‘Chivirikela Mintirho Leyinene’ Hi April!
1 N’wexemu ku nyikeriwe vumbhoni hi mpimo lowukulu loko timiliyoni ta tikopi ta xiphephana xa Kingdom News No. 34 ti hangalasiwile emisaveni hinkwayo. Vahuweleri va mavandlha ni maphayona hilaha ku fanaka va hlanganyele hi ku hiseka entirhweni lowu lowu nyanyulaka. Xana a wu ri un’wana wa vona? Loko swi ri tano, a swi kanakanisi leswaku u tiphine hilaha ku heleleke hi ku hlanganyela eka tsima leri hlamarisaka. Sweswi u nga ha tivutisa, Xana i ‘mintirho yihi leyinene’ leyi hi vekeriweke yona nan’waka?—Tito 2:14.
2 Hi April ni le ku sunguleni ka May, hi ta tsakela ku hangalasa nkandziyiso wa magazini wa Xalamuka! wa May 8, 1996, lowu nga na xihloko lexi nge “Loko Tinyimpi Ti Nga Ha Ri Kona.” Leswi mhaka leyi yi nga ta tsakisa vini va miti vo tala, hi ta tiyimisela ku hangalasa magazini lowu swinene hilaha swi nga kotekaka ha kona. Leswi wu nga ni rungula ra nkoka, nkandziyiso lowu wa Xalamuka! wu fanele wu fambisiwa hi April na May, kukondza mphakelo wa wona wu hela.
3 Pakani Ya Hina—Ku Hlanganyela Ka Vahuweleri Hinkwavo: Entiyisweni, swi ta khutaza swinene loko muhuweleri un’wana ni un’wana etikweni leri a ta hlanganyela entirhweni wo chumayela hi April. Leswi ha ha ku vaka kona eXitsundzuxweni xa rifu ra Kreste, entiyisweni hi ta lava ku kombisa ku tlangela ka hina vunene bya Xikwembu hi ku ‘humesa magandzelo’ evutirhelini bya nsimu.—Hev. 13:15.
4 Ku fanele ku endliwa matshalatshala lamakulu leswaku ku tiviwa swilaveko swa xirho xin’wana ni xin’wana xa vandlha leswaku hinkwerhu hi ta hlanganyela hi ku hiseka evutirhelini hi April. (Rhom. 15:1) Vafambisi va dyondzo ya buku va fanele va xalamukela swinene swiyimo swa lava va nga emintlaweni ya vona naswona va nyikela mpfuno loko swi fanerile. Xana ku ni loyi a lavaka xo famba ha xona? I mani la nga ta n’wi khandziyisa? Ku ni lava chavaka kumbe lava nga titshembiki? Xana vahuweleri van’wana lava nga ni ntokoto va nga tirha na vona? Ku vuriwa yini hi lava nga kotiki ku famba kumbe lava vabyaka? Xana va nga veka vumbhoni hi riqingho, hi ku tsala papila, kumbe hi tindlela tin’wana leti tirhaka?
5 Van’wana lava va holeke va tshame va ri karhi va kuma xikhutazo xa moya nkarhi na nkarhi, naswona va nga ha va va susumeteleke ku hlanganyela entirhweni wo chumayela nakambe. Tsima ra Xalamuka! leyo hlawuleka ri ta va nyika nkarhi lowunene wo tlhela va hiseka.
