kondza ku hela nongonoko hi April 23. Hi nkarhi wolowo swiphephana swa Kingdom News swi ta kumeka leswaku swi nyikiwa vamakwerhu ni vanhu. Emakumu ka nongonoko wa minhlangano ya vandlha, wa tinhlengeletano ta xifundzha kumbe wa siku ra nhlengeletano yo hlawuleka hi April 23, un’wana ni un’wana wa lava nga ta va va ri kona u ta kuma kopi leswaku a tolovelana ni leswi nga endzeni ka yona naswona a lunghekela ku yi hangalasa.
5 Vakulu Va Ta Va Ni Swo Tala Swo Swi Endla: Eku sunguleni ka n’hweti leyi huvo ya vakulu yi fanele ku hlangana leswaku yi bula hi vuxokoxoko bya tsima leri ro hlawuleka. Mavandlha ma fanele ku lwela ku hlanganisa nsimu ya wona hinkwayo leyi aviweke. Tsima leri ri nga si hela, endlani matshalatshala lama hlawulekeke yo tirha masimu lama nga hlanganisiwangiki eka tin’hweti ta tsevu leti hundzeke. Hikwalaho ka nkoka wa ntirho lowu, hi ta lava ku wu vekela etlhelo nkarhi wo tala wa vutirheli hi laha hi nga kotaka ha kona. A swi kanakanisi leswaku vahuweleri vo tala ku tlula lava tolovelekeke va ta nghenela vuphayona bya nkarhinyana. Swichudeni swo tala swa Bibele swi ta hi joyina tanihi vahuweleri lavantshwa lava amukeriweke lava nga khuvuriwangiki. Mawaku nkarhi lowu tsakisaka lowu hi nga ta va na wona loko hi tirha swin’we entirhweni wa Hosi!
6 Vafambisi va Dyondzo ya Buku ya Vandlha va fanele ku endla malunghiselelo lama heleleke yo veka vumbhoni hi ntlawa hi Migqivela na hi Tisonto. Un’wana ni un’wana u fanele ku khutaziwa ku hlanganyela hi ku hiseka. Ku engetela eka ntirho wa mahelo-vhiki, ku fanele ku endliwa xiyimiso xo veka vumbhoni ni madyambu, hambi ko va kan’we evhikini ra tsima. Van’wana va nga ha hlela ku hlangana va ya ensin’wini endzhaku ka xikolo leswaku va pfuna swichudeni leswi nga ta tsakela ku hlanganyela hi laha ku engetelekeke.
7 Ku fanele ku endliwa xiyimiso xa nhlangano wa ntirho wa nsimu leswaku vahuweleri ni maphayona va ta sungula ka ha ri mixo evutirhelini siku na siku. Minhlangano leyi yi fanele ku komisiwa. Wun’wana ni wun’wana wu fanele ku kombisa rungula leri olovaka ra xiphephana xa Kingdom News. Minhlangano ya ni ndzhenga ya ntirho yi nga ha katsa xiringanyeto xin’we kumbe swimbirhi swo endla maendzo yo vuyela eka lava amukeleke xiphephana xa Kingdom News. Hambi swi ri tano, vahuweleri van’wana va nga ha tsakela ku swi hangalasa ni mixo na ni ndzhenga. Hikwalaho ka xikongomelo xolexo, mulanguteri wa ntirho u fanele ku tiyiseka leswaku ku ni nsimu leyi eneleke. Vito ni adirese ya un’wana ni un’wana la kombisaka ku tsakela swi fanele ku tsariwa eka rhekhodo ya yindlu na yindlu. Tinhla-nkulu ta bulo leri komeke ti nga ha katsiwa eka kholomo ya tinhla. Leswi swi ta pfula ndlela yo endla riendzo ro vuyela eku heleni ka vhiki kumbe n’hweti yoleyo.
8 Loko vandlha rin’wana ri pfuna rin’wana ku hlanganisa nsimu ya rona, mavito ni tiadirese ta vanhu lava tsakelaka ma fanele ku yisiwa evandlheni ra nsimu ya kona.
9 Vatswari, xana vana va n’wina va tirhela ku va vahuweleri lava nga khuvuriwangiki? Ku xiyiwe leswaku emavandlheni man’wana, vana lava tikhomaka kahle va fambe ni vatswari va vona lava tinyiketeleke ensin’wini malembe yo hlayanyana, naswona vana volavo va tirha kahle, hambi leswi va nga siki vaka vahuweleri va mahungu lamanene. Vatswari va fanele ku xiya loko vana va vona va ri fanelekela lunghelo leri hakunene. Vakulu vambirhi va nga bula hi timhaka hinkwato ni nhloko ya ndyangu ivi va boha loko n’wana a nga hlayiwa tanihi muhuweleri la nga khuvuriwangiki.—om-TS tl. 100.