6 Letelani Vana Leswaku Va Hlanganyela: Vana vo tala va Timbhoni ta Yehovha va fambe ni vatswari va vona hi yindlu na yindlu malembe yo tala, hambileswi va nga siki vaka vahuweleri lava nga khuvuriwangiki. Xana sweswi i nkarhi wo va va sungula ku va vahuweleri? Xana swi huma embilwini naswona xana va swi lulamerile ku hlanganyela hi xikongomelo entirhweni wa yindlu na yindlu? Tinhloko ta mindyangu ti fanele ti tirhisa nkarhi wa dyondzo ya Bibele ya ndyangu leswaku ti pfuna vana va tona lava fanelekaka leswaku va lunghiselela xingheniso lexi nga ta fanela vuswikoti bya un’wana ni un’wana hi ku ya hi malembe ya yena. Vana lavakulu va nga hlawula xivutiso lexi tlhontlhaka mianakanyo lexi nga ta pfuxa ku tsakela ka n’wini wa muti, kutani va kombisa nhlamulo ya xona eka magazini. Vana lavatsongo va nga nyikela vumbhoni lebyi humelelaka hi marito ma nga ri mangani. Hi xikombiso, va nga khutaza n’wini wa muti ku “hlaya magazini lowo hlawuleka lowu fambisiwaka emisaveni hinkwayo n’hweti leyi.” Tanihi xiphemu xa ku lunghiselela ka ndyangu wa wena, tiyiseka leswaku u katsa swiringanyeto leswi vulavulaka hi nkaneto lowu tolovelekeke. U ta kuma swiringanyeto swo tala leswinene ebukwini leyi nge Ku Hlamulana. Hi nkarhi wa swakudya ni hi minkarhi yin’wana leyi faneleke, khutaza swirho swa ndyangu leswaku swi rungula mintokoto leyi swi veke na yona entirhweni wa nsimu.
7 Swichudeni Swa Bibele Leswi Fanelekaka Swi Endla Ntirho Lowu Yesu A Nga Wu Endla: Yesu a nga dyondzisanga hi ku letela timhaka ta ripfumelo ntsena. U fambe ni swichudeni swa yena evutirhelini kutani a swi dyondzisa ndlela yo chumayela. (Lk. 8:1; 10:1-11) Xana xiyimo xi njhani namuntlha? Ku fambisiwa tidyondzo ta Bibele to tlula 65 000 eAfrika Dzonga. A swi kanakanisi leswaku hi xikhutazo lexi faneleke vo tala va swichudeni leswi va nga teka goza leri landzelaka hi ku ya hi vona naswona va fanelekela ku tirha tanihi vahuweleri lava nga khuvuriwangiki hi April.
8 Loko u fambisa dyondzo ya Bibele, xiya swivutiso leswi: Xana xichudeni xi endla nhluvuko, lowu fambisanaka ni malembe ya xona ni vuswikoti bya xona? Xana xi sungurile ku avelana ripfumelo ra xona ni van’wana hi xitshuketa? Xana xi “ambarile munhu wa hanyelo lerintshwa”? (Kol. 3:10) Xana xi na tona timfanelo ta ku va muhuweleri la nga khuvuriwangiki, leti andlariweke eka buku leyi nge Vutirheli Bya Hina matluka 97 ku ya ka 99? Loko u vona xi faneleka, ha yini u nga buli na xona hi mhaka leyi? Swichudeni swin’wana swo lava ntsena xirhambo lexi kongomeke xo hlanganyela eku chumayeleni. Kavula, loko xichudeni xi swi rhandza, xo sungula swi ta va swinene leswaku mulanguteri la ungamelaka a lunghiselela hi ndlela leyi tolovelekeke leswaku ku buriwa hi mhaka leyi ni vakulu vambirhi. Hi hala tlhelo, ku nga ha va ku ri na xin’wana lexi kokelaka xichudeni endzhaku. Kumbexana un’wana wa vakulu a nga ha famba na wena eka dyondzo ya wena ya Bibele kutani a xi endla xi phofula ku titwa ka xona mayelana ni ntiyiso. Loko a yingiserile leswi xichudeni xi swi vulaka, nkulu a nga ha swi kota ku nyikela swiringanyeto leswi tirhaka, kun’we ni mpfuno wa Matsalwa.
9 “Londzovotani Nkarhi” Wo Phayona Nkarhinyana: Lembe na lembe hi nguva ya Xitsundzuxo, ku tlangela nkutsulo ku susumetela magidi leswaku ya ‘londzovota nkarhi’ hi ku va maphayona ya nkarhinyana. (Ef. 5:15-17) Hambileswi swi lavaka ku titsona swin’wana, vuyelo bya kona i byikulu. Nhlayo leyikulu ya vantshwa yi tirhisa nkarhi wo wisa ka xikolo leswaku yi phayona nkarhinyana. Vanhu lavakulu lava va tirhaka nkarhi hinkwawo va tirhisa nkarhi wa ni madyambu ni mahelo-vhiki hi xitalo leswaku va phayona nkarhinyana. Xisweswo, mindyangu hinkwayo yi tinyike nkarhi wo phayona nkarhinyana swin’we! Emavandlheni man’wana vo tala va vakulu ni malandza ya vutirheli ni vasati va vona va tsarise tanihi maphayona ya nkarhinyana. Hi ku khutaziwa hi xikombiso xa vona xo hiseka, van’wana va tekelele xikombiso xa vona, leswaku nhlayo leyikulu evandlheni yi tirha tanihi maphayona ya nkarhinyana hi April.
10 Hambi wa swi kota ku phayona nkarhinyana kumbe a wu swi koti, kuma tindlela to ndlandlamuxa ntirho wa wena wa nsimu hi April. Tivekele pakani ya wena n’wini, leyi nga ta lava matshalatshala yo karhi leswaku u yi fikelela kambe lama u nga ma kotaka. Ku navela ka wena ko ‘nyikela swa wena hi ku tsaka’ entirhweni wa Yehovha, hi ku ya hi swiyimo swa wena n’wini, ku ta katekisiwa.—2 Kor. 12:15.
11 Minhlangano Ya Ntirho Wa Nsimu: Minhlangano ya ntirho wa nsimu yi fanele yi lunghiseriwa siku rin’wana ni rin’wana hi nkarhi wa tsima ra Xalamuka!, hi nkarhi lowu nga ta koteka ku sungula vutirheli ka ha ri ni mixo. Nakambe ku fanele ku endliwa malunghiselelo ya ku vula vumbhoni ni madyambu. Vahuweleri vo tala va ta hlanganyela entirhweni wa nsimu hi mahelo-vhiki, kutani ke mavandlha ma fanele ma hlela minhlangano ya ntirho wa nsimu hi Migqivela, nimixo na hi ndzhenga, hi nkarhi wa ku hangalasiwa ka Xalamuka! leyo hlawuleka.
12 Lava va fambisaka minhlangano ya ntirho wa nsimu va fanele va tiyiseka leswaku ku tshama ku ri na masimu yo tala. Nsimu leyi nga si tshamaka yi tirhiwa sweswinyana ku fanele ku hlanganisiwa yona ku sungula. Hambiswiritano, nsimu leyi nga aviwangiki leyi khathaleriwaka hi Sosayiti a yi fanelanga yi tirhiwa handle ka mpfumelelo wa Sosayiti. Xana u ni nsimu yin’we ya wena n’wini kumbe ku tlula leyi yi nga siki hlanganisiwaka sweswinyana? Loko u ta lava mpfuno wo tirha eka yona hi nkarhi wa tsima, vulavula na mulanguteri wa ntirho kumbe makwerhu la khathalelaka nsimu kutani u ta tsakela ku hlela leswaku u pfuniwa.
13 Xana U Ta Fambisa Timagazini Tingani? Munhu un’wana ni un’wana u fanele ku tihlamulela xona xivutiso xexo. Loko u tiyimisele ku fambisa timagazini to karhi hi nkarhi wa tsima, xiya muxaka wa nsimu leyi u nga ta tirha eka yona, malembe ya wena, rihanyo ra wena, nkarhi lowu u nga wu nyikelaka ensin’wini ni timhaka tin’wana. Hambiswiritano, xiya xitsundzuxo lexi nyikeriweke eka nkandziyiso wa Xihondzo xo Rindza xa January 1, 1994 lexi nge: “Vahuweleri kumbexana va nga tivekela pakani yo fambisa timagazini ta 10 hi n’hweti, hi ku ya hi swiyimo swa vona; maphayona ma nga lwela ku fambisa 90.” Xana pakani leyi fanaka yi ta tirha eka wena?