10 Xana va kona vahuweleri va le nsin’wini ya vandlha ra ka n’wina lava nga ha swi hisekeliki ku nyikela gandzelo ro dzunisa Yehovha? (Hev. 13:15) Van’wana lava tsaneke va nga ha va va hluriwe hi ku hela matimba kumbe mivilelo ya vutomi, hambi leswi va yaka emahlweni va namarhela mimpimanyeto ya mahanyelo ya Bibele. Riendzo ra xinghana ra nkulu un’wana ri nga ha va susumetela ku tlhela va hlanganyela nkarhi na nkarhi ni vandlha, naswona hi nkarhi lowu faneleke va nga pfuxeta ntirho evutirhelini.
11 Hinkwavo Lava Fanelekaka Va Nga Hlanganyela eNtirhweni Lowu Wo Tsakisa: Exikarhi ka n’wina lavatsongo kumbe vana va kondlo-a-ndzi-dyi xana va kona lava swi kumaka swi va nonon’hwela ku hlanganyela evutirhelini bya yindlu na yindlu? Ku vuriwa yini hi n’wina lavantshwa lava ntokoto wa n’wina entirhweni wo chumayela wu nga wutsongo? Mi ta swi tsakela swinene ku tirha hi xiphephana xo hlawuleka xa Kingdom News! Ko laveka rungula leri olovaka ntsena.
U nga ha vula swin’wana swo fana ni leswi:
◼ “N’hweti leyi hi haxa rungula ra nkoka ematikweni ya 232 emisaveni hinkwayo. Rungula leri i ra nkoka hikuva ri hi nyika swivangelo leswi tiyeke swo pfumela leswaku ku ni ntlhantlho eka swiphiqo leswi hi langutaneke na swona namuntlha. Hi tsakela leswaku u va ni kopi ya wena hi wexe.”
Kumbe u nga ha ringeta lexi:
◼ “N’hweti leyi kwalomu ka ntlhanu wa timiliyoni ta vatirhi vo tirhandzela va hangalasa rungula ra nkoka hi tindzimi to tala. Ri lunghiseleriwe vanhu lava nga tsakelaka ku vona ku herisiwa ka swiphiqo leswi hinkwerhu hi langutaneke na swona namuntlha. Lexi i xa wena.”
Rungula leri ro olova ri nga ku fanela:
◼ “Hi khutaza un’wana ni un’wana ku hlaya rungula leri ra nkoka leri nge [hlaya xihloko xa xiphephana xa Kingdom News]. Xiya leswi xi swi vulaka eka tluka 2 malunghana ni swiphiqo leswi engetelekaka swa . . . [hlaya xivulwa lexi hlawuriweke eka xiphephana xa Kingdom News]. Ha tshemba leswaku u ta tsakela ku hlaya rungula leri hinkwaro leri nga enkarhini. Lexi i xa wena.”
12 Tsakela munhu un’wana ni un’wana loyi a amukelaka xiphephana xa Kingdom News. Vulavula khwatsi na hi ndlela leyi twisisekaka; a ku na xivangelo xo hatlisisa rungula ra wena. Hi lava ku hlanganisa nsimu ya hina hi ku hetiseka hi tlhela hi vona leswaku hinkwavo lava kombisaka ku tsakela ku hlaya xiphephana xa Kingdom News va nyikiwa kopi ya vona. Loko ku nga ri na munhu ekaya, fungha rhekhodo ya wena ya yindlu na yindlu hi vukheta leswaku u ta tlhelela hi nkarhi lowu faneleke ku ya nyikela xiphephana xa Kingdom News eka n’wini wa muti. Swiphephana swa Kingdom News swi nga ha tirhisiwa eku nyikeleni ka vumbhoni exitarateni loko munhu a kombisa ku tsakela ku hlaya mhaka ya xona, kambe a swi fanelanga swi nyikiwa mani na mani onge i swiphephana swo navetisa. Ematshan’weni ya sweswo, tshinelela lava hundzaka ivi u va hlamusela nkoka wa rungula leri kombisiweke. Tirhisa xiphephana xa Kingdom News eka vumbhoni bya xitshuketa, tanihi loko u ri eku fambeni kumbe loko u nyikela vumbhoni eka vatirhi-kuloni hi nkarhi wa ku wisa wa ni nhlekanhi. Lava va pfaleriweke kumbe vavabyi va nga swi nyika vaendzi, madokodela, vaongori, vaxavisi ni van’wana lava taka ekaya ra vona.