14 Vakulu—Ku Laveka Ku Kunguhata Kahle: Tiyisekani leswaku, loko swi koteka, nsimu hinkwayo ya vandlha yi tirhiwa hi nkandziyiso lowo hlawuleka wa Xalamuka! Ku fanele ku nyikeriwa nyingiso hi vukheta loko ku tirhiwa nsimu yihi na yihi ya mabindzu leyi vandlha ri averiweke yona. Lava va tirhaka yona va fanele va lunghiselela kahle naswona va ambala hi ndlela leyi faneleke. A swi bohi leswaku u lehisa rungula ra wena. Loko u tshinelela n’wamabindzu, u nga ha vula leswaku a hi kanyingi u kuma vanhu va mabindzu emakaya, kutani u te endhawini ya bindzu rakwe leswaku u ta n’wi komba xihloko lexi nga ta n’wi tsakisa hakunene. Kutani hi ku komisa u nga avelana na yena tinhla leti kongomeke leti nga eka magazini. Ku vula vumbhoni exitarateni hi timagazini nakambe ku fanele ku hleriwa kahle ensin’wini ya vandlha. Ndlela leyi tirhaka ngopfu yo hlanganyela entirhweni wa le xitarateni i ku tshinelela vahundzi va ndlela, ematshan’wini yo yimela vona leswaku va ta eka wena. Leswi u nga ta va u voniwa hi mani na mani, u fanele u tikarhatela ku languteka kahle. Ku nga ha va ku ri na tindhawu tin’wana ensin’wini ya n’wina leti nga tirhiwaka hi nkarhi wa tsima, to tanihi le switichini swa swihaha-mpfhuka, eswibedlhele, laha ku pakiwaka kona timovha, etiphakeni ni laha ku khathaleriwaka lava dyuhaleke. Huvo ya vakulu yi fanele yi tiyiseka hi malunghiselelo lama faneleke lama nga endliwaka leswaku ku chumayeriwa etindhawini leti ta nsimu ya n’wina.
15 Yehovha i mutirhi la nga karhaliki. (Yoh. 5:17) U endle matilo ni misava kun’we ni swimilana ni swiharhi; kambe u ye emahlweni a tirha ku kondza a vumba xivumbiwa xo hlawuleka emisaveni—munhu. Ntiyiso wa leswaku hi ni vutomi i vuyelo lebyi kongomeke bya ku tirha ka Xikwembu hi ku tirhandzela. Tanihi leswi hi ‘ringetaka ku fana na xona,’ hi fanele hi susumetiwa hi rirhandzu ra hina eka xona leswaku hi “chivirikela ku endla leswinene.” (Ef. 5:1; Tito 2:14) Leswi Yehovha a faneriwaka hi ku kuma matshalatshala ya hina lamakulu swinene ni leswi ku navela ku kuma vuyelo ku nga xihlawulekisi xa loyi a hisekaka, hi fanele hi tsakela ku endla ntirho lowunene evutirhelini. Kavula, Yehovha u tlangela magandzelo wahi na wahi lama hi n’wi endlelaka wona, naswona ntirho wa hina a wu nge vi wa hava. (1 Kor. 15:58) Kutani ke, hi timbilu leti tlangelaka, a hi tinyiketeleni hi ku hiseka entirhweni wa April, hi ri ni ntshembo wo amukeriwa hi Yehovha ni ku katekisiwa hi yena hambi ku ri ku humelela hi ndlela leyi fuweke!