13 Xana u ta endla maendzo mangani yo vuyela hi nkarhi lowu wa tsima? A swi kanakanisi leswaku ma ta va ma tele, tanihi leswi hinkwavo lava ntsena va kombiseke ku tsakela eka swiphephana swa Kingdom News va faneleke ku endzeriwa nakambe. Eka riendzo ro sungula, swi kahle ku tirhisa xiphephana xa Kingdom News. Kutani loko u tlhelela, endla tinhlamuselo ti nga ri tingani mayelana ni ku hlawuleka ka rungula ra xiphephana xa Kingdom News. Yingisela kahle loko n’wini wa muti a phofula mianakanyo yakwe malunghana ni leswi a swi hlayeke. Tinhlamuselo ta yena ti ta ku pfuna ku tiva leswi u nga n’wi nyikaka swona eka magazini wa sweswinyana, naswona kumbexana ni ndlela leyi u nga lunghiselelaka ha yona ku yisa bulo emahlweni. Loko u kuma n’wangulo lowunene eka riendzo ro vuyela, ringeta ku sungula dyondzo ya Bibele.—1 Kor. 3:6, 7.
14 “Mintirho Ya N’wina A Yi Nga Weli Ehansi”: Xana ntirho lowu hinkwawo wu ta va wa nkoka? Pawulo u tiyisekise Vakorinto a ku: “EHosini mintirho ya n’wina a yi nga weli ehansi.” (1 Kor. 15:58) Hi malembe yo tala, matshalatshala ya hina yo hangalasa swiphephana swa Kingdom News ma katekisiwile swinene. Mpatswa wun’wana lowu a wu rhurhela efuleteni leyi nga riki na nchumu wu kume kopi ya khale ya xiphephana xa Kingdom News edirowareni. A ku ri xona ntsena lexi saleke efuleteni hinkwayo. Endzhaku ko xi hlaya, va endzele vandlha ra kwalaho ivi va kombela dyondzo ya Bibele. Va sungule ku va kona eminhlanganweni hinkwayo ivi endzhakunyana va kombisa ku navela ku khuvuriwa. Kumbexana kopi leyi u nga ta yi siya yi ta tisa vuyelo lebyi fanaka!—Nakambe vona Awake!, ya November 8, 1976, tluka 15.
15 Hi langutane ni ntirho lowukulu. Pakani ya hina hi leswaku vandlha rin’wana ni rin’wana ri hlanganisa nsimu leyi ri averiweke yona ku nga si hundza May 14 kumbe ku hela ka n’hweti loko swi fanerile, ku engeteriwa nkarhi wo hangalasa xiphephana xa Kingdom News. Ku ta rhumeriwa swiphephana swa Kingdom News leswaku phayona rin’wana ni rin’wana ra nkarhi hinkwawo ni ra nkarhinyana ri ta kuma 250 wa tikopi. Muhuweleri un’wana ni un’wana wa le vandlheni u ta kuma tikopi ta kwalomu ka 50. Vahuweleri ni maphayona va fanele ku amukela tikopi leti va nga ta kota ku ti hangalasa ntsena, naswona va fanele ku tlherisa swiphephana swihi na swihi leswi saleke leswaku van’wana va ta swi tirhisa. Ntirhisano lowunene emhakeni leyi wu ta tiyisekisa leswaku rungula leri ra nkoka ri hangalasiwa swinene hi laha swi kotekaka ha kona. Loko hikwalaho ka ku averiwa nsimu leyikulu mavandlha man’wana ma nga yi hlanganisanga nsimu ya wona exikarhi ka May naswona tikopi ta ha ri kona, swi nga pfuna ku rhamba mavandlha ya le kusuhi leswaku ma ya pfuna. Emavandlheni man’wana, xilaveko lexi xi nga ha pfariwa loko vantshwa va kwalaho va andzisa ntirho wa vona hi ku tsarisa vuphayona bya nkarhinyana kumbe hi ku va kona evutirhelini nkarhi na nkarhi.
16 Ku ta laveka ku tinyiketela ka moya-xiviri hinkwawo eka Yehovha loko hi ta hetisisa ntirho wa hina. (Kol. 3:23) Vutomi bya katseka. Vanhu a va fanelanga va honisa nhlamuselo ya swiyimo swa misava namuntlha. Nkarhi wa famba. Va fanele ku xiya ntiyiso wa leswaku munhu a nga na wona ntlhantlho wa swiphiqo swa misava leyi. Xikwembu xi na wona. Lava va navelaka ku kuma nkateko wa Xikwembu va fanele va teka goza hi ku hatlisa, handle ko hlwela, hi ku fambisana ni swilaveko swa xona.
17 Emakumu ka tsima leri ro hlawuleka hi May 14, xana hi ta tshama hi mavoko? E-e! Hi ta tshama hi khomekile hi ku pfumelelana ni ndzayo ya Pawulo leyi huhuteriweke.